Yalo ni Veivakaduiduitaki—Ena Oti Ninaica?
ENA dua nona vosa vakairogorogo ena 28 Okosita, 1963, a cavuta kina o Martin Luther King Jr., dua na turaga ni Merika e dauvalataka na dodonu ni lewenivanua, ni vakanamata tu ena gauna ena oti kina na yalo ni veivakaduiduitaki vakamatatamata. Na veivosa qori e sega ni baleti ira ga na kai Merika, e baleti ira tale ga na matatamata mai na veivanua.
Ena 20 Noveba, 1963, oti ga e tolu na vula nona cavuta o King na vosa vakairogorogo oya, e sivia e 100 na matanitu era sa muria na lawa a vakatura na Matabose kei Vuravura me baleta na kena Vakawabokotaki na Veimataqali Veivakaduiduitaki Vakamatatamata. Ena tini na yabaki tarava eso tale na matanitu era sa muria tale ga na lawa qori. Na sasaga kece qori e votu kina e dua na taro bibi: Na cava e sa rawati kina?
E kaya na vunivola levu ni Matabose kei Vuravura o Ban Ki-moon ena 21 Maji, 2012: “Sa vakarautaki e levu na veidinadinati vakalawa—vakarautaki tale ga na ituvatuva ena caka e veiyasa i vuravura—me tarovi qai vakaoti kina na veivakaduiduitaki vakamatatamata, nodra cati na vulagi, kei na so tale na mataqali veivakaduiduitaki. Ia era se rarawa ga e vica vata na milioni e veiyasa i vuravura ena vuku ni veivakaduiduitaki vakamatatamata.”
Ena so na vanua sa yaga tiko na sasaga me vakaoti na veimataqali veivakaduiduitaki vakamatatamata. Vakacava na sasaga qori, sa uqeti ira dina na tamata mera cavuraka na yalo ni veivakaduiduitaki se e uqeti ira wale ga mera kua ni vakaraitaka e matana levu? Eso era vakabauta ni sasaga qori e tarova ga na veivakaduiduitaki, ia e sega ni vakaotia se cavuraka na yalo ni veivakaduiduitaki. Na cava na vuna? Na veivakaduiduitaki e laurai ena noda ivalavala qai rawa ni totogitaki vakalawa, ia na yalo ni veivakaduiduitaki, oya na ka eda vakasamataka kei na ivakarau ni lomada, qai dredre meda lewa rawa.
Koya gona, na kena sagai me cavuraki tani na yalo ni veivakaduiduitaki ena sega wale ga ni gadrevi me muduki na ivalavala ni veivakaduiduitaki, ia me veisautaki sara ga na ivakarau ni lomana e dua kei na nona rai me baleta e dua tale na matatamata. Vakacava e rawa ni caka na veisau qori? Ke rawa, ena sala cava? Meda dikeva mada e vica na ivakaraitaki a yaco dina ena vukei keda meda raica ni rawa nira veisau na tamata, kei na ka e vukei ira mera cakava qori.
NA IVOLATABU E CAVURAKA NA YALO NI VEIVAKADUIDUITAKI
Linda: Au sucu e Sauca Aferika. Au dau beci ira na yago loaloa, au raici ira mera sega ni vuli vinaka, sega ni nuitaki, qai nodra tamata cakacaka na yago vulavula. Au sega ni kidava niu bucina tu na yalo ni veivakaduiduitaki. Ia a qai veisau noqu rai niu tekivu vulica na iVolatabu. Au vulica ni “sega ni dau veivakaduiduitaki na Kalou,” e dikeva ga na lomada, sega ni roka ni kuliniyagoda se vosa eda vosataka. (Cakacaka 10:34, 35; Vosa Vakaibalebale 17:3) E uqeti au na Filipai 2:3 meu cavuraka tani na yalo ni veivakaduiduitaki, meu raici ira eso tale mera uasivi au. Niu muria na ivakavuvuli vakaivolatabu qori e vukei au meu kauaitaki ira eso tale veitalia se matatamata cava era cavutu mai kina. Au vakila niu sa sega ni qai bucina na yalo ni veivakaduiduitaki.
Michael: Au susu e Ositerelia ena vanua e kaukaua kina na nodra dau vakaduiduitaki na kai Esia, vakabibi o ira na kai Jaina, qori e vakavuna meu cati ira tale ga. Keu draiva tiko qai raica e dua e vaka na kai Esia, au na biuta sobu na iloilo ni motoka qai kailavaka yani vua eso na vosa veibeci me vaka “Lesu i nomu vanua!” Ia niu tekivu vulica na iVolatabu, au sa qai kila na ivakarau ni rai ni Kalou me baleta na kawatamata. E dau lomani ira kece na tamata se mani vanua cava era cavutu mai kina se na kedra irairai. Na loloma qori e uqeti au sara ga meu vakatotomuria. Au marautaka dina na veisau levu au sa cakava. Au sa marautaka tiko qo na noqu dau veimaliwai kei ira mai na duidui vanua, duidui tale ga nodra isususu. Qori e veisautaka sara ga na noqu rai, qai vakamarautaki au vakalevu.
Sandra: E cavutu o tinaqu mai Umunede e Delta State, e Nigeria. Ia o tamaqu e cavutu mai Edo State qai vosataka na vosa vakaEsan. Ena vuku ni duidui qori, era dau vakalolomataki tinaqu na wekai tamaqu me yacova nona mate. Au mani yalataka niu na sega ni via kilai ira na vosa vakaEsan se vakawatitaka e dua mai na Edo State. Ia a veisau noqu rai niu tekivu vulica na iVolatabu. Ni tukuna na iVolatabu ni sega ni dau veivakaduiduitaki na Kalou qai vakadonui ira era rerevaki koya, e sega gona ni dodonu meu cata e dua tale na yavusa se o ira e duidui na nodra vosa. Au veisautaka noqu rai qai saga meu veimaliwai vinaka tale kei ira na wekai tamaqu. Na noqu muria na ivakavuvuli vakaivolatabu e vakamarautaki au qai vakacegui au. E vukei au tale ga meu veimaliwai vinaka kei ira e duidui na nodra isususu, matatamata, vosa, se vanua era cavutu mai kina. Au vakawatitaka mada ga e dua mai na Edo State e vosataka na vosa vakaEsan!
Na cava e tukuni kina ni vukei ira qori kei na so tale na iVolatabu mera cavuraka na yalo ni veicati kei na veivakaduiduitaki? Baleta ni iVolatabu e Vosa ni Kalou. E rawa ni veisautaka na ivakarau ni nona rai e dua kei na ka e nanuma me baleti ira tale eso. E vakaraitaka tale ga na iVolatabu na sala ena vakaoti kina na yalo ni veivakaduiduitaki.
NA MATANITU NI KALOU ENA VAKAOTIA NA YALO NI VEIVAKADUIDUITAKI
Na iVolatabu e rawa ni tarova qai cavuraka na yalo ca, ia me vakaoti vakadua na yalo ni veivakaduiduitaki ena vinakati me vakawabokotaki e rua na ka e dau veivakamuai. Kena imatai, na ivalavala ca se na noda sega ni uasivi. E tukuna na iVolatabu: “Ni sa sega na tamata e sega ni caka cala.” (1 Tui 8:46) Se mani vakacava na noda sasaga, eda na vakataki koya ga na yapositolo o Paula, e kaya: “Niu via cakava na ka e dodonu, e tiko ga vei au na ca.” (Roma 7:21) Koya gona, ena tiko na gauna ena votu kina na “vakanananu ca” qai rawa ni tini ena yalo ni veivakaduiduitaki.—Marika 7:21.
Kena ikarua, na veivakamuai i Setani na Tevoro. E vakamacalataki koya na iVolatabu me “daulaba,” qai “vakacala tiko na vuravura taucoko.” (Joni 8:44; Vakatakila 12:9) Qori na vuna e takalevu kina na yalo ni veivakaduiduitaki qai sega ni rawa vua na kawatamata me walia na veicati, veivakaduiduitaki, labakawa, kei na so tale na veivakaduiduitaki vakamatatamata, lotu, kei na veileqaleqati vakaveiwekani.
Me vakaoti gona vakadua na yalo ni veivakaduiduitaki, ena vinakati meda taucoko qai uasivi, meda galala tale ga mai na veivakamuai i Setani na Tevoro. E tukuna na iVolatabu ni na vakayacora ga qori na Matanitu ni Kalou.
A vakavulici ira nona imuri o Jisu Karisito mera dau masuta vua na Kalou: “Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:10) Na Matanitu ni Kalou ga ena vakaotia na veimataqali veivakaduiduitaki kece.
Ni sa na veiliutaki e vuravura na Matanitu ni Kalou, ena “vesuki” o Setani me kua ni “vakacalai ira na veimatanitu.” (Vakatakila 20:2, 3) Ena qai dua na “vuravura vou”—vakaibalebaletaka na kawatamata—ra qai “tiko kina na yalododonu.”a—2 Pita 3:13.
O ira na kawatamata yalododonu qori era na bula uasivi, ra qai galala mai na ivalavala ca. (Roma 8:21) Nira sa na vakarurugi ena veiliutaki ni Matanitu ni Kalou, ‘era na sega ni veivakacacani se veivakamatei.’ Na cava na vuna? “Ni na roboti ko vuravura e na veikilai kei Jiova.” (Aisea 11:9) Ena gauna qori, era na vulica na kawatamata kece na ka e vinakata na Kalou o Jiova ra qai vakadamurimuria na nona itovo. Kena ibalebale ni sa na oti vakadua na yalo ni veivakaduiduitaki, “ni sega ni dau veivakaduiduitaki na Kalou.”—Roma 2:11.
a Me ikuri ni ivakamacala me baleta na Matanitu ni Kalou kei na ka ena cakava, raica na wase 3, 8, kei na 9 ni ivola Na Cava Sara Mada e Kaya na iVolatabu? tabaka na iVakadinadina i Jiova.