Solia Nona iVunau o Jiova

NI OTI e vula rua nodra biuti Ijipita mai na Isireli, era yaco ina Ulunivanua o Saineai, e yacana tale ga o Orepi. Na vanua vata ga oqo a vosa kina o Jiova vei Mosese mai na vunikau kama. Era a tiko kina vakalailai na Isireli.

A cabe ina ulunivanua o Mosese, ra qai wawa toka mai na kena vo. E keri e tukuna kina vei Mosese o Jiova ni vinakata mera talairawarawa vua na Isireli, mera nona tamata digitaki tale ga. Ni lesu ga mai o Mosese, sa tukuna sara vei ira na Isireli na veika e kaya o Jiova. Era kaya na tamata nira na talairawarawa vei Jiova, nira vinakata sara ga mera nona tamata digitaki.

E qai cakava o Jiova e dua na ka levu. E kubou na ulunivanua qai yaco na kurukuru e rogo levu. Sa qai kaya vei ira: ‘O yau o Jiova na nomuni Kalou, au a kauti kemuni mai Ijipita.’ Oti oya e cavuta e dua na ivakaro bibi: ‘Mo ni kua sara ni qaravi ira na kalou tani, o yau duadua ga.’

E ciwa tale na ivakaro se ivunau a solia na Kalou vei ira na Isireli. Nira rere vakalevu era qai kaya vei Mosese: ‘Mo vosa ga, ni keimami sa rui rere de keimami qai mate ni vosa mai na Kalou.’

E kaya tale vei Mosese o Jiova: ‘Mo lako mai vei au ina ulunivanua. Au na solia vei iko e rua na vatu raraba au sa vola tu kina na ivunau mera muria na noqu tamata.’ Sa qai lako tale o Mosese ina ulunivanua, qai tiko kina me 40 na siga kei na bogi.

E levu na nona ivunau na Kalou vei ira nona tamata. E volai ira kece o Mosese. Ia na Kalou sara ga a vola na 10 na ivunau a cavuta e liu qai solia vei Mosese na rua na vatu raraba era volai tu kina.

Era ivunau bibi na iVunau e Tini, era vaka tale ga kina e so na ivunau a solia na Kalou vei ira na Isireli. Dua vei ira na lawa oqo: ‘Mo lomani Jiova na nomu Kalou ena lomamu taucoko, na yalomu taucoko kei na nomu kaukaua kece ga.’ Dua tale: ‘Mo lomana na kai nomu me vaka o lomani iko.’ A kaya na Luve ni Kalou, o Jisu Karisito ni oqo e rua na ivunau levu duadua a solia o Jiova vei ira na nona tamata na Isireli. Eda na qai vulica malua na veika e baleta na Luve ni Kalou kei na nona ivakavuvuli.