Wainimata ena Tavaya

A DRO voli e dua na cauravou. E tagi ena nona yalolailai kei na nona rarawa, mani kerea vua na nona Kalou yalovinaka qai yalololoma o Jiova: “Mo ni vakataloca na wai ni mataqu ki na nomuni tavaya.” (Same 56:8) Na cauravou ya o Tevita, a yaco emuri me tui e Isireli. Ia na tavaya vakacava e tukuna tiko o Tevita, ena rawa vakacava me vakataloca kina na Kalou na wai ni matada?

Sega ni vulagi o Tevita ena tavaya e caka mai na kulinimanumanu. Na tavaya qo e dau tawa kina na wai, waiwai, waini, se bata. O ira na dauveitokiyaki ena Sahara, me vakataki ira na Tuareg, era se vakayagataka tiko ga na tavaya e caka mai na kuli ni me se sipi. Na levu ni wai e rawa ni tawa ena tavaya va qo e vakatau ena kulinimanumanu, e ka lailai se ka levu. Ena batabata vinaka tu ga na wai se mani vakacava sara na katakata ni siga ena vanua dravuisiga. Eliu e dau vakavodoki ena asa se kameli, ia nikua, o na rairai raica ni tu ena muailiu ni lori e cici ena gaunisala cava ga!

Na vosa veivakacegui i Tevita me baleta na tavaya kulinimanumanu e yaga tale ga vei keda. Ena sala cava? E vakamacalataka na iVolatabu ni lewa tu na vuravura qo o Setani qai “cudru vakalevu.” Qori na vuna e sotavi kina e levu sara na ka rarawa e vuravura. (Vakatakila 12:12) Levu era vakataki Tevita, era lomaleqa, vakacaraki nodra vakasama, se rarawa vakayago​—vakauasivi o ira era saga mera vakamarautaki Jiova tiko ga. O dua beka vei ira oqori? Kua ni yalolailai, o ira sara mada ga “na tagi voli” era sega ni soro koso ena nodra saga tiko ga mera yalodina. (Same 126:6) Era nuidei ni sega ni raica ga na Tamadra vakalomalagi na veivakatovolei era sotava, ia e kila tale ga na kena tarai ira. E kila vinaka na rarawa e bikai ira tu nona tamata, qai nanuma na wainimatadra kei na nodra rarawa, e vaka sara ga ni vakataloca ina nona tavaya.