iVavakoso vaKarisito ena iMatai ni Senitiuri

Ena Penitiko ni 33 S.K., e sobuti ira na le 120 na tisaipeli i Jisu na yalo tabu, ra qai kacivaka sara yani ena vica na vosa na cakacaka veivakurabuitaki ni Kalou. E tauyavu sara ga e kea na ivavakoso vakarisito. Era papitaiso ena siga oya e rauta ni le 3,000 na tisaipeli vou.​—Cakacaka, wase 2.

E tubu me levu na ivavakoso ena dui vanua nira tukuna tiko ga yani ena doudou na Vosa ni Kalou na yapositolo kei na so tale. Me vaka e volai ena ivola na Cakacaka, e mani tete na cakacaka vakavunau ina yasayasa na Mediterranean, mai Papiloni kei Aferika i cake, yaco i Roma, qai kena irairai tale ga i Sipeni sara.​—Roma 15:18-29; Kolosa 1:23; 1 Pita 5:13.

Ena vanua ga era kune kina o ira na qai yaco mera tisaipeli, e tauyavu sara na ivavakoso. Era lesi mera qase se ivakatawa na tagane matua era rawata na kena ivakatagedegede, mera tubera na ivavakoso ena ivakavuvuli dodonu, mera raica tale ga me kune tiko ga kina na ivalavala kilikili. Ia era sega ni vaka voli e dua na ilawalawa italatala era wasei tani mai na ivavakoso; era italatala ra qai matacakacaka vata ga ni Matanitu ni Kalou.​—Cakacaka 14:23; 20:28; 1 Korinica 3:5; 5:13; Kolosa 4:11; 1 Timoci 3:1-15; Iperiu 13:17; 1 Pita 5:1-4.

Era vakaitavi mera dua na ilawalawa dauvakatulewa na yapositolo kei ira tale e so era cakacaka vata vakavoleka. Era liutaka sara ga na ilawalawa oqo na cakacaka vakavunau. Era walia na leqa e dau tubu mai na ivavakoso era tu e Jerusalemi. Era talai ira yani na veitacini tagane matua i Samaria kei Anitioki mera vakaukauataki ira na vakabauta vou e kea. Era walia na veileti me baleta na cili, ra qai vakauta ina ivavakoso kece na ka sa vakatulewataki. Ia era sega ni lewai ira na tani na tagane oqo, era nodra dauveiqaravi ga ra qai matacakacaka vata kei ira kece na lewe ni ivavakoso.​—Cakacaka 4:33; 6:1-7; 8:14-25; 11:22-24; 15:1-32; 16:4, 5; 1 Korinica 3:5-9; 4:1, 2; 2 Korinica 1:24.

Era kilai na tisaipeli taumada mera lotu Vakarisito. Na yaca oya e vu vakalou. Era dau kilai tani tale ga ena nodra ivakavuvuli; e vakatokai me nodra ivakavuvuli na yapositolo, se ivakarau ni vosa dina. Na ivakavuvuli vakaivolatabu oqo e dau kilai tale ga me ka dina.​—Joni 17:17; Cakacaka 2:42; 11:26, VV; Roma 6:17; 1 Timoci 4:6; 6:1, 3; 2 Timoci 1:13; 2 Pita 2:2; 2 Joni 1, 4, 9.

Era vauci vata ena loloma ra qai dua ga na ilawalawa mataveitacini e vuravura. Era dau kauai ena kedra ituvaki na tacidra era lewe ni so tale na matanitu. Nira siko vanua, ra dau ciqomi ena nodra vale era vakabauta vata. E tu sara ena dua na ivakatagedegede e cake na vinaka ni nodra itovo, nira tamata savasava era wasei tani mai vuravura. Era dau vakasamataka tiko ga na siga i Jiova ra qai kacivaka yani ena lomakatakata na nodra vakabauta.​—Joni 13:34, 35; 15:17-19; Cakacaka 5:42; 11:28, 29; Roma 10:9, 10, 13-15; Taito 2:11-14; Iperiu 10:23; 13:15; 1 Pita 1:14-16; 2:9-12; 5:9; 2 Pita 3:11-14; 3 Joni 5-8.

Ia me vaka sa parofisaitaki, e tekivu cadra na vukitani levu ena ikarua kei na ikatolu ni senitiuri. E tubu kina na lotu lelevu era sega ni savasava tiko ga me vakataki ira na ivavakoso vakarisito taumada, oqo ena ka e baleta na ivakavuvuli, itovo, ituvatuva vakaisoqosoqo, kei na nodra itutu ena veika vakavuravura.—Maciu 13:24-30, 37-43; 2 Cesalonaika wase 2.

E parofisaitaka o Jisu ni na yaco me vakatikori tale na sokalou dina ena ivakataotioti ni ivakarau ni veika. Era vakabauta na iVakadinadina i Jiova ni rawa ni laurai na veivakatikori oqo ena nodra cakacaka e roboti vuravura ena noda gauna oqo, ni oti e 1,900 na yabaki mai na nona parofisaitaka o Jisu. Na veitaqana e tarava ena vakamacalataka na vuna.

• E tauyavu vakacava na ivavakoso vakarisito, e qai tubu vakacava?

• E cicivaki vakacava na ivavakoso oya?

• Na cava soti e vakatakila nira duatani na lotu Vakarisito ena imatai ni senitiuri?

[Mape ena tabana e 7]

(Raica tale na ivola)

Wase Loa

Caspian Sea

Great Sea

Wasa Damudamu

Persian Gulf

Na vanua e so e vunautaki kina na itukutuku vinaka ena imatai ni senitiuri

ITALI

Roma

KIRISI

MELITA

KIRITI

SAIPURUSI

PICINIA

KALATIA

ESIA

KAPATOSIA

SILISIA

SIRIA

ISIRELI

Jerusalemi

MESOPOTAMIA

Papiloni

Era mai vakabauta eso ena yalava oqo

ILIRIKO

MITIA

PARICIA

ILAMA

ARAPEA

LIPEA

IJIPITA

ICIOPEA

[iYaloyalo ena tabana e 7]

Era vunautaka na Vosa ni Kalou ena doudou na lotu Vakarisito taumada

Era dau ciqomi na lotu Vakarisito ena nodra vale era vakabauta vata ena vanua cava ga era siko voli kina