Na Kuli Varovaroa ni Moko e Dau Kumuni Wai

NA MOKO kuli varovaroa ni Ositerelia e kilai me thorny devil, e dau kumuna na wai mai na nuku suasua kei na gauna e kabukabu qai tunumaka kina na draki. Ena vakadrodroya sara e gusuna me gunuva. Ena sala cava? E rawa ni kilai qori nida dikeva na kuliniyagona veivakurabuitaki.

Vakasamataka mada: E vakavarina momoto na kuliniyagona. Era kaya eso na saenitisi ni dau drodrova na varina na wai qai curuma na tadrua ni kuliniyagona varovaroa me yacova sara na gusuna.

Na moko qo e kumuna na wai e yavana vaka kina e yagona taucoko, ia e vakauta vakacava mai yavana me yaco sara e gusuna? E kumuna tale ga vakacava na wai ena vanua suasua ni yacaraka tiko kina na ketena?

Era kila na dauvakadidike na ka e cakava na moko qo. E momoto na vari ni kuliniyagona ra qai kune ena kena tadrua eso na iyatu laini era vaka na salasala ni wai. Era qai sema kece tu ina vanua me drodrova yani na wai me curuma sara na kuliniyagona. E buli vakamatau me domica na wai qai curuma cake e dua na vanua qiqo, ia e sega ni tasova se me dua na idre me vakavuna na kena drodro sobu tale. Na kuliniyagona gona e vaka tu na vutovuto se sipazi.

E kaya o Janine Benyus, na peresitedi ni soqosoqo na Biomimicry Institute, ni kena vakatotomuri na iwalewale ni kumuni wai qori, e vukei ira na idinia mera bulia na ka e rawa ni kauta laivi na katakata me qai curuma na vale na batabata, rawati tale ga kina na wai ni gunu.

Na cava o nanuma? E bula vakaidewadewa se buli na kuliniyagona varovaroa na moko na thorny devil?