Wase e 34

Digitaki Iratou na Nona i Apositolo

SA RAUTA ni oti oqo e dua veimama na yabaki mai na gauna a tukuna yani kina ko Joni na Dauveipapitaiso ni Lami ni Kalou ko Jisu ka tekivu vakayacora talega ko Jisu na nona cakacaka vakaitalatala ena matana levu. Ena gauna oqori, eratou sa mai sevu ni nona tisaipeli ko Adriu, Saimoni Pita, Joni, ko Jemesa tale beka ga (na taci Joni), ko Filipi talega kei Nacanieli (e vakatokai me ko Pacolomiu). Sa qai yaco na gauna me ra lewe vuqa tale era mai tomani iratou ena nodra muri Karisito.

Sa vakarau oqo me digitaki iratou na nona i apositolo ko Jisu. Me ratou nona i tokani voleka sara o iratou oqo, ena lavotaki na nodratou tuberi. Ia ni bera nona digitaki iratou, a lako yani ko Jisu ki na dua na ulunivanua ka masu voli e kea ena loma ni bogi taucoko, rairai a kerea na vuku kei na veivakalougatataki ni Kalou. Ni sa siga na vanua, sa qai kacivi ira mai na nona tisaipeli ia mai na kedra maliwa sa qai digitaki iratou na lewe 12. Me vaka ni ra na gonevuli tikoga i Jisu era vakatokai talega me ra tisaipeli.

Na lewe ono a digitaki iratou ko Jisu ka cavuti mai cake na yacadratou, eratou a i sevu ni nona tisaipeli. Ko Maciu a kaciva ko Jisu mai na nona vale ni volavola ni kumuni i vakacavacava a digitaki talega. Na lewe lima tale eratou a digitaki ko Jutasa (na yacana talega ko Catea), ko Jutasa Isikarioti, Saimoni na kai Kenani, Tomasi kei Jemesa na luve i Alifio. E vakatokai talega ko Jemesa oqo me ko Jemesa Lailai, ena bulicaki lailai beka ni yagona se gone ena yabaki ni nona bula mai vei Jemesa na i apositolo ka dua.

Me yacova mai oqo eratou sa mai tiko dede vakalailai kei Jisu na lewe 12 oqo, ka kilai iratou vinaka ko Jisu. Eratou wekana vakayago e so vei iratou. Ko Jemesa kei Joni na tacina e rairai rau tavalei Jisu. Ko Alifio e rairai taci Josefa, na tama i Jisu vakacabecabe. O koya gona, ena tavalei Jisu talega na i apositolo ko Jemesa, na luve i Alifio.

E macala ni sega ni leqataki vei Jisu me daunanuma na yacadratou na nona i apositolo. Ia o rawa li ni nanumi iratou? Sa vinaka, mo nanuma tiko ni rau lewe rua na yacadrau ko Saimoni, lewe rua e yacadrau ko Jemesa, ka lewe rua na Jutasa, ia ko Saimoni na tacina ko Adriu, kei Jemesa na tacina ko Joni. Oqori na sala mo nanumi iratou kina na lewe walu na i apositolo. O iratou na vo ni lewe va e dua vei iratou na daukumuni i vakacavacava (Maciu), e dua a yaco e muri me via vakatitiqa (Tomasi), e dua a kacivi mai na ruku ni vunikau (Nacanieli), kei Filipi na nona i tokani.

E lewe tinikadua vei iratou na i apositolo eratou lako mai Kalili, na vanua i Jisu. E lako mai Kena ko Nacanieli. Ko Filipi, Pita, kei Adriu eratou lako mai Peciseita, ko Pita kei Adriu e rau qai toki e muri ki Kapenaumi, na kena i rairai ni vakaitikotiko voli mai kea ko Maciu. Nodrau cakacaka na dauqoli ko Jemesa kei Joni ka volekati Kapenaumi beka na vanua e rau vakaitikotiko kina. E kena i rairai ni apositolo duadua ga mai Jutia ko Jutasa Isikarioti, a qai yaco e muri me soli Jisu yani. Marika 3:13-19; Luke 6:12-16.

▪ O cei vei iratou na i apositolo eratou rairai weka i Jisu vakayago?

▪ O cei o iratou na i apositolo i Jisu, ia e rawa ni o nanuma vakacava na yacadratou?

▪ Na vanua cava eratou dui cavu tu mai kina na i apositolo?