Cava e Kaya na iVolatabu me Baleta na Vakatevoro?

ERA vakatitiqataka e levu na ka e tukuni me baleta na vakatevoro kei na kaukaua vuni, era kaya ni lasutaki se nodra italanoa buli ga na dau caka iyaloyalo. Ia e duatani na rai ni iVolatabu, e matata na kena ivakasala me baleta na vakatevoro. Kena ivakaraitaki, e tukuni ena Vakarua 18:10-13: “Me kua ni kune vei kemuni . . . e dua e daurairai, e dua e daucakaiba, e dua e dau qara na ivakatakilakila vuni, e dua e daucakaisausau, e dua e dauvakatevoro, e dua e dauvakacuru se dau tukuna na ka se bera ni yaco se dau vakatarogi ira na mate.” Na vuna? E kaya tale na tikinivolatabu ya: “O koya ga e cakava qori e vakasevaki vei Jiova . . . Me dodonu na nomu ivalavala ena mata i Jiova na nomu Kalou.”

Na cava e veivakasalataki kina na iVolatabu me baleta na vakatevoro?

KENA ITEKITEKIVU

Sa tukuni makawa tu ena iVolatabu ni a buli ira e vica vata na milioni na kabula vakayalo se agilosi na Kalou ni bera ni bulia na vuravura. (Jope 38:4, 7; Vakatakila 5:11) A soli kece vei ira na agilosi qori na galala ni vakatulewa, mera digia mera cakava na ka vinaka se ca. Eso vei ira era digia mera talaidredre vua na Kalou, era mani biuta na nodra itutu mai lomalagi mera mai vakatubu ca e vuravura. Qori na vuna e ‘sinai kina ena itovo kaukaua’ o vuravura.—Vakatekivu 6:2-5, 11; Juta 6.

E kaya na iVolatabu ni kaukaua ni nodra veivakamuai na agilosi ca, era sa vakacalai ira kina e levu. (Vakatakila 12:9) Era veiuqeti tale ga mera lai raici eso e nanumi nira kila na veika ena yaco ena veigauna se bera mai.—1 Samuela 28:5, 7; 1 Timoci 4:1.

Era na rairai vakayagataka eso na kaukaua vuni e tu vei ira mera veivuke kina. (2 Korinica 11:14) Ia qori e sega ni inaki dina ni nodra sasaga na agilosi ca, era vinakata ga mera vakamatabokotaki keda na tamata meda kua ni kila na ka dina me baleta na Kalou.—2 Korinica 4:4.

E kaya na iVolatabu ni vakarerevaki na veitaratara kei ira na yalovelavela. Nira vinakata mera imuri i Jisu, na ka dina e uqeti ira “era dau vakayagataka tu e liu na kaukaua vuni mera kumuna na kena ivola e tu vei ira ra qai vakama.” Era sega ni kauaitaka na levu ni ilavo era vakalusia kina.—Cakacaka 19:19, Byington.

E levu nikua era vakatulewataka mera kua ni vakaitavi ena veika vakatevoro, mera cata tale ga na kena ka ni veivakamarautaki. Kena ivakaraitaki, ni se qai yabaki 12 o Mariaa e dau tukuna na veika vinaka se ca ena yaco ena veigauna se bera mai. E dau tuvaimau vei ira na nona icaba e koronivuli. Na kena dau yaco dina na ka e tukuna e vakavuna nona taleitaka na veika vakatevoro.

A nanuma o Maria ni isolisoli ni Kalou vua qori me vukei ira kina eso tale. Ia e kaya: “Au rawa ni tuvaimau ena vukudra eso tale. Au sega ni rawa ni cakava qori ena vukuqu, niu via kila tu na veika ena yaco ena noqu bula ena veigauna se bera mai.”

E vinakata o Maria me saumi nona vakatataro, mani masu vua na Kalou. Era sikovi koya na iVakadinadina i Jiova, a vulica sara na iVolatabu. Sa qai kila o Maria ena ka e vulica ena iVolatabu ni sega ni isolisoli ni Kalou na nona rawa ni tukuna na veika ena yaco ena veigauna se bera mai. E vulica tale ga ni o ira era via veitokani kei na Kalou mera kauta laivi kece na iyaya ni vakatevoro. (1 Korinica 10:21) Na cava e qai yaco? E viritaka kece o Maria na nona iyaya ni vakatevoro, wili kina na kena ivola. Ena gauna qo, sa wasea tiko na ka dina e vulica mai na iVolatabu vei ira eso tale.

Ni se itabagone o Maikeli, e dau taleitaka na wilika na kedra italanoa eso e tu vei ira na kaukaua vuni. E kaya: “Au dau qoroi ira na noqu icaba era talanoataki ena ivola, na ka era rawa ni cakava ena kaukaua vuni e tu vei ira.” Ni toso na gauna, sa tekivu wilika o Maikeli na ivola ni cakaiba kei na vakatevoro. E kaya: “Au via kila na veika e dau vakayacori ena ivalavala va qori, au mani wilika na kena ivola qai sarava na kena iyaloyalo.”

Ia e vulica ena iVolatabu o Maikeli ni bibi me vakalewa vinaka na veika e wilika. E kaya: “Au vakavola na iyaya kece ni vakatevoro e tu vei au qai kauta tani kece. Dua na ka bibi au vulica. E kaya na iVolatabu ena 1 Korinica 10:31, ‘cakava na ka kece me vakalagilagi kina na Kalou.’ Na ka au sa dau taroga ena gauna qo, ‘Vakacava na ka au via wilika qo, au na vakalagilagia kina na Kalou?’ Ke sega, au na sega ni wilika.”

E vakatokai na iVolatabu me cina. E veivakararamataki ena ka dina me baleta na vakatevoro. (Same 119:105) E vakamacalataki tale ga ena iVolatabu nira sa na vakarau yali vakadua mai vuravura na yalovelavela. Dua na veisau levu ena vakila na kawatamata. Kena ivakaraitaki, e kaya na Same 37:10, 11: “Malua mada vakalailai, sa na sega vakadua na daucaka ca, o na rai ena vanua era tu kina e liu, era na yali kina. Ia era na taukena na vuravura na yalomalumalumu, era na kunea na marau vakasakiti ena levu ni vakacegu.”