Na Daubutako e Isireli

RAICA mada na ka e buluta tiko na tamata oqo ena nona valelaca! Na isulu totoka, dua na uma koula kei na so na tiki ni siliva mai na koro o Jeriko. Na cava e dodonu me caka ena veika e kau mai Jeriko? O se nanuma tiko?

E dodonu mera vakarusai, ia na koula kei na siliva me kau ina valeniyau i Jiova. Eratou talaidredre vua na Kalou na tamata oqo. Eratou butakoca na veika e nona na Kalou. Oqo o Ekani kei iratou na lewe ni nona vuvale. Meda raica mada na ka e qai yaco.

Oti ga nona butako mai o Ekani, a tala o Josua e so na tamata mera lai valuta na koro o Ai. Era a vakadrukai mai. Era moku mate e so ra qai dro na kena vo. E rarawataka vakalevu o Josua qai cuva ina qele me masu vei Jiova: ‘Na cava o ni cakava kina me yaco vei keimami na ka oqo?’

A sauma o Jiova: ‘Tucake mai! Era sa ivalavala ca na Isireli, nira vunia na ka me vakarusai se me kau ina vale i Jiova. Era butakoca e dua na isulu totoka. Au na sega ni vakalougatataki iko me yacova sara na nomu sa vakarusa na isulu vaka kina o koya e cakava lo tiko na ka oqo.’ E kaya o Jiova ni na vakaraitaka vei Josua se o cei na tamata ca oqo.

E soqoni ira vata mai na tamata o Josua qai tukuni Ekani o Jiova. E kaya o Ekani: ‘Au sa ivalavala ca. Au kunea e dua na isulu rairai totoka, na uma koula, kei na tikitiki ni siliva. Ia, niu rui taleitaka vakalevu au mani kauta kina. E bulu tiko ena loma ni noqu valelaca.’

Ni sa kau mai na ka kece a butakoca o Ekani sa qai kaya o Josua: ‘Na cava o vakavuna kina na leqa vei keimami? Raica o Jiova ena sauma vei iko!’ Ra sa qai vakaviriki Ekani kei na nona vuvale na tamata me yacova ni ratou mate kece. E ka ni vuli oqo vei keda se vakacava? Meda kua ni taura na ka e sega ni noda.

Era qai lai valuti Ai tale na Isireli, ni tokoni ira tiko o Jiova e nodra kina na qaqa.