Na Kakana Vou

O KILA na cava era tomika tiko oqori na tamata? E mamare qai vulavula, e vaka na tegu cevata na kena irairai. Ia e sega ni tegu cevata, e dua na mataqali kakana.

Se qai oti toka ga e dua na vula mai na nodra biuti Ijipita na Isireli sa ra yaco yani ina vanua liwa. E lailai na kakana e tu kina, ra qai vosa kudrukudru na tamata. Era kaya: ‘E vinaka ga me a vakamatei keimami mai Ijipita o Jiova ni tu kina na kakana keimami vinakata.’

Sa qai kaya o Jiova: ‘Au na vakatauca mai lomalagi na kakana.’ E cakava oqori o Jiova. Ena mataka e tarava nira raica na Isireli na ka vulavula era lulutu tu, era taroga: ‘Na cava beka oqo?’

E kaya o Mosese: ‘Oqo na kakana e solia mai vei kemuni o Jiova mo ni kania.’ Era kaya ni oqo na MANA. Na kena ikanakana e vaka na keke mamare e caka vata kei na oni.

E kaya o Mosese: ‘Ni tomika me rauti kemuni yadudua ga.’ Era dau cakava oqo ena veimataka. E waicala na mana e vo tu ena qele ni katakata mai na siga.

E kaya tale ga o Mosese: ‘Me kua ni dua e maroroya na mana me yacova na siga tarava.’ Ia era sega ni muria e so. O kila na ka a qai yaco? A sinai ena ulo, qai boi ca na mana era a maroroya tu!

Ena ikaono ga ni siga e vakatara kina o Jiova mera tomika e yarua na ivakarau. Me maroroi e so me baleta na siga e tarava, baleta ena sega ni soli na mana ena ikavitu ni siga. Nira maroroya na mana e sega ni boi ca se kune kina na ulo. Oqo e dua tale na cakamana!

Ena loma ni gauna taucoko era tiko kina na Isireli ena vanua liwa e vakani ira tiko o Jiova ena mana.