Na Valelaca ni Sokalou

O KILA se vale vakacava oqo? Oqo na valelaca a vakarautaki me vale ni sokalou vei Jiova. E yacana tale ga na valeniveitavaki. Era a tara na Isireli ni oti ga e dua na yabaki nodra biuti Ijipita mai. O kila se o cei e kaya mera tara na vale oqo?

A tukuna o Jiova na kena itaratara vei Mosese ena gauna a tiko kina mai na Ulunivanua o Saineai. E kaya me tara ga vakarawarawa, baleta me rawarawa tale ga na kena basu qai tara tale. Nira veitokiyaki voli ena veivanua na Isireli, era dau kauta tu ga vata kei ira na valelaca oqo.

Ke o rai ina rumu lailai ena loma ni valelaca, o na ni raica e dua na kato. Oqori na kato ni veiyalayalati. Erau tiko ena muana ruarua e rua na agilosi se jerupi koula. A vola tale na Kalou na iVunau e Tini ena rua na vatu raraba, ni a voroka o Mosese na kena imatai. Erau maroroi tiko ena loma ni kato ni veiyalayalati na vatu oqo. E maroroi tale ga kina na saqa e tu kina na mana. O se nanuma tiko se cava na mana?

O Jiova e digitaki Eroni na tuaka i Mosese me bete levu. E liutaki ira na tamata mera qaravi Jiova. Era bete tale ga na luvena tagane.

Raica mada na rumu levu ni valelaca. E vakaruataki na kena levu na rumu lailai. O raica na kato lailai e lako tiko mai kina na kubou? Oqori na icabocabonisoro, era dau vakama kina na bete na veika boi vinaka. E tiko tale ga na itutu ni cina e vitu na kena cina. E ikatolu ni ka e tiko ena rumu e dua na teveli. E maroroi tu kina e 12 na ibuli madrai.

E dua na boulu se beseni levu e sinai tu kina na wai e tu ena rara ni vale. Era dau vuluvulu kina na bete, ra vuya tale ga kina na yavadra. E tu tale ga na icabocabonisoro levu. Era kama kina na yago ni manumanu me isoro vei Jiova. E tiko sara ena lomadonu ni keba na valelaca ni sokalou, qai wavokita na nodra valelaca na Isireli.