Dau Veilomani

Vu ni Leqa

E ka ni sasaga meda kua ni veivakaduiduitaki. Me vaka ga na kena taura na gauna kei na sasaga me valuti na matedewa, e va tale ga qori na kena cavuraki laivi na veivakaduiduitaki. O na cavuraka laivi vakacava na nomu dau veivakaduiduitaki?

iVakavuvuli Vakaivolatabu

iYaloyalo: 1. E dolava na katuba e dua na turaga ni Esia vua e dua na turaga yago loaloa e taura tiko na kofi. 2. E lai veisoliyaka sara na turaga yago loaloa qori na kofi vei iratou na cakacaka vata, wili kina na marama ni Idia a vakamacalataki mai liu.

“Moni sulumaka na loloma ni qo na ivau vinaka duadua ni duavata.”—KOLOSA 3:14.

Kena ibalebale Ena vakaduavatataki keda na noda dau yalololoma. O na sega ni vakaduiduitaki ira eso tale ke o lomani ira vakalevu. Na levu ga ni nomu lomani ira, o na sega kina ni cati ira se raicalataki ira.

Ka mo Cakava

iYaloyalo: 1. E vukea tiko e dua na marama ni valagi itabaqase e dua na marama ni Idia me kauta na nona iyaya ni volivoli ena tabavale e cake. 2. E lai solia sara na bisikete na marama ni valagi itabaqase qori vua na turaga ni Esia sa vakamacalataki mai, rau tiko veitikivi.

Vakasamataka na sala o rawa ni vakaraitaka kina na loloma vei ira o sega ni dau taleitaka. O rawa ni cakava eso mada ga na ka lalai. Vakacava mo tovolea mada ga e vica se dua na ka qo:

Nomu vakaraitaka na loloma ena ka kece o cakava, o na sega kina ni veivakaduiduitaki

Vakaraitaka na nomu dokai ira ni o dolava vei ira na katuba se kaya vua me mai dabe ena nomu idabedabe ke oso na basi.
Veitalanoa vakalekaleka kei ira, ke o sega mada ga ni kila vinaka na nodra vosa.
Vosovoso tiko ga ke votivoti vei iko na nodra itovo.
Vakaraitaka ni o kauaitaki ira nira talaucaka mai nodra leqa.