Jiova Noda iTokani Voleka Duadua

1. Nida buli meda ucuya na Kalou, na cava eda rawa ni cakava?

“SA UCUI tamana sara ga na gone ya,” qori e dua na ivosavosa eda dau rogoca vakalevu. Io, e levu na gone era ucui nodra itubutubu. Kuria qori, nira dau vakatotomuria ga na gone na nodra itovo na itubutubu. E ivurevure ni bula na Tamada vakalomalagi o Jiova. (Same 36:9) Nida okati meda luvena, eda tautauvata kina kei koya ena levu na sala. Nida buli meda ucuya na Kalou, e rawa kina nida vakasama da qai vakatulewa vinaka, rawa tale ga nida veitokani kei na dua da qai dei kina.​—Vkte. 1:26.

2. Na yavu cava eda rawa ni nona iTokani kina o Jiova?

² E rawa ni noda iTokani voleka duadua o Jiova. E rawa ga qori ena nona lomani keda na Kalou kei na noda vakabauti koya kei Luvena. E tukuna o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) E levu era vakaraitaka nira veiwekani voleka kei Jiova. Meda dikeva mada qo e rua na kena ivakaraitaki.

‘EPARAMA NA NOQU ITOKANI’

3, 4. Na cava e duidui kina na nona veitokani o Eparama kei Jiova ni vakatauvatani kei ira na nona kawa?

³ O Jiova e vakatoka na peteriaki o Eparama, e tubudra tale ga na Isireli me ‘noqu itokani.’ (Aisea 41:8) E vakatokai tale ga o Eparama ena iKarua ni Veigauna 20:7 me itokani ni Kalou. Na cava a dei tu ga kina na nona veitokani na turaga yalodina qo kei na Dauveibuli? Na nona vakabauta.​—Vkte. 15:6; wilika Jemesa 2:​21-23.

⁴ O ira na kawa i Eparama era qai yaco mera matanitu makawa o Isireli, era okati Jiova tale ga me Tamadra qai nodra iTokani. Ia e ka ni rarawa ni a qai tagutuvi na nodra veitokani kei na Kalou. Na vuna? Era sega ni vakaraitaka nira vakabauta na yalayala i Jiova.

5, 6. (a) E yaco vakacava o Jiova me nomu iTokani? (b) Na taro cava meda vakasamataka vakabibi?

⁵ Na levu ga ni ka o vulica me baleti Jiova, ena dei na nomu vakabauti koya, ena titobu tale ga na nomu lomani koya. Vakasamataka tale mada na gauna o kila kina ni a bula dina tiko na Kalou, e dua drau rawa ni veiwekani voleka. O sa vulica tale ga nida sucu ivalavala ca kece ena vuku ni talaidredre i Atama. O mai kila nida yawaka tu na Kalou na kawatamata. (Kolo. 1:21) O sa qai mai kila ni Tamada vakalomalagi e sega ni yawaki keda, e dau kauaitaki keda ga. Nida sa mai kila na sala e vakarautaki kina na isoro ni veivoli i Jisu da qai vakaraitaka nida vakabauta qori, eda sa tekivu veitokani sara ga kina kei na Kalou.

⁶ Nida rai lesu ena gauna qo, eda na rairai taroga: ‘Vakacava sa qai kaukaua tiko ga noqu veiwekani kei na Kalou? Vakacava e veisiga, sa qai kaukaua tiko ga noqu nuitaki Jiova na noqu iTokani voleka, au lomani koya tale ga vakalevu?’ Dua tale a veiwekani voleka kei Jiova ena gauna makawa o Kitioni. Meda dikeva mada qo na nona ivakaraitaki vinaka da qai vakatotomuria.

O JIOVA GA NA VAKACEGU

7-9. (a) Na ka vakatubuqoroqoro cava a sotava o Kitioni, na cava a qai yaco? (Raica na imatai ni iyaloyalo.) (b) Na cava meda cakava meda veitokani kei Jiova?

⁷ Na Dauveilewai o Kitioni a qaravi Jiova ena gauna e tiko yavavala sara tu ga kina o Isireli, qori nira se qai curuma oti ga na Vanua Yalataki. E tukuni ena Dauveilewai wase 6 ni a gole e dua na agilosi i Jiova e Ofira me lai raici Kitioni. Ena gauna qori era leqataki vakalevu e Isireli na kai Mitiani era toka voleka ga. Ya na vuna e sega ni samuta kina na witi ena loma ni were o Kitioni, e cakava ga qori ena ikeli ni waini baleta me vunitaka totolo sara na sorena. E kidacala sara ga ni rairai vua e dua na agilosi qai vakatokai Kitioni me dua e “tamatai valu qaqa.” A taroga o Kitioni se na vakabulai ira o Jiova ena gauna ya, ni a vakabulai ira na Isireli mai Ijipita. Me vaka ni vosa tiko na agilosi ena vukuna na Dauveibuli, e vakadeitaka kina vei Kitioni ni tokoni koya dina tiko o Jiova.

⁸ E lomatarotarotaka tu o Kitioni se na rawa vakacava vua me “vakabulai ira na Isireli mai na ligadra na kai Mitiani.” Na ka e tukuni vua e saumi sara ga kina na nona lomatarotaro: “Au na tiko vakaidina kei iko,” e tukuna o Jiova, “ko na mokuti ira na kai Mitiani me vaka era le dua bauga na tamata.” (Dvei. 6:​11-16) De dua e se lomatarotarotaka tiko ga o Kitioni se na vakayacori vakacava qori, mani via raica sara ga kina e dua na kena ivakatakilakila. Ena veivosaki e volai ena tikinivolatabu qori eda kila kina ni o Kitioni e raici Jiova sara ga me bula dina tiko.

⁹ Na ka a qai yaco tarava e vaqaqacotaka sara ga na vakabauta i Kitioni, e veivolekati tale ga kina kei na Kalou. E vakarautaka sara e dua na kakana qai solia vua na agilosi. E kama vakacakamana na kakana ena gauna e tara kina na ititoko ni agilosi, e kila sara o Kitioni ni matataki Jiova na agilosi ya. E rere sara ga, mani tukuna: “Ulei, na Turaga ko Jiova! ni’u sa qai raica e mataqu dina na Agilose i Jiova”! (Dvei. 6:​17-22) Vakacava na veika e yaco qori, a vakaleqa na nodrau veiwekani o Kitioni kei na Kalou? Sega! A yaco sara ga na kena veibasai. A vinaka tiko ga nona veimaliwai kei na Kalou. Eda kila qori ena yaca e vakatoka kina o Kitioni na icabocabo e vakaduria ena vanua ya​—“Jiova-salomi.” E kena ibalebale vakaIperiu, o Jiova ga na Vakacegu. (Wilika Dauveilewai 6:​23, 24.) Nida vakasamataka vakatitobu na ka e cakava e veisiga vei keda o Jiova, eda kila kina ni iTokani dina o koya. Na levu ga ni noda torova na Kalou ena masu, na levu tale ga ni vakacegu eda vakila, ena kaukaua tale ga kina na noda veitokani kei koya.

O CEI ENA ‘VULAGI ENA VALELACA I JIOVA’?

10. Na cava e tukuni ena Same 15:​3, 5 ni vinakata vei keda o Jiova me rawa nida nona itokani?

¹⁰ Me rawa nida iTokani i Jiova, ena vinakati meda cakava eso na ka. Me vaka ga e volatukutukutaki ena Same 15, e seretaka o Tevita na ka e vinakati vei keda me rawa nida ‘vulagi ena valelaca i Jiova,’ se meda nona itokani. (Same 15:1) Meda raica mada qo e rua na ka e vinakati meda cakava​—noda qarauna na vakaucaca kei na noda dau dina ena ka kece eda cakava. Ena tikina qori, e tukuna kina o Tevita me baleta e dua e vulagi ena valelaca i Jiova: ‘E sega ni vakaucaca na yamena. E sega ni vakadonuya na veivaqumi me beitaki kina o koya e sega ni cala.’​—Same 15:​3, 5.

11. Na cava meda kua kina ni vakaucacataka e dua?

¹¹ E veivakasalataki o Tevita ena dua tale na same: “Tarova na yamemu mai na ca.” (Same 34:13) Ke da sega ni muria na ivakasala vakalou qori eda na rawa ni yawaka na Tamada vakalomalagi e dau cakadodonu. Ni vakaucaca e dua, sa vakaraitaka sara tiko ga na itovo i Setani, na meca levu i Jiova. Na vosa “Tevoro” e yavutaki mai na vosa vaKirisi “dauvakaucaca.” Nida qarauna na ka eda dau tukuna me baleti ira na so tale, ena vukei keda meda veivolekati tiko ga kei Jiova. Sa qai bibi sara meda cakava qori vei ira na tagane era lesi ena ivavakoso.​—Wilika Iperiu 13:17; Juta 8.

12, 13. (a) Na cava meda dau dina kina ena ka kece? (b) Ena tarai ira vakacava eso tale na noda dau dina?

¹² Era kilaitani na dauveiqaravi Jiova mera dau dina, era sega ni dau cakacaka vakatawadodonu. E vola na yapositolo o Paula: “Moni masulaki keitou tiko ga, keitou nuitaka ni savasava na neitou lewaeloma, ni keitou vinakata me keitou dina ena ka kece.” (Iper. 13:18) Nida vakadeitaka meda “dina ena ka kece,” eda na sega ni vakayagataki ira kina vakatani na tacida vakayalo. Kena ivakaraitaki, ke ra cakacaka tiko vei keda eso na tacida vakayalo, eda na vakadeitaka mera qaravi vakatautauvata, da qai saumi ira me salavata kei na veidinadinati eda sa duavata kina. Nida lotu vaKarisito, eda na dina vei ira kece era cakacaka tiko vei keda kei na so tale. Ke da cakacaka tale ga vua e dua na tacida vakayalo, eda na sega ni vakayagataka vakatani na noda veiwekani vakayalo meda lai vinakata kina me levu na ka vinaka me caka vei keda.

¹³ Dua na ka na levu ni ka vinaka era dau tukuna me baleti keda o ira era sega ni iVakadinadina! Kena ivakaraitaki, e raica na dairekita ni dua na isoqosoqo ni taravale, nira dau dina ena ka era tukuna na iVakadinadina i Jiova. E kaya: “Oni dau dei ena ka oni sa veidinadinati kina.” (Same 15:4) Na itovo va qori e vukei keda me dei tiko ga na noda veiwekani kei Jiova. E vakacaucautaki tale ga kina na Tamada vakalomalagi dauloloma.

VUKEA ESO TALE MERA ITOKANI I JIOVA

14, 15. Ena noda cakacaka vakaitalatala, eda rawa ni vukea vakacava eso mera itokani i Jiova?

¹⁴ E levu eda sotava ena cakacaka vakaitalatala era rairai vakabauta ni bula dina tiko na Kalou, ia era sega ni raici koya me dua na iTokani voleka. Eda na vukei ira vakacava? Raica mada na ivakaro i Jisu vei ira na 70 na nona tisaipeli a talai ira yarua mera lai vunau: “Ni oni curu ina dua na vale, moni kaya mada, ‘Me yaco na vakacegu ena vale qo.’ Ke tiko ena vale ya e dua e guta na bula vakacegu, ni vakacegui koya. Ia ke sega, me suka vei kemuni na vakacegu ya.” (Luke 10:​5, 6) Na noda vosa vakayalovinaka e rawa ni uqeta eso mera mai kila na ka dina. Qori ena rairai vakaseavutaka nona veitusaqati e dua, rawa sara kina ni veiciqomi ena dua tale na gauna.

¹⁵ Nida sotavi ira era daulotu se ra dau muria na ivakarau vakavanua e sega ni vakaivolatabu, eda na vosa vakayalovinaka tiko ga vei ira, da qai kauaitaki ira. Eda na kidavaki ira ena marau o ira era gole yani ena soqoni nira sega ni taleitaka na ivakarau ni bula nikua, qori na vuna era via vulica kina e levu na ka me baleta na Kalou eda qarava. E levu na ivakaraitaki vinaka era dau tabaki ena ulutaga “E Veisautaka na Bula na iVolatabu.”

CAKACAKA VATA KEI NA NODA ITOKANI VOLEKA

16. Sala cava eda rawa ni okati kina meda itokani i Jiova da qai ‘cakacaka vata’ kei koya?

¹⁶ E vakalevu mera dau lai veitokani vinaka o ira era cakacaka vata. O ira kece era yalataki ira vei Jiova era okati mera nona itokani, era ‘cakacaka vata’ tale ga kei koya. (Wilika 1 Korinica 3:9.) Io, nida vakaitavi ena cakacaka vakavunau kei na veivakatisaipelitaki, eda na qai kila vinaka nona itovo talei na Tamada vakalomalagi. Eda na raica na sala e veivuke kina na yalona tabu meda vakayacora na noda ilesilesi meda vunautaka na itukutuku vinaka.

17. E laurai vakacava ena kakana vakayalo e dau vakarautaki ena noda soqo ni tikina kei na soqo lavotaki ni noda iTokani o Jiova?

¹⁷ Nida vakaitavi vakalevu ena cakacaka ni veivakatisaipelitaki, eda na vakila tale ga nida volekati Jiova. Kena ivakaraitaki, eda na raica na sala e dau tarova kina o Jiova nodra sasaga na dauveitusaqati. Rai lesu mada ena vica na yabaki sa oti. Eda sa raica tiko mai na sala e dau dusimaki keda kina na Kalou, se vakaevei? Eda qoroya na kena vakarautaki tiko ga mai na kakana bulabula vakayalo. E laurai ena porokaramu ni soqo ni tikina kei na soqo lavotaki ni kila vinaka tu na Tamada vakalomalagi na noda leqa kei na ka eda gadreva. E vola e dua na vuvale na nodratou ivola ni vakavinavinaka me baleta e dua na soqo ni tikina: “E uqeti keitou vakalevu na porokaramu. Keitou vakila sara ga na levu ni nona lomani keda yadudua o Jiova, e vinakata tale ga meda kua ni vakaleqai.” E dua na veiwatini mai Jamani rau a gole ena dua na soqo ni tikina lavotaki e Ailadi, rau vakavinavinakataka na nodrau kauaitaki kei na nodrau qaravi mai kea. Erau tomana: “Ia keirau vakavinavinakataki Jiova sara vakalevu kei na nona Tui o Jisu Karisito. Ena nodrau veisureti, keirau mai lewena kina e dua na matatamata era dau duavata. Eda sega ni tukuna wale ga na duavata, ia eda vakila sara tiko ga e veisiga. Na ka keirau sotava ena soqo ni tikina lavotaki e Dublin, e uqeti keirau me keirau kua ni guilecava ni ka dokai meda qarava vata na Kalou cecere.”

ERA DAU VEIVOSAKI NA ITOKANI

18. Na cava eda rawa ni taroga me baleta na noda dau veivosaki kei Jiova?

¹⁸ Ni vinaka na veivosaki, sa na qai dei ga na veitokani. Sa vakayagataki sara vakalevu nikua na sala ni veikilai ena Internet kei na vakau itukutuku ena mobail. Ia eda na vakatauvatana vakacava qori kei na noda dau veivosaki kei na noda iTokani voleka duadua o Jiova? E ‘daurogo masu’ o koya. (Same 65:2) Ia e vakacava na wasoma ni noda dau vosa vua?

19. Na cava e rawa ni vukei keda ke dredre meda dau talaucaka na lomada vua na Tamada vakalomalagi?

¹⁹ Eso na dauveiqaravi ni Kalou era raica ni dredre mera dau talaucaka na lomadra. Ia e vinakata o Jiova meda talaucaka na lomada nida masu. (Same 119:145; Lele 3:41) Ke dredre mada ga mo talaucaka na ka e tu e lomamu, e tiko na ka e rawa ni vukei iko. E vola o Paula vei ira na lotu vaKarisito e Roma: “Ni so na gauna eda lecava na ka meda masulaka ena levu ni vusolo ni lomada, ena qai vakamamasu ena vukuda na yalo tabu. Ia o koya e kila na lomada e kila na ibalebale ni ka e tukuna na yalo tabu, baleta ni ka e kerea ena vukudra na yalosavasava e salavata kei na loma ni Kalou.” (Roma 8:​26, 27) Nida vakasamataka vakatitobu na ivola ena iVolatabu me vaka na Jope, Same, kei na Vosa Vakaibalebale, ena uqeti keda meda talaucaka na lomada vei Jiova.

20, 21. E veivakacegui vakacava na ka e tukuna o Paula ena Filipai 4:6,7?

²⁰ Nida sotava na ituvaki dredre, e vinaka meda muria na ivakasala uqeti vakalou i Paula vei ira e Filipai: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.” Io, e veivakacegui qai veivakayaloqaqataki ni rawarawa meda veivosaki kei na noda iTokani voleka. E tomana kina o Paula: “Ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Fpai. 4:​6, 7) Meda vakamareqeta mada ga na “vakacegu ni Kalou” e sega ni vakatauvatani rawa, qori ena taqomaka dina ga na lomada kei na noda vakasama.

²¹ E vukei keda na masu meda bucina na veiwekani vinaka kei Jiova. Koya gona, meda “kua ni cegu ena masu.” (1 Ces. 5:17) Me vaqaqacotaka mada ga noda veiwekani talei kei na Kalou na ulutaga qo, da qai nakita dei meda muria nona ivakatagedegede dodonu. Me tiko tale ga na gauna meda dau vakasamataka kina vakatitobu na veivakalougatataki eda sa vakila tiko baleta ni o Jiova dina ga e Tamada, noda Kalou qai noda iTokani.