Wase e 19

Vakavulica e dua na Yalewa ni Samaria

ENA nodra i lakolako mai Jutia ki Kalili, era takosova yani na yasayasa vaka-Samaria ko Jisu kei na nona tisaipeli. Sa dadaga na yagodra ena taubale rauta na sigalevu tutu, era sa mai cegu toka ena dua na i keli wai ka koto volekata na koro ko Saika. A kelia ko Jekope na i keli wai oqo ena vica vata na senitiuri sa oti, e se tiko voli ga me yacova mai edaidai, ka koto volekata na koro levu ko Nablus ena gauna oqo.

Ena nona cegu voli e ke ko Jisu, sa ra lako yani nona tisaipeli ki na koro me ra volia mai e so na kakana. Ni sa mai taki wai e dua na yalewa ni Samaria, e kerea sara vua: “Solia mai vei au me’u gunu.”

Era sega ni dauveiriti na Jiu kei ira na kai Samaria me baleta na vakanananu titobu butobuto e tu vei ira. Ena dela ni kurabui, sa qai taroga na yalewa: “Ni ko sa kai Jutia, ko sa kerea vakacava vei au mo gunu, ni’u sa yalewa ni Samaria?”

“Kevaka ko sa kila,” e sauma yani ko Jisu, “sa kaya vei iko, Solia mai vei au me’u gunu; ko sa qai kerea vua, ka na solia vei iko ko koya na wai bula.”

Sa kaya vei koya na yalewa, “Sa sega, saka, na nomui takitaki, a sa titobu nai keli-wai: ko sa rawata maivei na wai bula oqori? ko sa uasivi cake beka vei Jekope, a tama i keimami, ko koya ka solia vei keimami nai keli-wai, ka gunu kina ko koya, kei iratou na luvena, kei na nona manumanu?”

“O koya yadua sa gunuva na wai oqo ena viagunu tale,” e vakamacalataka ko Jisu. “Ia ko koya sa gunuva na wai ka’u na solia vua, ena sega sara ni viagunu ka tawa mudu: ia na wai ka’u na solia vua, ena tu e na lomana me mata-ni-wai sa tovure ki na bula tawa mudu.”

Sa kaya vei koya na yalewa, “Solia saka, mai vei au na wai oqori, me’u kakua ni viagunu, se lako mai kike me’u taki.”

Sa kaya vua ko Jisu: “Laki kaciva na watimu, ka mo drau lako mai kike.”

“Sa sega na watiqu,” e sauma yani na yalewa.

E vakadinadinataka na vosa i yalewa ko Jisu. “Ko sa kaya dina, Sa sega na watimu: ni sa lewe lima na watimu eliu; ia ko koya drau sa tiko kaya oqo sa sega ni watimu.”

“Au sa qai kila, saka, sa dua na parofita koi kemuni,” e kidacala na yalewa ena nona kaya. Ena nona vakaraitaka na nona kauwai ena veika vakayalo, e kaya ni o ira na kai Samaria “era sa dausoro . . . e na ulu-ni-vanua oqo [ko Kirisimi, e toka volekata]; ia dou sa kaya [na Jiu], sa tu mai Jerusalemi na tikina e dodonu me da soro kina.”

Ia, na vanua me ia kina na sokalou, e sega ni ka me vakabibitaki, e dusimaka ko Jisu. “Ena lako mai na gauna,” e kaya ko Jisu, “era na lotu vakayalo ka vakaidina vei Tamada ko ira sa lotu dina; ni sa qara ko Tamada me vakaoqo ko ira sa lotu vua. A Yalo na Kalou: ia ko ira sa lotu vua, e dodonu me ra lotu vakayalo ka vakaidina.”

E lauti koya vakabibi na yalewa na ka oqo. “Au sa kila ni na lako mai na Mesaia (ko koya sa vakatokai na Karisito);” e kaya o koya. “Ni sa tadu mai ko koya, ena tukuna vei keda na ka kecega.”

“Sai au ga sa qai vosa tiko vei iko,” e tukuna vua ko Jisu. Mo vakasamataka mada! Na yalewa oqo ka mai taki wai ena sigalevu tutu, de dua a sega ni via sotavi ira na yalewa mai na koro era vakasisilataka na i vakarau ni nona bula, e vakurabuitaki na sala e lomani koya kina ko Jisu. A tukuna vakadodonu vua na yalewa na ka e se bera mada ni bau vakatusa vua e dua tale na tamata. Na cava e mani yaco kina?

Era Vakabauta e Vuqa na Kai Samaria

Sa ra lesu mai oqo na tisaipeli ena voli kakana mai Saika, ka kunei Jisu ena i keli ni wai i Jekope na vanua era a veibiu kina, ni veivosaki tiko oqo kei na dua na yalewa ni Samaria. Ni ra yaco yani na tisaipeli, sa lako na yalewa, ka biuta tu mai na nona saqa wai, ka lako yani ki na koro.

Ena titobu ni nona taleitaka na veika a tukuna vua ko Jisu, sa qai laki tukutuku na yalewa vei ira na tagane ena koro: “Dou mai bau laki raica na tamata, ko koya sa tukuna mai vei au ko koya na ka kecega ka’u a cakava.” Oti oqori ena sala e vakavurea na lomatarotaro, sa qai taroga: “Sai koya oqo na Karisito, se segai?” Sa vakayacori na i naki ni taro​—⁠ni ra lako yani na tagane me ra laki raica sara.

Ena gauna vata oqori, sa ra uqeti Jisu na tisaipeli me kania na kakana era laki volia mai na koro. E sauma yani o koya: “Sa tu vei au na kakana me’u kania, dou sa sega ni kila.”

Era veitarogi vakataki ira na tisaipeli, “Sa dua li na tamata e kau kakana mai vei koya?” Sa qai vakamacalataka ko Jisu: “A qau kakana me’u kitaka na loma i koya sa talai au mai; ka me’u vakaotia na nona cakacaka. Dou sa sega li ni kaya, sa vo e va na vula, me qai cava mai na yabaki?” Ia, sa qai dusimaka ko Jisu na tatamusuki vakayalo, ka vaka: “Dou ta cake, ka raica na veiwere, sa voleka ni matua na yabaki. Ia ko koya sa tamusuka sa saumi, ka binia na vuana ki na bula tawa mudu; me reki vata ko koya sa kaburaka kei koya sa tamusuka.”

Rairai sa raica rawa ko Jisu na cakayaco ni nodrau mai sota kei na yalewa ni Samaria​—⁠era yaco e lewe vuqa me ra vakabauti koya ena vosa i vakadinadina i koya na yalewa. E laki vakadinadina vei ira na lewe ni koro, ka vaka: “Sa tukuna mai vei au na ka kecega ka’u a cakava.” O koya oqo ena gauna sa ra lako mai vua na tagane ni Saika ki na i keli wai, era kerea me tiko mada ka tukuna e vuqa tale na ka vei ira. E vakadonuya nodra veisureti ko Jisu ka tiko e kea me rua tale na siga.

Ni ra sa rogoci Jisu tiko na kai Samaria, sa yaco e lewe vuqa vei ira me ra vakabauta. Era sa qai kaya vua na yalewa: “Keimami sa sega ni vakabauta e na vuku ni nomu vosa ga: ni keimami sa rogoca koi keimami, ka kila ni sai koya dina oqo na nodrai Vakabula na kai vuravura.” E solia na i vakaraitaki vinaka na yalewa ni Samaria, ena sala e rawa ni da vakadinadinataka kina na veika e baleti Karisito me tubu nodra via kila na vakarorogo me rawa ni ra tomana nodra vakasaqaqara!

Nanuma tiko ni vo e va na vula me ia kina na tatamusuki​—⁠rairai na tatamusuki ni parile, ka daucaka ena vula i tubutubu e Palesitaini. Rairai vula beka ko Noveba se Tiseba oqo. Sa kena i balebale ni veimuri kei na Lakosivia ni 30 S.K., era tiko voli mai Jutia me vula walu se sivia ko Jisu kei ira nona tisaipeli ni ra veivakatavulici ka veipapitaisotaki. Era sa lako yani oqo ki na nodra koro, na yalava mai Kalili. A cava beka e sa waraki ira tu mai kea? Joni 4:3-43.

▪ Na cava na vu ni nona kurabui na yalewa ni Samaria ni vosa vei koya ko Jisu?

▪ Na cava e vakatavulica ko Jisu vua na yalewa me baleta na wai bula kei na vanua me sokalou kina?

▪ E vakatakilai koya vakacava ko Jisu vua na yalewa, ia a cava e rui kurabuitaki kina na ka e vakatakila oqo?

▪ Na vakadinadina cava e vakayacora na yalewa ni Samaria ia na cava e mani yaco kina?

▪ E lako vata vakacava na tatamusuki kei na kakana i Jisu?

▪ E rawa ni da kila vakacava na balavu ni gauna e cakacaka vakaitalatala voli kina ko Jisu mai Jutia ni oti na Lakosivia ni 30 S.K.?