CAVA MO CAKAVA NI TUBU NA ISAU NI IYAYA?

Mo Lomasavu

O na rairai nanuma ni na dredre mo lomasavu, ke o sega ni vosota rawa na tubu ni isau ni iyaya. Ia ni o soli ka ena vukei iko mo vosota na dredre ni bula vakailavo. E rawa ni o maroroi ilavo, o na lomasavu tale ga.

VUNA MO KAUAI KINA

Ke lailai mada ga na ka eda solia, eda se rawa tiko ga ni marau da qai vakila na kena yaga. E laurai ena dua na vakadidike, na noda dau lomasavu ena vinaka kina na ivakarau ni lomada, kei na noda vakasama. Kena ivakaraitaki, eda na sega ni lomaocaoca vakalevu, nuiqawaqawa, tubu ni dra se momosi ni yago. Eda na moce tale ga vakavinaka.

“E marau vakalevu o koya e solia na ka, vakalailai o koya e taura na ka.”—Cakacaka 20:35.

Ena rawarawa noda ciqoma na veivuke, ke da dau vukei ira eso tale vakailavo se so na ka lalai. O Howard e tiko mai Igiladi, e kaya: “Keirau dau saga vakaveiwatini me keirau lomasavu qai vukei ira eso tale, qori e donu kina neirau rai ni ciqoma na veivuke. O ira na dau lomasavu era sega ni namaka me saumi lesu vei ira na ka. Ia era na kunea kina na itokani dina era tu vakarau mera veivuke ena gauna ni leqa.”

“Moni dau soli ka, ena qai soli vei kemuni.”—Luke 6:38.

KA O RAWA NI CAKAVA

Wasea na ka e tu vei iko. Ke lailai mada ga na ka e tu vei iko, o se rawa tiko ga ni wasea eso na ka. Kena ivakaraitaki, o rawa ni vakarautaka e dua na kakana lailai. E vakaitikotiko o Duncan kei na nona vuvale e Uganda. Ratou dravudravua, ia ratou dau lomasavu. E kaya o Duncan: “Ena vei Sigatabu keitou na sureta e dua me keitou kana vata e vale. Keitou dau taleitaka na veimaliwai kei ira eso tale.”

Ni o soli ka, mo solia ga na ka o rawata. Me kua ni vakavuleqa ena nomu vuvale.—Jope 17:5.

Tovolea qo: Vakarautaka e dua na kakana lailai, se so na kakana mamada (snack). Ke tiko eso na iyaya o sega ni vakayagataka, rawa ni o solia vei ira nomu itokani, se o ira oni tiko veitikivi. Baleta ena rawa ni yaga vei ira, era na vakavinavinakataka tale ga.

Soli ka ena so tale na sala. Eso na iloloma talei e sega ni saumi ena ilavo. Kena ivakaraitaki, o rawa ni solia nomu gauna qai kauaitaki ira eso tale ni o vukei ira. Na vosa mada ga vakayalovinaka e rawa ni dua na iloloma! Tukuna ni o mareqeti ira qai lomani ira.

Tovolea qo: Vukea eso tale ena cakacaka ni vale, ripeataki na iyaya, se volivoli. Vola vei nomu itokani e dua na kad se vakauta ena text, nomu vakavinavinaka se nanumi koya.

Ni o qara tiko ga na sala mo lomasavu kina, o na marau vakalevu ena yaga tale ga.

“Kua. . . ni guilecava na caka vinaka kei na nomuni wasea vei ira tale na so na ka e tu vei kemuni.”—Iperiu 13:16.

Rau vukea tiko na veiwatini e dua na marama itabaqase ena samaki ni lomanibai. E vakarautaka na ti ni rau rekireki tiko.