Kitioni kei na 300 Nona Tamata

RAICA mada na ka e yaco tiko e ke! Oqori o ira na sotia ni Isireli. Era cuva sobu tiko e so mera gunu. E tucake voleka tu vei ira na Dauveilewai o Kitioni me vakaraica se ra gunu wai vakacava.

Raica mada vakavoleka na nodra gunu wai tiko na sotia. E so era cuva sara ga qai todrou nira gunu. Ia e dua ga e takiva mai na wai e ligana, me rawa ni raica tiko ga kina na veika era yaco tiko. Oqo e bibi, ni kaya o Jiova vei Kitioni me digi ira era veiraiyaki tiko ena gauna era gunu kina. E kaya na Kalou mera lesu tale na kena vo. Meda raica mada na vuna.

Era se baci leqa tale na Isireli nira sega ni talairawarawa vei Jiova. Era lewai tiko mai vei ira na kai Mitiani, e dredre kina nodra bula. Era kere veivuke vei Jiova na Isireli qai rogoci ira o koya.

E kaya o Jiova vei Kitioni me dua na nodra mataivalu na Isireli. E soqona mai e 32,000 na tamata dauvala. Ia era le 135,000 na mataivalu ni meca. E kaya tale o Jiova vei Kitioni: ‘Sa rui levu na nomu tamata.’ Na cava e kaya kina oqori o Jiova?

Na vuna oqo, ke qaqa o Isireli ena ivalu era na nanuma nira qaqa ga ena nodra kaukaua qai sega ni gadrevi kina na veivuke i Jiova. E kaya gona o Jiova vei Kitioni: ‘Tukuna vei ira era rere tiko mera lesu i vale.’ Ni sa tukuna oti, era lewe 22,000 na nona sotia era lesu tale. E vo ga e 10,000 nona tamata mera na vala kei ira na 135,000 na meca.

Ia rogoca mada! E se baci kaya tale o Jiova: ‘E se rui levu tiko ga na nomu tamata.’ Sa qai kaya vei Kitioni me vakaroti ira na sotia mera lai gunu ena uciwai qai vakasukai ira kece era todrou nira gunu. E yalataka o Jiova: ‘Au na solia vei iko na qaqa kei ira na 300 na tamata era gunu ra qai vakararai tiko.’

Era wasei vakatolu na 300 na tamata i Kitioni ena gauna ni ivalu. Era yadua na davui kei na saqa e tu kina na cina. Ra sa qai mai wavokitaka yani na nodra keba na meca ena lomaloma ni bogi. Oti oya ra sa qai uvuca kece na davui lako vata kei na nodra voroka na saqa, ra qai kailavaka: ‘Na iseleiwau i Jiova kei Kitioni!’ Era yadra cecekala mai na meca ra qai veilecayaki. Era dui dro, mani qaqa kina o Isireli ena ivalu.