Wase e 3

Sa Sucu o Koya me Mai Caramaka na Sala

SA VOLEKA sara ni vakasucu ko Ilisapeci. A tiko vata kei koya ko Meri ena vula tolu sa oti. Ia, sa gauna oqo me vakamoce kina ko Meri ka lesu tale ena i lakolako balavu ki Nasareci na nona koro. Ena ono tale beka na vula sa na vakasucu talega o koya.

Sega ni dede na lako i Meri, sa vakasucu sara ko Ilisapeci. Sa rekitaki dina ni vakasucu vinaka ka bulabula vinaka ko Ilisapeci kei na gone! Nona vakaraitaka yani na gone lailai ko Ilisapeci vei ira na wekana kei ira era yasayasa vata, era sa reki vata kece kei koya.

Na i kawalu ni siga ni nodra sucu, me vaka na Lawa ni Kalou, sa dodonu me ra cilivi na gonetagane ni Isireli. Era mai sikova ena gauna oqo na nona i tokani kei ira na wekana. Sa ra qai kaya me rau veiyacani na gone kei tamana ko Sakaraia. Ia sa qai vosa ko Ilisapeci. “Me kakua;” e kaya ga, “sa yacana ga ko Joni.” Nanuma tiko, ni yaca oqori a mai tukuna na agilosi ko Keperieli me yacana na gone.

Ia era qai kudruvaka na nodrau i tokani: “Sa sega na wekamu sa vakayacani e na yaca oqo.” Era sa qai vosa vagalu ena nodra tarogi tamana se cava e vinakata me yacana na gone. Sa qai kerea ko Sakaraia me kau mai e dua na papa ni volavola, era kurabui kecega ni sa vola: “A yacana ko Joni.”

Ni oti oqori, sa vosa rawa tale ko Sakaraia ena sala e veivakurabuitaki. O rawa ni nanuma lesu ni a sega ni vosa rawa o koya ena nona sega ni vakabauta na vosa ni agilosi ni na vakasucuma e dua na gone ko Ilisapeci. Io, ena gauna e vosa rawa kina ko Sakaraia, era sa kurabui o ira kece era yasayasa vata ka ra veikayaka vakataki ira: “Ena vakabekaevei nai valavala ni gone oqo?”

Sa vakasinaiti oqo ena yalo tabu ko Sakaraia, ka reki vakalevu sara: “Me vakarokorokotaki ko Jiova na Kalou nei Isireli; Ni sa lako mai vei ira na nona tamata ka vakabulai ira, A sa vakatubura vei keda e dua na veivakabulai sa vaka na kaukamea, E na mataqali i Tevita na nona tamata.” Io, na “veivakabulai sa vaka na kaukamea” oqo na Turaga ko Jisu, o koya me na qai sucu mai. Ena vukuna sa vosa kina ko Sakaraia, na Kalou ena “solia mai vei keda, me da vakabulai mai na ligadra na noda meca, Ka qaravi koya ka sega ni rere, E na yalosavasava kei na caka dodonu e matana, e na veisiga kecega ni noda bula.”

Sa tukuna vakailiu ko Sakaraia me baleti Joni, na luvena tagane: “Ia, ko iko na gone, ko na vakatokai na parofita i Koya sa cecere sara: Ni ko na liu vei Jiova me caramaka na nona sala: Me vakatakila vei ira na nona tamata na ka me ra bula kina, Ni sa bokoci na nodrai valavala ca, E na vuku ni nona loloma levu na noda Kalou, Sa kida mai kina vei keda na rarama maicake, Me vakararamataki ira era sa tiko e na butobuto kei na yaloyalo ni mate, Ka me tubera na yavada ki na sala ni veivinakati.”

Ena gauna oqo sa tadu yani ki na nona vale mai Nasareci ko Meri, ia e rairai se sega tikoga ni vakamau o koya. Na cava ena sotava ni sa kilai na nona bukete? Luke 1:​56-80; Vunau Ni Soro 12:​2, 3.

▪ E vakacava na dede ni bula i Joni mai vei Jisu?

▪ Na cava na veika e qai yaco ni sa siga walu ko Joni?

▪ E golevi ira vakacava na nona tamata na Kalou?

▪ Na cakacaka cava e tukuni vakailiu ni na cakava ko Joni?