Ni Tini Koso na Veibuku

ITUVAKI DREDRE

“Au nanuma sara ga niu sa kunea e dua na kequ isa vinaka. Au kaya lo ga ‘Keirau na sega ni qai veibiu tale.’ Ia ni oti ga e rua na vula, au sa tinia koso neirau veibuku. Au sega ni vakabauta ni totolo tu ga va qori na kena yalani neirau veikilai totoka!”—Ana.a

“Kena irairai ni keirau taleitaka vata e levu na ka. Au nui sara ga ni keirau na vakamau. Ia ni toso na gauna, au qai raica ni levu na ka keirau duidui kina. Niu kila ga ni cala noqu digidigi au sa tagutuva neirau veibuku.”—Elenani.

Sa bau donuya na ituvaki qori? Ena rawa ni yaga vei iko na ulutaga qo.

KA MO KILA

E dua na ka mosimosi ni tini koso na veibuku, vua mada ga e tinia. A tinia nona veibuku o Sera ni oti ga e ono na vula, qai kaya, “Dua na ka noqu rarawa! Dua na gauna sa mai tiki sara tu ga ni noqu bula na cauravou qo, ia qo sa sega. Niu rogoca eso na sere keirau taleitaka vata, au dau nanuma lesu na neirau veigauna vinaka. Niu lako ina so na vanua e dau talei vei keirau, dua na ka na kena mosi ni sa sega e yasaqu. E dina niu tinia na veibuku, au se dau vakasamataka tu ga na veika qori!”

De mosimosi ia e rawa ni vinaka. “O sega ni via vakararawataki koya,” e kaya o Elenani. “Ena yasana adua o raica ni na vakamosia ruarua na lomamudrau ke drau tomana tiko ga na veibuku e sega ni vakainaki.” E duavata kei koya o Sera, e kaya: “Ke o sega ni marautaki koya, de dua o na sega ni marautaka nomudrau bula vakawati, ena vinaka cake ga mo tinia.”

E sega ni kena ibalebale ni o ca. Sega ni veibuku kece ena tini ena vakawati, ia ena vinakati me rau vakatulewa na veibuku tiko. Ke dua vei kemudrau e vakatitiqa vakalevu, de vinaka me sa tini koso ga na veibuku. Ke yaco qori, sega ni kena ibalebale ni o ca. Kua ni yalolailai! Cava mo cakava?

KA O RAWA NI CAKAVA

Vosota na kena mosimosi. “Keirau sa veitalatala kei na dua noqu itokani vinaka sara,” e kaya o Elenani, sa tukuni oti mai. Ni o tinia koso nomu veibuku kei na dua drau veivolekati, o na rarawataka ga. “Ni tini koso e dua na veibuku” e kaya o Atama, “ena rarawataki ga, ke o kila mada ga ni vakatulewa donu qori.” De o vakataki Tui Tevita ena iVolatabu, e vola ena mosi ni lomana: “Ena bogi taucoko au vakasuasuataka na noqu idavodavo ena wainimata.” (Same 6:6) Ena so na gauna e vinaka ga mo vosota, qori na ka e dau yaco. Na nomu vosota e imatai ni kalawa mo marautaka tale kina na nomu bula.—iVakavuvuli vakaivolatabu: Same 4:4.

Veimaliwai kei ira na kauaitaki iko. Ena dredre toka meda cakava qori. E vakatusa o Ana a tukuni taumada: “Au a sega sara ga ni via raica e dua. Meu tu taudua mada ga meu vakasamataka noqu bula, kei na veika sa yaco.” E qai raica o Ana ni ka vakayalomatua nona dau veimaliwai kei ira nona itokani voleka era uqeti koya. E kaya: “Sa qai vinaka qo noqu bula, sega ni ca sara me vaka e liu.” —iVakavuvuli vakaivolatabu: Vosa Vakaibalebale 17:17.

Vuli ena veika sa yaco. E vinaka mo taroga: ‘Mai na veika e yaco qo, cava au rawa ni vakavinakataka? Na cava meu cakava keu veibuku tale ena dua na gauna?’ E kaya e dua na yalewa gone o Marica: “Toso na gauna au sa qai kila vinaka na veika e yaco. E dua toka na gauna meu qai rawa ni vakasama tale kina vakavinaka, mai na noqu kauaitaka tiko ga na lomaqu.” E va tale ga qori na rai i Atama, a tukuni taumada. E kaya: “Dua na yabaki taucoko meu qai guilecava na mosi ni kena sa mai tini koso noqu veibuku. Ia e dua toka na gauna balavu meu qai vuli mai na veika sa yaco qori. Au vulica kina e levu na ka me baleti au, ira na yalewa, kei na veibuku. Sa sega ni qai mosi vakalevu me vaka e liu.”

Masulaka na ka o lomaocaocataka. E kaya na iVolatabu ni “vakabulai ira na ramusu na lomadra, e vauca [tale ga] na nodra mavoa” na Kalou. (Same 147:3) E sega ni digia na keda isa na Kalou, ia e dau kauaitaka na noda bula, e sega tale ga ni dodonu meda beitaki koya ke tini koso na noda veibuku. Mo talaucaka na lomamu vua ena masu.​—iVakavuvuli vakaivolatabu: 1 Pita 5:7.