Na Gone Tagane a Moce Lutu

ISA! Na cava sa yaco tiko oqo? E mavoa bibi beka na gonetagane sa davo tu oqori? Raica! E dua vei ira na curu tiko mai tuba o Paula! O raici Timoci tale ga? E lutu beka mai na katubaleka na gonetagane oqo?

Io, oqori sara ga na ka a yaco. A vunau tiko o Paula vei ira na tisaipeli mai Tiroa. E kila o koya ni na sega ni raici ira tale ena dua na gauna balavu, ni sa na soko yani ena mataka. E vunau tiko ga me yacova sara na bogilevu.

Na yaca ni gonetagane oqo o Utiko, a dabe volekata na katubaleka, mani moce sara qai lutu mai na tabatolu e cake! Sa rauta mera taqaya o ira na tiko e kea. Nira keveti koya cake, era sa kila tu ga ni sa mate.

Ni raica o Paula sa mate na gone, a davoci koya qai mokota. E kaya: ‘Dou kua ni taqaya. Sa vinaka tale o koya.’ Qai dina sara! Oqo ga na cakamana! E vakabulai koya o Paula! Sa dua na ka nodra reki na tu e kea.

Era lai kana kece tale ina tabavale e cake. E vunau tiko ga vei ira o Paula me yacova na mataka lailai. Macala tu ga ni na sega ni via moce tale o Utiko! Oti sa qai vodo ena waqa o Paula, o Timoci, kei ira na nodrau ilawalawa. O kila na vanua era soko kina?

Se qai vakacavara ga o Paula na ikatolu ni nona ilakolako vakaulotu, ia oqo sa lesu tale i nona itikotiko. Ena ilakolako oqo, e lai yabaki tolu kina o Paula i Efeso. E ilakolako balavu sara ni vakatauvatani kei na ikarua ni nona ilakolako.

Ni biuti Tiroa, a mai kele vakalekaleka na waqa e Milito. Me vaka ni vica ga na kilomita na yawa kei Efeso, e mani kacivi ira kina na qase ni ivavakoso e kea mera lako yani i Milito, ni oqo e sa na iotioti tale ga ni gauna me na vosa kina vei ira. Ni sa seredali na waqa, sa dua na ka na nodra luluvu ni sa lako o Paula!

Sa qai soko lesu na waqa i Sisaria. Ni vakaicili tiko o Paula ena vale i Filipi, e vakasalataki koya sara o Akapo na parofita. E kaya ni na lai vesu o Paula ni yaco yani i Jerusalemi. A qai yaco dina oqori. Ni oti ga na rua na yabaki nona vesu tu mai Sisaria, sa qai kau o Paula i Roma me lai lewai vei Sisa na iliuliu kei Roma. Meda raica mada se cava a yaco ena ilakolako oqo i Roma.