ULUTAGA LEVU | SALA MEDA LEWAI KEDA VINAKA KINA
2 Vorata na Veika ena Vakalatilati ena Nomu Sasaga
O vakatulewataka mo lewa vinaka na ka o kania, ia sa veitemaki dina na irairai ni aisikirimu e toka e matamu.
O vakatulewataka mo sa kua ni vakatavako, ia e solia tale vei iko na tavako e dua na nomu itokani e kila vinaka sara tu ga ni o via muduka na itovo qori.
O nanuma mo vakaukauayago nikua, ia e cakacaka levu tale vei iko mo vaqara na nomu ivava ni tereni!
E tautauvata vakacava na ituvaki kece qori? Io, e tiko eso na ka ena vakarawarawataka se vakadredretaka na noda sasaga meda lewai keda vinaka. Qori e wili kina na ituvaki eda sotava kei ira na noda ilala.
IVAKAVUVULI VAKAIVOLATABU: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”—Vosa Vakaibalebale 22:3.
Eda vakasalataki ena iVolatabu meda dau vakasamataka vakailiu na ka. Ke da cakava qori, eda na kila na veika e rawa ni vakadredretaka se vakarawarawataka noda sasaga meda lewai keda vinaka. (2 Timoci 2:22) Io, e bibi meda vorata na veika e vakalatilati ena noda sasaga.
Vorata na ka e vakadredretaka na nomu sasaga, cakava na ka e vakarawarawataka
KA O RAWA NI CAKAVA
Vorata na ka e vakadredretaka na nomu sasaga. Kena ivakaraitaki, ke o via muduka na nomu kania na kakana kamikamica, me sa kua sara ga ni tiko e vale e dua na kakana va qori. Ena vakarawarawataka ya na nomu sasaga mo vorata na veitemaki ni o raica na kakana kamikamica.
Cakava na ka e vakarawarawataka na nomu sasaga. Kena ivakaraitaki, ke o via vakaukauayago ena mataka, vakarautaka rawa na nomu isulu ni tereni ni bera ni o moce. E dau dredre wale ga mo tekivu muria e dua na ivakarau. Ni sa tekivu rawa, sa na sega soti ni dredre na nomu muria dei na ivakarau qori.
Digia vinaka na nomu itokani. E rawarawa sara na noda vakatotomuri ira na noda itokani. (1 Korinica 15:33) Kua gona ni vakailala kei ira era na uqeti iko tale ena itovo o saga tiko mo valuta. Digi ira na itokani era na uqeti iko ena itovo vinaka.