Wase e 21

Ena Valenilotu ena Koro i Jisu

E SEGA ni vakabekataki ni tubu na ue mai Nasareci ni sa lesu yani ena nona koro ko Jisu. Ni bera nona lako yani vei Joni me laki papitaiso ka sivia vakalailai oqo e dua na yabaki, e kilai ko Jisu ni dua na matai. Sa tete rabailevu oqo na nona kilai ni dua na daucakamana. Era gadreva vakalevu na lewe ni koro me ra raica me cakava e so na cakacaka veivakurabuitaki vakaoqo ena kedra maliwa.

E tubu na nodra nanamaki ni sa lako yani ko Jisu me vaka na nona i valavala ki na valenilotu. Ni sa ia tiko na lotu, sa qai duri cake o koya me wilika na i vola, ka soli sara vua na i vola vivigi i Aisea na parofita. Sa kunea o koya na tikina sa tukuni Koya sa lumuti ena yalo tabu i Jiova, na wase 61 ena noda i Vola Tabu ena gauna oqo.

Ni sa wilika oti na i valavala ni nona sereki ira na bobula o Koya oqo, na nodra rai tale na mataboko, kei na yabaki vinaka i Jiova, sa qai solia lesu na i vola vivigi vua na tuirara ka dabe sobu. Sa wanonovi koya matua na matadra kecega. E qai vosa cake o koya, rairai vosa balavu toka, ka vakamacalataka: “E na siga oqo sa vakayacori e na daligamudou nai Vola Tabu oqo.”

Era kurabui na tamata ena vuku ni “vosa vinaka” sa lako mai vua, era sa veikayaka: “Sa sega li ni luve i Josefa ko koya oqo?” Ni sa kila ni ra gadreva me ra raici koya me vakayacora na cakamana, sa qai tomana ko Jisu: “E dina ga dou na vosataka vei au nai bole oqo, Vu-ni-wai, mo vakabulai iko mada: a ka kecega keimami sa rogoca sa caka mai Kapenaumi, kitaka talega e na nomu vanua oqo.” E kena i rairai ni ra nanuma o ira era koro vata kei Jisu e liu ni dodonu me tekivu na veivakabulai mai na nona vanua, me yaga taumada vei ira na nona tamata. Era nanuma ni beci ira ko Jisu.

Ni sa kila na lomadra, sa qai vakamacalataka ko Jisu na veika sa yaco oti ka ganita me tukuna. Era sa lewe vuqa na yada i Isireli ena gauna i Ilaija, e kauta cake mai o koya, ia a sega ni dua vei ira oqo a talai yani kina ko Ilaija. Ia, a lako ga o koya vua na yada mai Saitoni e sega ni Isireli, ka laki vakayacora kina na cakamana ni veivakabulai. Ia ena gauna i Ilaisa era lewe vuqa kina na vukavuka, ia ko Ilaisa, a vakabulai Neamani ga na kai Siria.

Era cudru vakalevu sara ni ra sega ni vakadonuya na i vakatautauvata ni i volatukutuku e rua a yaco oqo ka vakavotuya nodra lomakocokoco kei na lailai ni nodra vakabauta, sa ra qai tucake o ira kecega ena valenilotu ka ra biligi Jisu yani ki na i bili ni koro. Ena vanua oqori era sa qai kauti koya ki na bati ni ulunivanua ka tara koto kina ko Nasareci, era saga me ra biliga yani ki na barinisavu. Ia e tasere rawa ko Jisu ka dro bula yani. Luke 4:16-30; 1 Tui 17:8-16; 2 Tui 5:8-14.

▪ Na cava e tubu kina na ue mai Nasareci?

▪ Na cava mada era nanuma na tamata ena vosa i Jisu, ia na cava e qai vakacudrui ira?

▪ Na cava era saga me ra cakava vei Jisu na tamata?