Ena Ulunivanua ni Veiolive

OQO o Jisu kei na va na nona yapositolo ena Ulunivanua ni Veiolive. Erau veitacini o Adriu kei Pita, vaka tale ga kina o Jemesa kei Joni. O rawa tale ga ni raica na valenisoro ni Kalou e Jerusalemi ni toka mai dakudratou.

Se qai oti ga e rua na siga na nona a vodo asa yani o Jisu i Jerusalemi. Oqo me se qai mataka ni Tusiti, a lai tiko o koya ena valenisoro. Era via vakamatei koya e kea na bete. Ia era rere tale baleta nira taleitaki Jisu na lewenivanua.

E vakatokai ira na iliuliu ni lotu oqori o Jisu ‘mera gata kei na luve ni gata!’ Qai kuria tale ni na totogitaki ira na Kalou ena vuku ni veika ca kece era cakava. Oti oya sa qai lako cake ina Ulunivanua ni Veiolive. E keri, ratou sa qai vakatarogi koya na va na yapositolo oqo. O kila na cava eratou taroga tiko?

Eratou taroga tiko na veika ena qai yaco mai muri. Eratou kila ni na qai vakaotia na veika ca kece e vuravura o Jisu. Ia eratou via kila se na yaco ni naica. Na gauna cava ena lesu mai kina o Jisu me veiliutaki vakatui?

E kila tu o Jisu nira sa na sega tale ni raici koya na nona imuri era tiko e vuravura ena gauna e lesu mai kina. Baleta ni sa na tiko mai lomalagi, ra qai sega ni raici koya rawa. Sa qai tukuna o Jisu e so na ka ena yaco tiko e vuravura ni sa na veiliutaki vakatui mai lomalagi. Na cava beka e so na ka oqo?

E kaya o Jisu ni na yaco na ivalu lelevu, levu na tamata era na tauvimate qai waloloi, ena tubu na ivakarau ca, kei na uneune lelevu. E kaya tale ga ni na vunautaki na itukutuku vinaka ni matanitu ni Kalou ena vuravura taucoko. Eda sa raica beka ni sa yaco tiko ena noda gauna na veika oqo? Io! Oqori e sa vakadeitaka vei keda ni sa veiliutaki tiko mai lomalagi o Jisu. Sega ni dede sa na mai muduka na veika ca kece e vuravura.