O na Taqomaki ni O Maliwai Ira na Tamata ni Kalou

“Au na vakamolimoli vei kemuni e nai soqosoqo levu.”​—SAME 35:18.

1-3. (a) Na cava ena vakavuna nodra vakaleqai vakayalo eso na lotu vaKarisito? (b) E vei eda na taqomaki kina na tamata ni Kalou?

NIRAU gade voli o Joe kei watina, rau lai nunuva sara e dua na cakau era bini tu kina na ika dui roka qai duidui na kedra levu. Erau toso vakalailai tale yani merau lai sarava vinaka na cakau. Ia na gauna sa titobu kina vakasauri na vanua rau a qalova yani ya, tukuna sara o wati Joe, “Vaka vei au sa rui yawa tale na vanua daru qalova mai.” E tukuna sara o Joe, “kua ni lomaleqa, au kila tiko na ka au cakava.” A nanuma lesu o Joe nona vaqaqa ni oti ga ya, ‘Era sa lako kece e vei na ika?’ Dua na ka nona rere ni raica ni sa vakadodonutaki koya tu mai ena wai titobu e dua na qio. E sega tale ni dua na ka e rawa ni cakava. Ni se vica toka ga na mita na kena yawa, e gole na qio mani yali sara yani.

² E rawa ni malele e dua na lotu vaKarisito ena ituvaki veirawai qo i Setani​—na ka ni veivakamarautaki, na cakacaka, na iyau​—ia e sega ni liaca ni sa torova tiko yani na wai titobu e vakarerevaki. E tukuna kina o Joe, e qase ni ivavakoso, “na ka au sotava, au vakasamataki ira kina na noda ilala. Qalova ga na vanua e sega ni vakarerevaki qai marautaki​—qo ena ivavakoso!” Kua ni qalova na wai titobu, o na yawaka kina na ivavakoso o qai vakaleqai. Ke o sotava ena dua na gauna na ituvaki qo, kusa sara ina ‘wai mamatia.’ Ke sega ena vakaleqai nomu veiwekani kei Jiova.

³ E vakarerevaki dina na vuravura qo vei keda na lotu vaKarisito nikua. (2 Tim. 3:​1-5) E kila o Setani ni sa lekaleka sara nona gauna, qai vakasaqarai ira era sega tu ni qaqarauni me basuraki ira. (1 Pita 5:8; Vkta. 12:​12, 17) Ia e tiko na noda itataqomaki. E vakarautaka o Jiova e dua na vanua ni idrodro vei ira na nona tamata mera taqomaki kina vakayalo​—na ivavakoso vaKarisito.

4, 5. Na cava nodra rai e levu me baleta na veigauna se bera mai, na cava na vuna?

⁴ E yalani na ka era cakava na isoqosoqo era tu qo e vuravura​—me baleta na nodra taqomaki se lomavakacegu na lewenivanua. Na basulawa, ivalavala kaukaua, tubu ni isau ni yaya, kei na vakaleqai ni veika bula e tu wavoliti keda e vakavuna nodra lomaleqataka e levu na nodra bula. O keda kece eda tauvimate da qase tale ga. O ira mada ga na cakacaka, ira na vakavale, ira era vakailavo, kei ira era bulabula tu vakayago, era na vakasamataka tale ga se na vakacava sara mada na dede ni veika qo.

⁵ E levu era sega ni lomavakacegu. E rarawataki ni sega ni dau yaco na nodra namaka e levu mera kunea na vakacegu kei na marau ena nodra bula vakawati se na nodra bula vakavuvale. Ia me baleta na veivakacegui vakayalo, e levu na daulotu era veilecayaki ra qai lomatarotarotaka na yaga ni veidusimaki e caka vei ira. Qo e vu mai na nodra itovo tawakilikili na iliuliu ni lotu kei na nodra ivakavuvuli e sega ni yavutaki vakaivolatabu. Koya gona, era nanuma kina e levu mera sa vakanuinui ga ena veika vakasaenisi, se nodra yalovinaka eso tale, kei na nodra saga mera cakava na ka e donu. E sega ni kidacalataki gona na nodra sega ni yalodei e levu se nodra sega ni via vakasamataka vakatitobu nodra veigauna se bera mai.

6, 7. (a) Na cava e duidui kina nodra rai o ira na qarava na Kalou kei ira na sega ni qaravi koya? (b) Na cava eda na vakarau veivosakitaka?

⁶ E dua dina na duidui levu e laurai vei ira era lewe ni vavakoso vaKarisito kei ira era sega! Eda sotava tale ga na tamata i Jiova na leqa vata ga era sotava tiko na kena vo, ia e duidui na noda rai. (Wilika Aisea 65:​13, 14; Malakai 3:18.) Na cava na vuna? E vakacegui keda na ka e tukuna na iVolatabu me baleta na veika eda sotava tu nikua, da qai kila tale ga na ka meda cakava ni dredre na bula se sotavi na leqa. Qo eda sega ni leqataka kina vakasivia na veika me baleta na gauna se bera mai. Na noda sokalou vei Jiova e taqomaki keda mai na vakasama cala e sega ni vakaivolatabu, na itovo tawakilikili, kei na veika ca e vu mai kina. O ira gona na lewe ni ivavakoso vaKarisito era vakila na vakacegu era sega ni vakila o ira era tiko ena taudaku ni ivavakoso.​—Aisea 48:​17, 18; Fpai. 4:​6, 7.

⁷ E rawa ni yaga eso na ivakaraitaki meda vakananuma kina na nodra taqomaki o ira na qaravi Jiova ni vakatauvatani kei ira na sega ni qaravi koya. E rawa ni uqeti keda na ivakaraitaki qo meda dikeva kina noda vakasama kei na noda itovo, da qai vakasamataka na sala meda muria vinaka sara kina na ivakasala ni Kalou e vakarautaki meda taqomaki kina.​—Aisea 30:21.

“Sa Voleka ni Lako Sese na Yavaqu”

8. Na cava e vinakati mera dau cakava na dauveiqaravi i Jiova?

⁸ Ena itekitekivu ni bula ni kawatamata, o ira era digia mera talairawarawa qai qaravi Jiova era na qarauna mera kua ni veimaliwai voleka kei ira era sega ni qaravi koya ra talaidredre vua. A se vakaraitaka tu mai o Jiova nira na veimecaki o ira era sokalou vua kei ira era muri Setani. (Vkte. 3:15) Nira dei ena ivakavuvuli vakalou na tamata i Jiova, e duidui kina nodra itovo ni vakatauvatani kei ira na tu wavoliti ira. (Joni 17:​15, 16; 1 Joni 2:​15-17) Ia qo e sega ni dau rawarawa. Eso mada ga na dauveiqaravi i Jiova era dau taroga ena so na gauna ke vukutaki nodra dau vakuai ira.

9. Vakamacalataka na ka a sotava o koya a vola na Same 73.

⁹ E dua na dauveiqaravi i Jiova, rairai wekai Esafa a vola na Same 73, a lomatarotarotaka ke a vukutaki se sega na vakatulewa a cakava. A taroga na daunisame se cava era rawaka kina na tamata ca, era marau ra qai vutuniyau, ia o ira na dau sasagataka mera qarava na Kalou era sotava na dredre.​—Wilika Same 73:​1-13.

10. Na cava e bibi kina vei iko na nona lomatarotaro na daunisame?

¹⁰ O bau lomatarotarotaka ena so na gauna na ka vata ga a taroga na daunisame? Ke vaka kina, e sega ni cala ya, kua tale ga ni nanuma ni sa luluqa tiko nomu vakabauta. E levu mada ga na dauveiqaravi i Jiova, wili kina o ira e digia mera vola na iVolatabu a va tale ga ya nodra nanuma. (Jope 21:​7-13; Same 37:1; Jere. 12:1; Apak. 1:​1-4, 13) Koya gona, o ira kece era vinakata mera qaravi Jiova e dodonu mera vakasamataka vakabibi ra qai ciqoma na isau ni taro qo: E ka vinaka duadua noda qarava na Kalou kei na noda talairawarawa vua? Na taro qo e veisemati kei na ile i Setani ena were o Iteni. E baleta sara ga na dodonu ni nona veiliutaki cecere na Kalou. (Vkte. 3:​4, 5) Koya gona, e dodonu meda vakasamataka vakabibi na ka a vakaraitaka na daunisame. E dodonu meda vuvutaki ira na daucaka ca ra qai dokadoka, e vaka mera sega ni sotava tu na dredre? Meda “lako sese” mai na noda qaravi Jiova da qai vakatotomuri ira? Qori sara ga na ka e vinakata o Setani meda cakava.

11, 12. (a) A veisau vakacava nona rai na daunisame, na cava eda vulica kina? (b) O vukei vakacava mo duavata kei na nona rai na daunisame?

¹¹ A veisau vakacava nona rai na daunisame? A tusanaka nona voleka ni vakanadakuya na veika dodonu, ia a qai veisau nona rai ena gauna sa curuma kina na “vale tabu ni Kalou”​—qo nona veimaliwai kei ira era matua vakayalo ena valenisoro, qai vakananuma vakatitobu na inaki ni Kalou. Sa qai matata vua na daunisame ni sega ni vinakata me sotava na ka ena yacovi ira na dau caka ca. E raica rawa ni vanua era mua tiko kina kei na ka era vakatulewataka ena nodra bula, era sa muria tiko kina na “sala titidara.” Na daunisame e kila ni o ira kece na biuti Jiova ni tawakilikili nodra itovo ena vakasauri ga nodra vakarusai “e na ka rerevaki,” ia o Jiova ena tokoni ira era qaravi koya. (Wilika Same 73:​16-19, 27, 28.) E sega ni vakabekataki ni o vakadinadinataka na vosa qori. Na yalo ni nanumi koya ga kei na kena sega ni kauaitaki na lawa vakalou era na rairai galeleta e levu, ia na ca ena vakilai kina ena sega ni drotaki rawa.​—Kala. 6:​7-9.

¹² Na cava tale eda vulica ena ka a yaco vua na daunisame? A taqomaki qai vakavukui ni maliwai ira na tamata ni Kalou. A vakasama vinaka qai vakavukui ni lako ena vanua e sokaloutaki kina o Jiova. Nikua tale ga eda rawa ni kunei ira na daunivakasala vuku da qai marautaka na kakana bulabula vakayalo ena soqoni vakaivavakoso. E tiko gona na vuna vinaka e tukuna kina o Jiova meda dau tiko ena soqoni vaKarisito na nona dauveiqaravi. Eda na uqeti kina da qai vukei meda dau vakatulewa vakayalomatua.​—Aisea 32:​1, 2; Iper. 10:​24, 25.

Digia Vinaka Nomu iLala

13-15. (a) Na cava a yacovi Taina, na cava e vakaraitaka qo? (b) Na cava e itataqomaki kina na noda vakailala kei ira na tacida lotu vaKarisito?

¹³ E dua na ivakaraitaki o Taina na luvei Jekope, a sotava na leqa ni dau vakailala kei ira na sega ni qaravi Jiova. E tukuni ena Vakatekivu ni dau veimaliwai kei ira na goneyalewa ni Kenani ena yasayasa eratou tiko kina vakavuvale. O ira na kai Kenani era sega ni muria na ivakatagedegede ni bula savasava me vakataki ira na sokaloutaki Jiova. E vakadinadinataki ena ka era kunea na dauvakekeli, ni nodra itovo na kai Kenani e vu ni kena takalevu ena nodra vanua na qaravi matakau, itovo tawakilikili, okati tale ga ena nodra sokalou na veiyacovi vakasisila, kei na itovo kaukaua. (Lako 23:23; Vunau 18:​2-25; Vkru. 18:​9-12) Vakasamataka mada na ka e yacovi Taina ena nona dau vakailala kei ira qo.

¹⁴ O Sikemi e dua na itaukei ena vanua o Kenani e tukuni ni “tamata yalovakaturaga vei ira kecega e na mataqali i tamana,” ia ni raici Taina “a sa kauta, ka moce vata kaya, ka vaqasea.” (Vkte. 34:​1, 2, 19) E vakaloloma dina! O nanuma ni a tadra o Taina me vakayacori vua na ka qo? De rairai a via veikilai ga kei ira na itabagone ni vanua ya qai nanuma nira sega ni ca. Ia a cala nona nanuma.

¹⁵ Na cava eda vulica mai na itukutuku ya? Meda kua ni nanuma ni na sega ni yacovi keda e dua na ka ca ke da vakailala kei ira eda sega ni vakabauta vata. E tukuna na iVolatabu ni “ilala ca e vakacacana na itovo vinaka.” (1 Kor. 15:33) Ia ena taqomaki keda na noda vakailala kei ira eda vakabauta vata, e tautauvata noda ivakatagedegede ni itovo savasava da qai lomani Jiova. Ena uqeti keda na veimaliwai va qori meda vuku.​—Vkai. 13:20.

“Oni sa Vakasavasavataki”

16. Na cava e kaya na yapositolo o Paula me baleta eso ena ivavakoso mai Korinica?

¹⁶ E yaga na ivavakoso vaKarisito ena nodra vakasavasavataki ira e levu mai na ivalavala dukadukali. Ena gauna a vola kina na yapositolo o Paula nona imatai ni ivola ena ivavakoso e Korinica, a cavuta na veiveisau era cakava na lotu vaKarisito e kea ena nodra vinakata mera talairawarawa ena ivakatagedegede ni Kalou. Eso era a dau veidauci, era dau qaravi matakau, dau veibutakoci, eso era veimoceri vakamataqali vata, dau butako, dau mateni kei na so tale. A qai tukuna vei ira o Paula, “ia oni sa vakasavasavataki.”​—Wilika 1 Korinica 6:​9-11.

17. E veisautaka vakacava nodra bula e levu na kena bulataki na ivakatagedegede vakaivolatabu?

¹⁷ O ira era sega ni vakabauta era lekata na ivakavuvuli vinaka me dusimaki ira. Era lewa ga na ka era cakava, se ra rawai ena nodra ivalavala dukadukali na tiko wavoliti ira, me vaka era dau cakava tu eliu mai Korinica makawa ni bera nira mai vakabauta. (Efeso 4:14) Na kilaka dodonu ena Vosa ni Kalou kei na nona inaki, e kaukaua qai rawa ni veisautaka nodra bula o ira era muria na ka e tukuni kina. (Kolo. 3:​5-10; Iper. 4:12) E levu vei ira na lewe ni ivavakoso vaKarisito nikua era na tukuna vei iko ni bera nira mai vulica qai ciqoma na ivakatagedegede dodonu i Jiova, era lewa tu ga na ka era cakava. Ia era a sega ni vakacegui se ra marau kina. Era kunea ga na vakacegu ena nodra tekivu veimaliwai kei ira na tamata ni Kalou qai salavata na nodra bula kei na ivakavuvuli vakaivolatabu.

18. Na cava a sotava e dua na itabagone, na cava e vakadeitaka qo?

¹⁸ Ia kena veibasai, eso era veivutunitaka nodra vakatulewataka ena dua na gauna mera biuta na ‘wai mamatia’​—na ivavakoso vaKarisito. E dua na tacida yalewa eda na vakayacani koya o Tanya, e vakamacalataka ni a “susu ena dina,” ia ni yabaki 16 a biuta na ivavakoso me “sauva na veika vakavuravura.” E levu na ka a sotava, ia rua mada ga, na buketeisala kei na vakalutu. E tukuna ena gauna qo: “E dredre ni taqusi na rarawa au vakila ena tolu na yabaki au yawaka tu kina na ivavakoso. Dua na ka au na sega ni guilecava rawa na noqu vakamatea na luvequ e se bera ni sucu. . . . Au via tukuna vei ira na itabagone era nanuma tiko mera lai ‘tovolei’ vuravura mada ga vakalailai: ‘Kua!’ Ena kamikamica ni se qai tekivu ia ena gaga emuri. E sega ni dua na ka ena solia o vuravura, na rarawa ga. Au vakadinadinataka qori niu sa tovolea oti. Moni kabita tiko ga na isoqosoqo i Jiova! Qo na ivakarau ni bula duadua ga e vakavu marau.”

19, 20. Na veitaqomaki cava e vakarautaki ena ivavakoso vaKarisito, ena sala cava?

¹⁹ Vakasamataka mada na ka o na sotava ni o vakanadakuya na vanua ni itataqomaki, na ivavakoso vaKarisito. E levu era a dau cakava tu eso na ka ni bera nira mai kila na dina, era sega ni via vakasamataka tale. (Joni 6:​68, 69) O rawa ni kunea tiko ga na vakacegu o qai taqomaki mai na rarawa kei na vuturi e taka levu tu ena vuravura qo i Setani, ena nomu vakailala kei ira na tacimu vaKarisito. Nomu veimaliwai kei ira o qai tiko wasoma ena soqoni, ena vakadreta tiko ga vei iko ni veivakavukui na ivakatagedegede dodonu i Jiova, ena qai uqeti iko tale ga mo bulataka. Me vakataki koya ga na daunisame, e tiko na vuna mo ‘vakamolimoli kina vei Jiova ena isoqosoqo levu.’​—Same 35:18.

²⁰ E duidui na vuna ena dredre kina vei keda kece na lotu vaKarisito meda yalodina tiko ga. Ena vinakati ga meda dusimaki vakadodonu. Na cava eda rawa ni cakava yadudua se vakaivavakoso ena nodra vukei na tacida ena gauna va ya? Ena veivosakitaki ena ulutaga tarava na sala o rawa ni ‘veivakacegui qai veivakauqeti tiko ga’ kina vei ira na tacimu vakayalo.​—1 Ces. 5:11.

O na Sauma Vakacava?

• Na cava eda vulica ena veika e sotava o koya e vola na Same 73?

• Na cava eda vulica ena ka a yacovi Taina?

• Na cava o rawa ni taqomaki kina ena ivavakoso vaKarisito?

[iYaloyalo ena tabana e 7]

Qalova ga na vanua mamatia, kabita tiko ga na ivavakoso!