Soqoni e Veiuqeti ena Loloma kei na Cakacaka Vinaka
Era dau soqoni vata ena vale vakaitaukei na lotu Vakarisito taumada mera vakavulici kina, mera dau mai veimaliwai tale ga kina. Edaidai, era soqoni vakatolu ena dua na macawa na ivavakoso ni iVakadinadina i Jiova. Oni sureti mo ni tiko mada ena dua vei ira na soqoni oqo. Na nodra soqoni e sega ni vaka tu na lai lotu, ia e vakabibitaki kina na vuli vakalou. E tekivu ena sere kei na masu na soqoni vakaivavakoso, e tini tale ga vaka kina. E sega ni dua na ka e lavaki mera sauma o ira na mai tiko kina, e sega tale ga ni caka na soli.—Cakacaka 4:23-31; 14:22; 15:32, 35; Roma 16:5; Kolosa 4:15.
De imatai ni soqoni o tiko kina na vunau soqovi levu e 45 na miniti na kena balavu, e veivosakitaki kina na ivakavuvuli vakaivolatabu, na parofisai, se so na ivakasala me baleta na bula vakarisito. Ni oti na vunau oqo, e vulici na iVolatabu ena kena taurivaki e dua na ulutaga mai na Vale ni Vakatawa e volai me vulici vakaivavakoso. E dau vaka oqo na vuli: E wili e dua na parakaravu mai na Vale ni Vakatawa, qai taroga na taro ni vuli o koya e taura na vuli mera qai bole na vakarorogo mera sauma ena nodra laveliga. E rawa ni vica toka na isau ni taro ena dua na parakaravu. Dau dua na aua na balavu ni soqoni.
Ena loma ni macawa, e dau caka kina e rua tale na soqoni ya 45 na miniti. E dua na Koronivuli ni Vuli iTalatala Liutaki Vakalou. Eda vulica kina na iwalewale ni dau vakadidike ena so na ulutaga vakaivolatabu da qai vakamacalataka yani ena sala e laulau. Ni oti e 21 na miniti ni veivakaroti bibi, era vosa sara e so na gonevuli ena so na itavi leleka a lesi vei ira. Ni oti na vosa yadua, ena veivakasalataki na ivakatawa ni koronivuli me vakaraitaka vei ira na gonevuli na sala e rawa nira vakavinakataka kina nodra itavi. E vica na ivola e vakarautaki me ivola ni vuli ena koronivuli oqo. O ira na sa dau sosoqoni wasoma e rawa nira curu ke salasalavata tiko nodra ivakarau ni bula kei na ivakavuvuli vakarisito.
Na soqoni e tarava e vakatokai na Soqoni ni Cakacaka. E dau tolu se va na itavi e kau cake mai kina na vunautaki ni itukutuku vinaka e veivale, kei na so tale na basogana ni cakacaka vakaitalatala. Na itavi oqo ena rawa ni vosa kina e dua, me veivosakitaki, se caka kina e so na vakatovotovo, qai so tale ga na gauna e rawa nira vakaitavi na vakarorogo. Na iwase levu ga ni porokaramu e vakarautaki ena veika e volai ena Noda Cakacaka Vakaitalatala ni Matanitu, e dua na ivola veituberi e va na taqana e tabaka e veivula na Watch Tower Society.
E dua tale na soqoni e dau caka vakaiwasewase lalai ena veimacawa, e dau caka ena vale vakaitaukei era toka ena yalava ni ivavakoso. E yavutaki na vuli ena iVolatabu kei na dua na ivola e se qai tabaka ga na iSoqosoqo. Ni sega ni levu sara na lewe ni iwasewase oqo, ena rawarawa kina vei ira kece na tiko kina mera vakaitavi ena veivosaki, qai rawarawa tale ga na veikilai.
E levu ga na ivavakoso era dau soqoni ena Kingdom Hall era tara na iVakadinadina i Jiova. Na isau ni kedra tara era cautaka ga na iVakadinadina, ia e vakalevu ga era tarataravaki na bole cakacaka qai sega nira saumi kina. Ena tu ena gauna kece ni soqoni na kato ni cau vei ira na via cau.
Na soqoni vakaivavakoso e vukei ira na iVakadinadina i Jiova mera muria na ivakasala ena Iperiu 10:24, 25: “Me da veivakananumi keda vakai keda me da veivakatakatai me dauloloma kai valavala vinaka: me da kakua ni biuta na vakasoqoni vata, me vaka nai valavala ni tamata eso; me da veivakamasuti tiko: ia me vakalevu, ni [da] sa raica sa toro voleka mai na siga.”
• Nida raica nodra dau soqoni na lotu Vakarisito taumada, e tautauvata vakacava kei na nodra soqoni na iVakadinadina i Jiova?
• Vakamacalataka na ituvatuva ni lima na soqoni era dau soqo wasoma kina na iVakadinadina.
• Era dau tara rawa vakacava na vale ni soqoni?
[iYaloyalo ena tabana e 14]
Veivakavulici ena Vale ni Vakatawa e dua na qase mai Mereke
Ira na vakaitavi ena Koronivuli ni Vuli iTalatala Liutaki Vakalou mai na Faroe Islands
Vuli vakaiwasewase ena vale vakaitaukei mai Yap
Na Kingdom Hall mai New Braunfels, Texas, Mereke, era tara na iVakadinadina i Jiova ena rua na siga
[iYaloyalo ena tabana e 15]
Na Kingdom Hall ena so na vanua
Japani
Ositerelia
Austria
Sipeni