Vakavulica na Luvemu
Gauna Meda Kua Kina ni Moce
O RAIRAI kila ni bibi mo yadra tiko ena gauna ni vuli. Levu era dau via moce ena gauna ni vuli, ia e dodonu mo yadra tiko mo kila na ka e vulici. De dua o dau lako i lotu mo vulica kina na iVolatabu.
Na cava o rawa ni cakava mo yadra tiko kina?—a Dua, moce vakayakavi. O rawa ni moce tale ga vakalailai ena sigalevu. A moce e dua na gone ni a vunau tiko na yapositolo o Paula ena dua na bogi. Wilika na Cakacaka wase 20, tikina e 7 ina 12, mo kila na ka a yaco kei na ka eda vulica kina.
A sikova tiko o Paula na ivavakoso ena siti o Tiroa. E tukuna na iVolatabu “ni . . . na biubiu ena siga e tarava” ena waqa. A mani vunau o Paula “yacova sara na lomalomanibogi.” E tomana na iVolatabu: “E dabe volekata toka na katubaleka e dua na cauravou na yacana o Utiko ena gauna e vunau tiko kina o Paula. E lutu sara na nona moce.” Na cava qai yaco?—
A lutu mai na katubaleka ena “ikatolu ni tabavale” o Utiko. E cici vakatotolo ina tabavale e ra o Paula kei na so tale. Sa davo matemate tu o Utiko! O rawa ni raitayaloyalotaka na nodra rarawa?— E kaya na iVolatabu ni keveti Utiko o Paula qai mokoti koya. Oti ga vakalailai e kaya ena marau o Paula: “Ni kua ni qoqolou, sa bula tale o koya!” A vakabulai Utiko na Kalou!
Na cava eda vulica me baleta na Kalou ena ka e yaco vei Utiko?— E rawa vua na Tamada vakalomalagi o Jiova me vakabulai ira na mate, wili kina o ira na gone. Io, o Jiova e uasivi rau na nomu itubutubu ni kilai iko vinaka cake qai levu cake na nona lomani iko. A vakaraitaka na itovo nei Tamana o Jisu ni bula voli e vuravura, ena nona keveti ira na gonelalai qai vakalougatataki ira. A vakaturi ira tale ga na gone wili kina e dua na goneyalewa yabaki 12.
Na cava o nanuma me baleta na nona lomani iko na Tamamu vakalomalagi?— Io, me uqeti keda qori meda lomani Jiova da qai muria na ka e tukuna. O na vakaraitaka vakacava ni o lomani koya?— Ena nomu tukuna sara ga ni o lomani koya. A tukuna o Jisu: “[Au] lomani Tamaqu.” Ia a sega ni tukuna wale ga ni lomana na Kalou, a vakaraitaka sara ga ena veika e cakava.
A talairawarawa o Jisu vua na Kalou, ni a kaya: “[Au] dau cakava na ka e vinakata.” Ke da cakava tale ga qori, eda na vakamarautaki Jiova kei na Luvena o Jisu nida saga vagumatua meda kua ni moce ena gauna e gadrevi meda yadra tiko kina.
Wilika ena Nomu iVolatabu
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.