Na Cava e Takalevu Kina na Vakatevoro?

E tukuni ni vakatevoro oya “na vakabauta ni sa mate na tamata e bula tiko ga na tikina e vakatokai na yalo, ena rawa vua na yalo me veitaratara kei ira na bula ena nona lai tarogi e dua na daucurumi.”

E DUA na ivola e vakamacalataki kina na sala ni veitaratara kei ira na mate e taleitaki sara vakalevu mai Mereke ena 1998. Ena ituvatuva e vakarautaka na New York Times me laurai kina na ivola e volitaki vakalevu duadua, o koya oqo e toka duadua e cake.

Mai Moscow ena vica na yabaki sa oti, sa dua na ka na levu ni ilavo era sauma na daunipolitiki kei na daunibisinisi ena nodra ciciva na nodra soqo ni vakacuru o ira na vakabauta na kaukaua tawarairai kei ira na dauvakatevoro.

Mai Brazil, e vuqa era dau sarava na porokaramu ni soap opera ena retioyaloyalo e lewena na vakatevoro.

E vuqa mai Aferika kei Esia era guta na vakatevoro, na kena taleitaki e vaka ga na veivoli ena makete.

Na Vuna Era Goleva Kina e Vuqa na Vakatevoro

Levu era goleva na vakatevoro mera vakacegui kina ni mate nodra daulomani. Rairai era na rogoca mai vei ira na daucurumi e so na itukutuku e vaka mera tukuna o ira na mate. Yaco kina mera vakabauta nira se bula tiko na nodra daulomani era sa mate, na nodra veitaratara gona kei ira na mate ena rawa ni vakacegui ira.

So tale era goleva na vakatevoro baleta ni tukuni ni o ira na yalo era na vukei ira mera kunea na iwali ni kedra mate, ra galala mai na bula vakaloloma, ena yaco na lomadra nira veivinakati, walia na leqa ni bula vakawati, rawa tale ga kina nodra cakacaka. Vuqa tale era goleva na vakatevoro ena levu ga ni nodra via vakilakila na ka.

Na vuna tale ga era goleva kina e vuqa na vakatevoro me vaka e tukuna e dua e buta vinaka ena tabana oqo, ni vakatevoro e “ikarua ga ni lotu” erau “cici vata ga kei na lotu Vakarisito.” E vakadinadinataki oqo ena ivakarau ni lotu e vakayacori tu mai Brazil.

Ena vuravura kece, e levu duadua na lotu Katolika Vakaroma mai Brazil, ia e tukuna na dauvolavola o Sol Biderman, nira “[sega ni bau] vakila na vica vata na milioni na lewenilotu era dau qacoya na lotu ni cala na nodra dau vakawaqa kadrala ena nodra valenilotu, ra qai lai vakawaqara tale ga ena nodra qaravi tevoro.” E tukuna na Veja, na ivola e dau tabaki vakamacawa ni Brazil, ni 80 na pasede era dau lakova na veivanua ni vakatevoro era papitaiso ena lotu Katolika, ra qai dau lakova tale ga na misa. So sara mada ga na iliuliu ni lotu era vakaitavi ena soqo ni vakatevoro, sa rauta mera nanuma e vuqa na lewenilotu ni vakadonuya na Kalou na nodra veitaratara kei ira na yalo me rawa nira vakacegui mera dusimaki tale ga kina. E dina beka?

[Kato/iYaloyalo ena tabana e 3]

Eso na iWalewale ni Vakatevoro

Na vakatevoro ena rawa ni okati kina na nodra tarogi na daucurumi, na tarogi ira na mate, se na qara ivakatakilakila. E dua na iwalewale ni vakatevoro kilai levu na cakaisausau​—na kena sagai me kilai na veigauna mai muri ena nodra veivuke na yalo. So tale na iwalewale ni cakaisausau na raikalokalo, na vakaraica na polo iloilo, na vakaibalebaletaki ni tadra, na rai qeteqete ni liga, kei na via kila na ka ena yaco mai muri ena tuvaimau.