Yacovi Taina na Leqa

E LAI raici cei tiko beka o Taina? E gade tiko vei ira e so na goneyalewa ni Kenani. Ena marautaka beka na tamana o Jekope? Vakasamataka lesu mada na ka erau dau kaya o Eparama kei Aisake me baleti ira na yalewa ni Kenani.

A vinakata beka o Eparama me vakawatitaka e dua na yalewa ni Kenani o Aisake? Sega. Vakacava o Aisake kei Repeka, rau vinakata me vakawatitaka e dua na yalewa ni Kenani o Jekope? Sega. O kila na vuna?

Baleta nira sokaloutaka na veikalou lasu na kai Kenani. Era sega ni tamata vinaka mera vakawatitaki, ra sega tale ga ni ilala vinaka. Sa rawa sara ga nida kila na vuna e sega ni taleitaka kina o Jekope me lai raici ira tiko na goneyalewa ni Kenani na luvena yalewa.

A qai leqa dina o Taina. O raica na tagane ni Kenani e vakaraici Taina tiko? Na yacana o Sikemi. Dua gona na siga ni se baci gade tale yani o Taina, a vakaukauataki koya me rau moce vata. E cala oqo, baleta ni dodonu ga mera moce vata na tagane kei na yalewa erau sa vakawati. E vakavuleqa sara vakalevu na ka e cakava o Sikemi.

Dua na ka na nodratou cudru na gane i Taina ni ratou rogoca na ka a yaco. Rau taura na nodrau iseleiwau o Simioni kei Livai rau qai lako yani ina koro e tiko kina o Sikemi nira se welewelei tu na lewenikoro. Eratou qai muri mai na vo ni tacidrau me ratou vakamatei Sikemi kei ira na vo ni tagane ena koro. E rarawa dina o Jekope ena ka ca eratou cakava oqo na luvena.

Ia, a tekivu vakacava na leqa oqo? Ena nona dau lai vakailala o Taina kei ira era sega ni muria na lawa ni Kalou. Eda sega ni via vakailala kei ira na mataqali tamata vaka oqori, se vakaevei?