Taro na Dauwiliwili

A lewe beka ga ni kato ni veiyalayalati na rua na vatu raraba, se so tale na iyaya e tu e loma?

A vakatabui ena 1026 B.S.K. na valenisoro a tara o Solomoni. Ena gauna oya “sa sega na ka eloma ni kato, na vatu raraba ruarua ga ka tugana kina ko Mosese mai Orepi, ni sa veiyalayalati ko Jiova kei ira na Isireli, ni ra sa lako tani mai na vanua ko Ijipita.” (2 Veigauna 5:​10) Ia e sega ni dau vaka oqo e liu.

“Ni ra sa lako tani na Isireli mai na vanua ko Ijipita, e na kenai katolu ni vula,” era curuma yani na vanualiwa e Saineai. (Lako Yani 19:​1, 2) Oti oqori a lako cake o Mosese ina Ulunivanua o Saineai, qai soli vua e rua na vatu raraba e volai tu kina na Lawa. E kaya: “Au a . . . siro sobu mai na ulu-ni-vanua, ka tugana na vatu raraba ki loma ni kato ka’u a cakava; a rau sa no kina, me vaka ka vakarota vei au ko Jiova.” (Vakarua 10:⁠5) Na kato e cavuti e ke e sega ni kato ni veiyalayalati, ia na kato kau a vakarota o Jiova vei Mosese me taya, me maroroi kina vakalekaleka na rua na vatu raraba e volai tu kina na Lawa. (Vakarua 10:⁠1) A qai vakarautaki sara na kato ni veiyalayalati ni voleka ni cava na 1513 B.S.K.

Sega ni dede nodra vakabulai mai Ijipita, era sa tekivu vosa kudrukudru na Isireli ena vuku ni kakana. A mani vakani ira o Jiova ena mana. (Lako Yani 12:​17, 18; 16:​1-5) Gauna oqori e vakaroti Eroni kina o Mosese: “Kauta e dua na bilo, ka sova kina e dua na omeri mana, ka viritura e na mata i Jiova, me maroroi me yacova na nomuni tabatamata maimuri.” Na kena itukutuku e kaya: “A sa viritura ko Eroni e na mata ni kato ni vunau [na kato e maroroi kina e so na ivola bibi] me maroroi tu, me vaka ka vakarota vei Mosese ko Jiova.” (Lako Yani 16:​33, 34) Sega ni vakabekataki ni maroroya ena gauna oya o Eroni e so na mana ena dua na bilo, ia a mai wawa tu na kena biu ena mata ni kato ni vunau me yacova ni sa taya oti o Mosese na Kato kau qai biu e loma na rua na vatu raraba e volai tu kina na Lawa.

Me vaka sa cavuti taumada, na kato ni veiyalayalati a qai ta ni voleka ni cava na 1513 B.S.K. E muri sa qai biu ena loma ni kato oya na ititoko i Eroni, ni oti nona vukitani o Kora kei na nona ilala. E cavuta na yapositolo o Paula “na kato ni veiyalayalati . . . sa tu kina na bilo koula sa tawa e na mana, kei nai titoko talega i Eroni o koya sa kubu, kei na vatu raraba ni veiyalayalati.”​​—⁠Iperiu 9:⁠4.

Na mana e dua na isolisoli a vakarautaka na Kalou vei ira na Isireli ena loma ni 40 na yabaki era lako voli kina ena vanualiwa. A mai mudu na vakarautaki ni isolisoli oqori, ena gauna era sa tekivu ‘kania kina e so na vuata ni vanua’ yalataki. (Josua 5:​11, 12) Na inaki ni kena biu na ititoko i Eroni ina kato ni veiyalayalati, oya me ivakatakilakila se ivakadinadina ni nodra talaidredre e so ena vica na yabaki yani e liu. Oqo e dusia ni a tiko ga e kea na ititoko ena gauna era veilakoyaki voli kina ena vanualiwa. E rawa gona ni tukuni ni a kau tani mai na kato ni veiyalayalati na ititoko i Eroni kei na bilo koula e tawa tu kina na mana, ena loma ni dua na gauna ni oti nodra curuma yani na Isireli na Vanua Yalataki, se ni bera ni vakatabui na valenisoro a tara o Solomoni.