Wase e 11

Caramaka na Sala ko Joni

SA OTI yani oqo e tinikavitu na yabaki na nona a vakatarogi ira na qasenivuli ena valenisoro ko Jisu ni se yabaki 12 voli kina. Sa donuya oqo na vula i tubutubu ni yabaki 29 S.K., ia e voleka ni tamta kece era veitalanoataki Joni tiko na tavalei Jisu, ka vunau ena veiyasana kecega ka vakavolivolita na Uciwai na Joritani.

Ko Joni e dua na tamata e dreta na rai, ena nona rairai kei na nona vosa. E vakaisulu voli ena i sulu vuti ni kameli, ka vau na tolona ena wa kuli ni manumanu. Na kena kakana na vodre ni veikau kei na oni ni veikau. Ia na nona i tukutuku? “Dou veivutuni! ni sa voleka na matanitu vakalomalagi.”

Na i tukutuku oqo e vakauqeti ira era rogoci koya. Era liaci ira e lewe vuqa ni vinakati me ra veivutuni, o ya me ra veisautaka na nodra i tovo ka vakanadakuya nodra bula e liu. Sa ra qai lako mai vei Joni na veivanua taucoko ka vakavolivolita na Joritani, kei ira sara mai Jerusalemi, ka ra dua na i wiliwili tamata levu, ka papitaisotaki ira o koya, e tabadromuci ira ena wai ni Joritani. Ena vuku ni cava?

E papitaisotaki ira na tamata ko Joni me i vakatakarakara, se me i vakadinadina ni nodra veivutunitaka mai na vu ni lomadra na nodra i valavala ca ni ra voroka na veiyalayalati ni Lawa ni Kalou. Ni ra lako mai e so na Farisi kei na Setoki ki na Joritani, sa qai vosataki ira ko Joni. “Oi kemudou na kawa ni gata,” e kaya o koya. “Mo dou qai vuataka na vua e kilikili kei na veivutuni; ia dou kakua ni kaya e na lomamudou, A tama i keimami ko Eparaama; ni’u sa kaya vei kemudou, sa rawarawa vua na Kalou me vakatubura na veivatu oqo me ra luve i Eparaama. Ia na matau sa no edaidai e na vu ni kau, ka sa ta laivi kina na kau kecega sa sega ni vuataka na vua vinaka, A sa biu ki na buka waqa.”

Ena vuku ni nodra kauwaitaki Joni vakalevu na tamata, era sa qai talai ira yani na bete kei na Livai vei koya o ira na Jiu. Era sa qai tarogi koya: “Ko cei beka ko iko?”

“Au sa sega ni koya na Karisito koi au,” e tusanaka yani vei ira ko Joni.

“Ko cei tale?” era vakatarogi koya. “Ko Ilaija beka?”

“E segai,” e sauma yani.

“Ko iko beka na parofita ko ya?”

“E segai.”

Sa ra qai vakatarogi koya vakaukauwa: “Ko cei beka ko iko? me keitou tukuna vei ira sa talai keitou: ko sa tukuni iko mei cei?”

Sa qai vakamacalataka ko Joni: “Koi au na domo ni dua sa kacikaci e loma ni veico, Vakadodonutaka na sala i Jiova, me vaka sa kaya ko Aisea na parofita.”

“Ko sa qai veipapitaisotaki e na vuku ni cava,” era via kila, “ni ko sa sega ni koya na Karisito, se ko Ilaija, se na parofita ko ya?”

“Au sa veipapitaisotakitaki e na wai,” e sauma yani o koya. “Ka sa tu e na kemudou maliwa e dua dou sa sega ni kila; sai koya oqo, sa muri au.”

Sa caramaka voli na sala ko Joni ena nona vakarautaki ira na tamata me vinaka na i tuvaki ni lomadra me ra ciqoma na Mesaia, ka na yaco me Tui. Sa kaya kina ko Joni me baleti Koya oqo: “Ko koya ena muri au mai sa levu cake vei keirau, ia na nonai vava ka’u sa sega ni yaga me’u kauta.” Na kena dina e kaya sara ga kina ko Joni: “Sa muri au e dua na tamata, sa uasivi cake vei au; ni sa liu vei keirau.”

O koya gona, na i tukutuku i Joni, “sa voleka na matanitu vakalomalagi,” me ra kila kina na lewe ni vanua ni cakacaka vakaitalatala ni Tui lumuti i Jiova, ko Jisu Karisito, e sa vakarau tekivu. Joni 1:6-8, 15-28; Maciu 3:1-12; Luke 3:1-18; Cakacaka 19:4.

▪ Na mataqali tamata vakacava ko Joni?

▪ Na cava e mai papitaisotaki ira kina na tamata ko Joni?

▪ Na cava sa rawa kina vei Joni me kaya ni sa voleka na Matanitu?