Veivakavulici o Jisu ena Ulunivanua

E DABE toka oqo o Jisu qai veivakavulici tiko ena dua na ulunivanua e Kalili. Eratou dabe volekati koya tiko na nona tisaipeli. Sa digitaki iratou oti e 12 me ratou nona yapositolo. O iratou na yapositolo eratou tisaipeli nuitaki i Jisu. O kila na yacadratou?

E dua o Saimoni Pita kei Adriu na tacina. Dua na veitacini o Jemesa kei Joni. E rua tale na yapositolo o Jemesa kei Saimoni. E yacadrau e rua o Jutasa. E dua o Jutasa Isikarioti, kei na dua tale na Jutasa, e dau kacivi me o Cateo. Tarava o Filipi kei Nacanieli (e dau kacivi tale ga me o Pacolomiu), kei na rua tale o Maciu kei Tomasi.

Ni lesu mai Samaria o Jisu sa qai tekivu vunautaka na veika oqo: ‘Sa voleka na matanitu vakalomalagi.’ O kila se cava na matanitu oya? E matanitu dina ni Kalou. E kena tui o Jisu. Ena vakatulewa mai lomalagi qai kauta mai na bula vakacegu ena vuravura. Na matanitu ni Kalou ena veisautaka na vuravura taucoko me dua na parataisi totoka.

E vakavulici ira tiko oqo o Jisu me baleta na matanitu oya. E vakamacalataka: ‘Mo dou qai masu vaka oqo. Tama i keimami mai lomalagi, me rokovi na yacamuni. Me yaco mai na nomuni matanitu. Me caka na lomamuni e vuravura, me vaka sa caka tiko mai lomalagi.’ Era kaya e levu ni oqo na ‘Masu ni Turaga.’ Vakaevei, o rawa ni cavuqaqataka?

E vakavulici ira tale ga o Jisu ena nodra itovo ni veimaliwai. E kaya: ‘Cakava vei ira tale e so na ka vata ga o vinakata mera cakava vei iko.’ O sega li ni vinakata me dau caka tale ga vei iko na ka vinaka? E kaya o Jisu ni dodonu meda dau caka vinaka vei ira kece ga na tamata. Sa na bau dua na ka totoka nira sa na vakayacora oqo na tamata kece ena parataisi e vuravura.