iVavakoso e Uqeta na Veilomani kei na Duavata

De o sa lako oti ena vica na nodra soqoni vakaivavakoso na iVakadinadina i Jiova volekata na vanua o tiko kina. O ira o sota kaya e kea, era lako mai na duidui ituvaki ni bula, e so era vakavuvale, e so era dawai, na qase kei na gone. Era duavata ena nodra sokalou, ra qai vinakata mera veivuke.

Nira dau lako vata mai e dua na iwiliwili tamata levu era gadreva mera cakacaka vata, e vinakati kina e so mera raica na cicivaki ni veika. Na Kalou e Kalou ni tuvatuva matau; e dodonu gona me laurai na ituvatuva matau oya ena ivavakoso era lewena na nona tamata. Edaidai, me vaka ga ena imatai ni senitiuri, era dau lesi na tagane lotu Vakarisito matua mera qase se ivakatawa. O ira oqo era dau raica na ivavakoso ra qai dau vakania vakayalo. Dau nodra ivukevuke e so tale na tagane yalodina era vakatokai mera dauveiqaravi vakaitalatala. Era sega ni saumi na tagane oqo ia era bole mera veiqaravi wale. Na veika mera bula kina ena veisiga era cakacakataka ga vakataki ira.​—1 Korinica 14:33, 40; Filipai 1:1; 1 Timoci 3:8, 9.

Era digitaki vakacava? E dodonu mera tamata yalodina ni Kalou era vakaitovotaki ira ena itovo e kunei ena iVolatabu. E so vei ira oqo: ‘yalomamakutu, yalomatua, ivalavala dodonu, daulomasoli, veivakavulici vakavuku; kua ni daugarova na iyau vakasisila; lewai ira vinaka nona lewenivale; sega ni dua e se qai lotu; rogo vinaka vei ira mai taudaku’; ‘e taura matua nai vakavuvuli dina me rawata me vakarota na ivakavuvuli vinaka.’​—1 Timoci 3:1-15; Taito 1:7-9.

Era sega ni vakaturi na tagane oqo ena itutu oya ena nodra digidigi na ivavakoso, ni levu ga era lewe ni ivavakoso era lotu Vakarisito vou. E vakaturi ira ga na tagane matua era qase, e rawa nira raica vakayalomatua se vakaevei sara mada na levu ni nodra sa rawata tiko na ivakatagedegede vakaivolatabu o ira na sa nanumi tiko. Na nodra lesi na qase kei na dauveiqaravi vakaitalatala e caka ena nodra veivakadonui na iLawalawa Dauvakatulewa ni iVakadinadina i Jiova, e muria oqo na kena ivalavala ga e dau caka ena ivavakoso vakarisito ena imatai ni senitiuri.

O ira na qase se ivakatawa oqo, era sega ni ilawalawa italatala era wasei tani mai na vo ni ivavakoso; era sega ni tu mera lewai ira na tani. Me vaka a kaya o Jisu, o koya e via liu e dodonu me nodra dauveiqaravi na kena vo. Ena nodra ivavakoso na iVakadinadina i Jiova, e laurai kina ni o ira na qase era vakataki ira ga na lewe ni ivavakoso ena nodra dau cakacaka vata ena kena tutaki na Matanitu ni Kalou.​—Maciu 20:26, 27, VV; 23:8-11; Roma 12:8; 1 Korinica 3:5; 4:1, 2; Kolosa 4:11; 1 Cesalonaika 5:12-14.

Nira ivakatawa, era qarava na veivakavulici ena veisoqoni, ra qai liutaka tale ga na cakacaka vakavunau. Na ilesilesi bibi duadua ni ivavakoso me vunautaka na itukutuku vinaka ni Matanitu ena yalava e lesi vei ira. Era dauveivakatawani tale ga na ivakatawa, ena nodra sikovi na lewe ni ivavakoso mera vakayaloqaqataki ke gadrevi vaka kina.​—Maciu 24:14; Cakacaka 1:8; 1 Cesalonaika 2:11, 12; 5:14, 15; 2 Timoci 2:24-26; Iperiu 13:17; Jemesa 5:13-16; 1 Pita 5:1-4.

E nodra itavi tale ga na qase mera vunauca ra qai vakadodonutaka e dua e muri cala tiko, ena rawa ni vakaleqa na savasava vakayalo kei na kilikili ni itovo ena ivavakoso, vaka tale ga kina na nodra veiyaloni na lewena.​—1 Korinica 5:4, 5, 7, 11-13; Taito 1:9; 2:15; 3:10, 11.

Na sosoqoni wasoma ena ivavakoso ena levu sara kina na gauna ni nomu veikilai vinaka qai levu na kena yaga vakayalo.​—Same 35:18; 84:10.

• O cei e raica na cicivaki ni veika ni ivavakoso yadua?

• Ena yavu cava era digitaki kina na ivakatawa?

• Na cava e nodra itavi?

[iYaloyalo ena tabana e 13]

Era vakavulici ira na lewe ni ivavakoso na ivakatawa, era liutaka na cakacaka vakavunau e veivale, veiuqeti ena nodra dau veivakatawani, era veivakasalataki ra qai veivunauci ke gadrevi me caka