Era Lesi Vakalou na iVakatawa kei na Dauveiqaravi Vakaitalatala

“Dou vakaraici kemudou, kei ira kecega na qele-ni-sipi, sa lesikemudou kina na Yalo Tabu mo dou nodrai vakatawa.”​—CAKACAKA 20:28.

1, 2.Sa vakayacori tiko vakacava na Aisea 60:22?

SE TUKUNA makawa sara mai o Jiova ni na yaco ena gauna ni ivakataotioti e dua na ka vakairogorogo. A kainaki ena gusu i koya na parofita o Aisea: “Ko koya sa lailai, ena yaco me le dua na udolu; kei koya sa lailai, me matanitu kaukauwa: koi au ko Jiova, ka’u na vakusarawataka e na kena gauna.”​—Aisea 60:22.

² E tu beka na ivakadinadina ni yaco tiko nikua na parofisai oqo? Io! A tauyavutaki mai Allegheny, Pennsylvania, Mereke, ena veiyabaki ni 1870 e dua na nodra ivavakoso na tamata i Jiova. Mai na itekitekivu lailai oya, e laurai nira cadra mai kina ra qai toso vinaka e veiyasa i vuravura e vicasagavulu vata na udolu na ivavakoso. Era kacivaka voli na Matanitu ni Kalou e vica na milioni era vaka e dua na matanitu kaukaua, era lewena tiko edaidai e sivia na 91,000 na ivavakoso ena 235 na vanua kei vuravura. Sega kina ni vakatitiqataki ni sa vakusa tiko o Jiova na nodra vakasoqoni na dausokalou dina ni se bera ni kacabote “na veivakararawataki levu” sa voleka sara oqo.​—Maciu 24:21; Vakatakila 7:​9-​14.

3. Na cava na kena ibalebale me papitaiso e dua ena “yaca ni Tamamudou, kei na Luvena, kei na Yalo Tabu”?

³ Era dui yalataki ira vakatabakidua vei Jiova na vica na milioni oqo, ia me vaka na ivakaro i Jisu, era sa qai papitaisotaki ena “yaca ni Tamamudou, kei na Luvena, kei na Yalo Tabu.” (Maciu 28:19) Nodra papitaiso ena “yaca ni Tamamudou” o ira na sa yalataki ira oqo e vakatakila nira sa ciqomi Jiova me Tamadra vakalomalagi, me ivurevure tale ga ni nodra bula, qai vakadinadinataka nira sa vakamalumalumutaki ira ina nona lewa cecere. Na papitaiso ena ‘yaca ni Luvena’ e dusia ni o ira oqo era vakatusai Jisu Karisito me kedra iVoli, me nodra Turaga, kei na nodra Tui. Era ciqoma tale ga na yalo tabu, se igu yavala ni Kalou me veidusimaki ena nodra bula. Nodra cakava oqori e vakaraitaka nira sa papitaisotaki ena ‘yaca ni yalo tabu.’

4. Era lesi vakacava na italatala lotu Vakarisito?

⁴ Era lesi na tisaipeli vou mera italatala ni Kalou o Jiova ena gauna era papitaiso kina. O cei e lesi ira? Ke tauri na kena vakasama ni 2 Korinica 3:​5, ena laurai ni vosa e tukuni kina e dusi ira tiko na italatala oya: “Sa vu mai vua na Kalou ga na neitou kaukauwa [vakaitalatala].” Era okata na veilesi ni Kalou o Jiova me ka dokai duadua ena nodra bula! Ke ra via tubu cake tiko ga vakayalo nira sa papitaisotaki oti mera italatala ni “tukutuku-vinaka,” e dodonu mera muria na veidusimaki ni yalo tabu ni Kalou ra qai bulataka tiko ga na nona Vosa.​—Maciu 24:14; Cakacaka 9:​31.

Lesi Vakalou, Sega ni Lesi Vakatamata

5. Era lesi beka na ivakatawa vakarisito kei na dauveiqaravi vakaitalatala ena nodra laveligataki me vaka beka ena veidigidigi? Vakamacalataka.

⁵ E gadrevi nodra veidusimaki vakayalomatua na ivakatawa era sauva na kena ivakatagedegede kei na nodra veitokoni yaga na dauveiqaravi vakaitalatala mera qaravi kina vakayalo na italatala gugumatua e tubu tiko ga na kedra iwiliwili. (Filipai 1:1) Era lesi vakacava na tagane matua vakayalo oya? Sega ni vaka na kena ivalavala e caka ena lotu ni Veivanua Vakarisito. Era sega ni laveligataki na ivakatawa vakarisito, mera veidigitaki kina e dua na iwase levu ni lewe ni ivavakoso me vaka e dau caka ena veidigidigi. Na nodra lesi e vakalou. Na cava beka na kena ibalebale?

6. (a) E vakaevei tu na veiliutaki vakalou? (b) Na cava e vakalou kina na nodra lesi na ivakatawa kei na dauveiqaravi vakaitalatala?

⁶ Kena ibalebale ga ni o ira na iVakadinadina i Jiova era talairawarawa mai vu ni lomadra ina veiliutaki vakalou ra qai duavata ni vakayacora na loma ni Kalou. (Same 143:10; Maciu 6:​9, 10) E vu vakalou na nodra lesi na ivakatawa vakarisito se o ira na qase, kei ira na dauveiqaravi vakaitalatala baleta ni yavutaki vakalou, me vaka e virikotori ena iVolatabu, na iwalewale ni nodra vakaturi kei na nodra lesi. Ni “ulu ni ka kecega” o Jiova, e tu kina vua na dodonu me lewa se na cicivaki vakacava na nona isoqosoqo rairai.​—1 Veigauna 29:11; Same 97:9.

7. Era liutaki vakacava na iVakadinadina i Jiova?

⁷ O ira na iVakadinadina i Jiova era sega ni vakataki ira na lotu ni Veivanua Vakarisito, mera lewa ga vakataki ira na ivalavala me cicivaki kina vakayalo na nodra isoqosoqo. Ia era saga na lotu Vakarisito oqo mera kabita matua na ivakatagedegede i Jiova. E sega vei ira na bose levu vakalotu se dua na matabose e cake ni lotu me vakatulewataka na nodra lesi na ivakatawa. Ke ra via vakalatilati ena veilesi oqo e so era vakavuravura, era na sega ni via vakamalumalumu kina na tamata i Jiova. E dei tiko ga na yalodra ena tikina eratou sereka vinaka na yapositolo ena imatai ni senitiuri ni ratou kaya: “Sa kilikili kei keitou me keitou talairawarawa vua na Kalou, me kakua ga vei ira na tamata.” (Cakacaka 5:​29) O koya gona, o ira na iVakadinadina era vakamalumalumutaki ira vua na Kalou ena ka kece ga. (Iperiu 12:9; Jemesa 4:7) Era vakalougatataki nira muria na ituvatuva vakalou.

8. Erau duidui vakacava na demokarasi kei na ituvatuva ni veiliutaki vakalou?

⁸ Nida vakarurugi ena veiliutaki uasivi vakalou i Jiova, de vinaka me matata vei keda na kedrau duidui na ituvatuva ni veiliutaki vakatamata e vakatokai na demokarasi kei na ituvatuva ni veiliutaki vakalou (theocracy). Ena demokarasi, e rogoci vakatautauvata na domodra na lewenivanua kece, e rawa ni tu me veiliutaki e dua ga e vinakata, ra qai vakaturi koya ina itutu ni veiliutaki e dua na iwase levu ni lewenivanua ena nodra vakaitavi ena veidigidigi. Ia na iwalewale vaka oya e sega ni taurivaki ena veilesi vakalou. E sega ni vu vakatamata oqo; se vu mai na dua na isoqosoqo vakalawa. A rairai dusia tiko o Paula ni a lesi koya sara ga o Jisu kei Jiova me “nodrai apositolo na veimatanitu tani” ni a kaya vei ira na kai Kalitia ni nona lesi “a sega ni vu mai vei ira na tamata, se me a dewa mai vakatamata, ia sa i lesilesi sara ga mai vei Jisu Karisito kei na Kalou ko Tamada, o koya ka a vakaturi Jisu cake tale mai na mate.”​—Roma 11:13; Kalatia 1:​1, VV.

Lesi Ena Yalo Tabu

9. Na cava e tukuna na Cakacaka 20:28 me baleta na nodra lesi na ivakatawa lotu Vakarisito?

⁹ E vakadreti ira na ivakatawa e Efeso o Paula mera nanuma tiko ni a lesi ira ena yalo tabu na Kalou. E kaya: “Mo dou vakaraici kemudou, kei ira kecega na qele-ni-sipi, sa lesi kemudou kina na Yalo Tabu mo dou nodrai vakatawa, mo dou vakania nai soqosoqo lewe ni lotu ni Kalou; ko ira sa volia ko koya, e na nona dra ga [se, “dra sara ga i Luvena,” NW].” (Cakacaka 20:​28, neitou na matanivola kala.) E bibi mera dusimaki tiko ga ena yalo tabu na ivakatawa lotu Vakarisito nira colata voli nodra icolacola mera vakatawa na qelenisipi ni Kalou. Ke sa mani sega ni rawata na ivakatagedegede vakalou e dua e lesi me veiqaravi, na yalo tabu ga ena qai vakasivoi koya mai na itutu oya.

10. E dina vakacava ni mai vakaitavi sara ga na yalo tabu ena veilesi vakalou?

¹⁰ E vakaitavi mada vakacava ena veilesi oqo na yalo tabu? Kena imatai, na ivola e tuvai kina na ivakatagedegede gadrevi me baleti ira na ivakatawa vakayalo e uqeta na yalo tabu na kena volai. O Paula e vola ena nona ivola vei Timoci kei Taito na ivakatagedegede mera sauva na ivakatawa kei na dauveiqaravi vakaitalatala. Rauta ni 16 kece na ivakatagedegede e cavuta. Me kena ivakaraitaki, mera kua ni vakamelei rawa ena dua na ka na ivakatawa, mera yalomatua, itovo vinaka, dau veivakacegui, yalovinaka, dau veivakavulici, ra qai ulunivale ivakaraitaki vinaka. Mera yalomatua ena ivalavala ni nodra dau gunuva na yaqona ni viti se valagi, mera kua ni domodomoiyau, mera dau rawa na yalodra. Na ivakatagedegede cecere tale ga vaka oya e virikotori me baleti ira na tagane era kakavaka na itavi vakadauveiqaravi vakaitalatala.​—1 Timoci 3:​1-​10, 12, 13; Taito 1:​5-9.

11. Na cava e so na ivakatagedegede mera sauva na tagane era kakavaka na icolacola vakaivavakoso?

¹¹ Ni talevi na ivakatagedegede kece oqo, e macala kina ni o ira na liu tiko ena sokalou i Jiova e dodonu mera ivakaraitaki vinaka ena ivalavala vakarisito. Me laurai votu vei ira na tagane era kakavaka na icolacola vakaivavakoso ni cakacaka tiko vei ira na yalo tabu. (2 Timoci 1:​14) Me vakadinadinataki ni yalo tabu ni Kalou sa teivaka tiko vei ira na tagane oqo na vuana me vaka “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kalatia 5:​22, 23) Ena vakilai na vua oqo ni yalo tabu ena nodra veitaratara kei na tacidra vakayalo se so tale na tamata. E so vei ira ena totoka nodra vakaitovotaki ira ena so na vua ni yalo tabu, na kena vo, era na sauva vinaka e so tale na ivakatagedegede gadrevi me baleti ira na ivakatawa. Ia ena nodra ivalavala raraba ni bula, o ira kece era nuitaka mera lesi mera ivakatawa se dauveiqaravi vakaitalatala e dodonu mera vakaraitaka nira tamata matua vakayalo, nira yacova na ivakatagedegede gadrevi e virikotori ena Vosa ni Kalou.

12. O cei beka e rawa ni tukuni ni lesi ira na yalo tabu?

¹² E doudou o Paula me uqeti ira e so tale mera vakatotomuri koya baleta ni o koya vakataki koya e dau vakatotomuri Jisu Karisito, o koya e ‘laiva vei keda na ivakarau meda muria na weniyavana.’ (1 Pita 2:​21; 1 Korinica 11:1) Sa rawa kina ni tukuni ni o ira na sauva na ivakatagedegede vakaivolatabu mera ivakatawa se dauveiqaravi vakaitalatala e lesi ira na yalo tabu.

13. A veivuke vakacava na yalo tabu vei ira na vakatura na yacadra na tagane mera veiqaravi ena ivavakoso?

¹³ E tiko e dua tale na tikina e dusia ni yalo tabu e vakaitavi ena nodra vakaturi kei na nodra lesi na ivakatawa. A kaya o Jisu ni ‘na solia na yalo tabu o koya na Tamada vakalomalagi vei ira sa kerekere vua.’ (Luke 11:13) Nira bose gona na qase, mera vakatura kina e so na tagane mera taura na icolacola vakaivavakoso, era masuta ena nodra bose oqori na veidusimaki ni yalo tabu ni Kalou. Era yavutaka nodra vakatutu ena ka e cavuti ena Vosa uqeti ni Kalou ra qai vakalewa rawa, ena veitokoni ni yalo tabu, se sauva se sega o koya e vakaturi tiko na ivakatagedegede vakaivolatabu. Me kua ni vakacalai ira na vakatutu tiko na kedra irairai e sau na vakaturi, nodra vuli vinaka, se nodra madila beka ena so na ka. Na ka levu ga era na kauai kina na ituvaki vakayalo i koya era na via vakatura, ni na dua o koya ena torovi rawarawa vei ira na lewe ni ivavakoso era na via taro ivakasala.

14. A cava eda vulica mai na Cakacaka 6:​1-3?

¹⁴ Dina nira vakaitavi vata na ilawalawa qase kei koya na ivakatawa ni tabacakacaka ena nodra vakaturi na tacida mera qase se dauveiqaravi vakaitalatala, ia na veilesi e muri kina na iwalewale sara ga a taurivaki ena imatai ni senitiuri. Dua na gauna, a gadrevi mera lesi e so na tagane matua vakayalo mera qarava e dua na ilesilesi bibi. Mani tauca kina na ilawalawa dauvakatulewa na idusidusi oqo: “Qara vei kemudou e lewe vitu na tamata sa rogorogo vinaka, eratou sinai e na Yalo Tabu kei na vuku, me keitou lesi iratou ki na cakacaka oqo.” (Cakacaka 6:​1-3) Dina nira vakatura na yacadra mera lesi na tagane era tiko e kea, ia na lewa ni veilesi era tauca o ira na tiko mai Jerusalemi. Na kena ivalavala vata ga oqo e muri nikua.

15. E vakaitavi vakacava ena veilesi na iLawalawa Dauvakatulewa?

¹⁵ Na iLawalawa Dauvakatulewa ni iVakadinadina i Jiova e lesi ira na lewe ni Matabose ni Tabana. Ni sa gadrevi me vakatulewataka na iLawalawa Dauvakatulewa se o cei e ganita me lesi ina icolacola bibi oya, ena vakasamataki tiko na vosa i Jisu e vaka: “Na tamata e soli vakalevu vua na ka e na namaki tale ga mai vua e levu na ka; ia ko koya e soli vakalevu cake vua na ka, e na levu cake vaka kina na ka era namaka na tamata mai vua.” (Luke 12:​48, VV)) E sega wale ga ni lesi ira na lewe ni Komiti ni Tabana na iLawalawa Dauvakatulewa, e lesi ira tale ga na qase e Peceli (Bethel elders) kei ira na ivakatawa dauveilakoyaki. Ia e vakacolata vei ira e so na mataveitacini nuitaki na lewa mera veilesi tale ga. E sega ni ka vou oqo ni tiko na kena ivakaraitaki ena iVolatabu.

‘Veilesi me Vaka Au a Vakarota Vei Iko’

16. Na cava e biuti Taito tu yani kina i Kiriti o Paula, na cava e vakaraitaka oya me baleta na veilesi vakalou e vakayacori nikua?

¹⁶ A kaya o Paula vei koya erau dau cakacaka vata, o Taito: “Au a laivi iko mai Kiriti, mo vakadodonutaka na veika sa vo, ka mo lesia nai talatala qase ki na veikoro yadua, me vaka ka’u a vakarota vei iko.” (Taito 1:5) Sa qai cavuta veitaravi o Paula vei Taito na ivakatagedegede e so me na dikevi ira kina na tagane e ganita mera lesi. Na iLawalawa Dauvakatulewa gona nikua e vakacolata vei ira na mataveitacini matua ena veitabana mera lesi ira na qase kei na dauveiqaravi vakaitalatala. Dau vakabibitaki vei ira na matataka na iLawalawa Dauvakatulewa ni dodonu me macala vinaka vei ira na idusidusi vakaivolatabu mera muria nira veilesi. Ena veidusimaki gona ni iLawalawa Dauvakatulewa, era lesi kina na tagane matua mera veiqaravi ena ivavakoso ni iVakadinadina i Jiova e veiyasa i vuravura.

17. E qarava vakacava na valenivolavola ni tabana na vakatutu me baleta na nodra lesi na ivakatawa kei na dauveiqaravi vakaitalatala?

¹⁷ Ni sa vakau yani ina valenivolavola ni tabana ni Watch Tower Society na vakatutu me baleta nodra lesi na ivakatawa kei na dauveiqaravi vakaitalatala, era nuitaka na veidusimaki ni yalo tabu na tagane matua e kea me tokoni ira ena nodra veilesi. Era ririko na tagane oqo nira kila nira na saumitaro kevaka era vakusa nodra tabaka e dua me colaitavi bibi, de ra na wili vata kei koya ena nona ivalavala ca.​—1 Timoci 5:​22, VV.

18, 19.(a) Dau vakadewataki yani vakacava ina ivavakoso ke ra sa lesi e so? (b) E vakayacori vakacava na icakacaka kece ni nodra vakaturi kei na nodra lesi e so?

¹⁸ De na volai na veivakadonui me baleta e so na ilesilesi ena ivola e tuki ena sitaba ni isoqosoqo vakalawa. Se na vakayagataki beka na ivola vaka oya me vakaraitaki kina na yacadra e vica na tacida tagane era lesi ena dua na ivavakoso.

¹⁹ Na veilesi vakalou e taka mai vei Jiova kei na Luvena kei na idewadewa rairai e taurivaka tiko na Kalou e vuravura, “na dauveiqaravi yalo dina ka vuku” vata kei na kena iLawalawa Dauvakatulewa. (Maciu 24:​45-​47, VV) Na icakacaka kece ni nodra vakaturi kei na nodra lesi e so e veivakamuai se veidusimaki kina na yalo tabu. E dina oqo baleta ni yalo tabu a uqeta me volai na Vosa ni Kalou e tuvai tu kina na ivakatagedegede gadrevi, o ira tale ga era lesi era bulataka tiko na vua ni yalo oya. Sa dodonu ga kina me raici ni o ira na lesi, e lesi ira sara ga na yalo tabu. E vakalou gona na nodra lesi na ivakatawa kei na dauveiqaravi vakaitalatala nikua, me vakataki ira ga ena imatai ni senitiuri.

Marautaki na Veidusimaki i Jiova

20. Na cava eda duavata kina kei na ka e cavuta o Tevita ena Same 133:1?

²⁰ Ni vakilai ena gauna oqo na sautu vakayalo kei na tubu vakayalo ena cakacaka ni Matanitu ni Kalou, dua na ka meda vakavinavinaka kina ni o Jiova sara ga e lewa na nodra lesi na ivakatawa kei na dauveiqaravi vakaitalatala. Na ituvatuva vakaivolatabu oqo e taqomaka me dei tiko ga ena keda maliwa na iVakadinadina i Jiova na ivakatagedegede dodonu ni Kalou. Kena ikuri, na yalo vakarisito kei na yalogu e tiko vei ira na tagane oqo e vakavuna me vakilai sara kina vakalevu vei keda na tamata i Jiova na vakacegu kei na duavata. E uqeti kina na lomada meda cavuta me vakataki Tevita na daunisame: “Raica, na kena yaga kei na kena matavinaka, ni ra sa tiko vakayalovata na veiwekani!”​—Same 133:​1.

21. Sa vakayacori tiko vakacava edaidai na Aisea 60:17?

²¹ Eda marau dina ni veidusimaki tiko o Jiova ena vuku ni nona Vosa kei na yalona tabu! Qai vakaibalebale dina na vosa e volai toka ena Aisea 60:17: “Ka’u na kauta mai na koula mei sosomi ni parasa, ka’u na kauta mai na siliva mei sosomi ni aironi, ka mei sosomi ni kau na parasa, ka mei sosomi ni vatu na aironi: ia ka’u na cakava na nomu mataveilewai me vu ni veivakacegui, kei ira sa dauvakasaurarataki iko me ra vu ni valavala dodonu.” Na veika totoka oqo e vakilai ena loma ni isoqosoqo ni Kalou e vuravura nira sa tekivu muria vakalevu na ituvatuva vakalou na iVakadinadina i Jiova.

22. Na cava eda vakavinavinakataka dina, ia na cava meda nakita dei e lomada?

²² Eda vakavinavinaka dina ni cici vinaka tu na ituvatuva vakalou ena keda maliwa. Eda marautaka tale ga vakalevu na nodra gu tiko ena vukuda ena lomasoli na ivakatawa kei na dauveiqaravi vakaitalatala era lesi vakalou. Eda vakacaucautaki koya na Tamada vakalomalagi dau loloma e vakavutuniyautaki keda vakayalo qai vakalougatataki keda vakalevu. (Vosa Vakaibalebale 10:22) Meda nakita dei e lomada nida na toso vata tiko ga kei na isoqosoqo i Jiova. Qai kena ilutua, meda veiqaravi tiko ga ena duavata me rokovi, vakacaucautaki, qai vakalagilagi kina na yaca lagilagi uasivi i Jiova.

O Sauma Vakacava?

• Na cava e rawa ni tukuni kina ni nodra lesi na ivakatawa kei na dauveiqaravi vakaitalatala e vakalou, e sega ni vakatamata (democratic)?

• Era lesi vakacava ena yalo tabu o ira na tagane lotu Vakarisito matua?

• E vakaitavi vakacava na iLawalawa Dauvakatulewa ena nodra lesi na ivakatawa kei na dauveiqaravi vakaitalatala?

• Na cava meda vakavinavinaka kina vei Jiova ni caka vakalou na veilesi?

[iYaloyalo ena tabana e 15]

E ka dokai nodra veiqaravi na qase kei na dauveiqaravi vakaitalatala nira lesi vakalou