Wase e 22

Lewe Va na Tisaipeli Eratou Kacivi

NI SAGAI oti me vakamatei ko Jisu mai na nona koro ko Nasareci, sa qai toki yani o koya ki Kapenaumi ka koto volekata na Wasawasa ko Kalili. E vakayacori kina e dua tale na parofisai i Aisea. O koya ka tukuna vakailiu ni o ira na kai Kalili era vakoro voli ena baravi era na raica na rarama levu.

Nona kauta voli na rarama ko Jisu ena nona vunautaka na Matanitu ena vanua oqo, e kunei iratou kinae lewe va na nona tisaipeli. Eratou a dausalavata e liu kei koya ia, eratou sa lesuva tale nodratou cakacaka vagonedau ena gauna eratou a lesu vata mai kina kei Jisu ki Jutia. Rairai e sa vakasaqarai iratou ena gauna oqo ko Jisu, ni sa kena gauna me ra tu na dauveivukei ena gauna kece, me tuberi me ra vakayacora na cakacaka vakaitalatala ena gauna sa takali kina o koya.

Ena nona lako voli e baravi ko Jisu sa raici Saimoni Pita kei iratou na nona i tokani ni ratou vuya na lawa, e lako sara yani vei iratou. Sa vodoka o koya na waqa i Pita ka kerea me toro yani vakalailai ki wai. Ena gauna era sa yawa vakalailai mai vanua, sa qai dabe sobu ko Jisu ena waqa ka tekivu vakavulici ira na lewe vuqa mai baravi.

Oti oqori, sa qai kaya ko Jisu vei Pita: “Sudra yani ki wai titobu, ka dou viritaka sobu na nomudou lawa me rawa mai eso.”

“Turaga,” e sauma yani ko Pita, “keitou sa ia tiko e na bogi ka sigavaka, ka keitou sa sega ni rawata e dua na ka; ia e na vuku ni nomuni vosa, ka’u na viritaka sobu na lawa.”

Ena gauna sa biu sobu kina na lawa, e dua na qele ni ika levu eratou kovuta ka tekivu bote kina na lawa. Sa ratou yalovi iratou yani na nodratou i tokani era kele volekati iratou me ra mai vukei iratou. E sega ni dede sa vakasinaiti ruarua na waqa ena levu ni ika ka voleka ni luvu kina. Nona raica na veika oqo, sa cuva sobu ko Pita e mata i Jisu ka kaya: “Mo ni lako tani vei au, na Turaga; ni’u sa tamata ca.”

“Kakua ni rere,” e sauma ko Jisu. “E na veisiga maimuri ko na rawai ira na tamata.”

Sa sureti Adriu talega ko Jisu na taci Pita. “Drau muri au mai,” e uqeti rau, “ka’u na qisi kemudrau mo drau gonedau ni tamata.” Na nodrau i tokani gonedau ko Jemesa kei Joni, na luve i Sepete, e rau a sureti talega, e rau ciqoma vakatalega kina na veisureti e rau sega tale ni lomalomarua. Eratou biuta tu yani na nodratou cakacaka vagonedau na lewe va oqo ka yaco me ratou i matai ni lewe va eratou duru, ka i muri i Jisu. Luke 5:1-11; Maciu 4:13-22; Marika 1:16-20; Aisea 9:1, 2.

▪ Na cava e kacivi iratou kina na nona tisaipeli ko Jisu me ratou muri koya, ia o cei o iratou oqo?

▪ Na cakamana cava e vakarerei Pita?

▪ Na mataqali qoli ika cava e sureti iratou kina nona tisaipeli ko Jisu me ratou vakayacora?