Rairai o Jisu Vei Ratou na Dauqoli

Oti vakalailai nona rairai o Jisu vei ratou na yapositolo, e vinakata o Pita me lai qoli ena Wasa o Kalili. Eratou tomani koya o Tomasi, Jemesa, Joni, kei na vica tale na tisaipeli. Ratou qoli ena bogi taucoko, ia e sega ni dua na ka e rawa mai.

Ena matakalailai, eratou raica e dua na turaga e matasawa. E kailavaka yani vei ratou: ‘Sa rawa eso na ika?’ Ratou sauma: “Sega!” E kaya yani na turaga ya: ‘Dou biuta na lawa ena yasa imatau ni waqa.’ Ni ratou cakava qori, e coko e levu sara na ika, e dredre mada ga ni ratou dreta i loma ni waqa. E qai liaca o Joni ni turaga ya o Jisu, e kaya sara: “Na Turaga!” Sega ni bera ni lade i wai o Pita qai qalo i matasawa. Ratou muri yani na vo ni tisaipeli ena waqa.

Ni ratou yaco i matasawa, ratou raica ni sa tavu tu na madrai kei na ika. E kaya sara o Jisu me ratou kauta yani eso tale na ika. Oti e kaya: ‘Dou mai katalau.’

Ni ratou katalau oti, e tarogi Pita o Jisu: ‘O cei o lomana, o yau se na qoli?’ E kaya o Pita: “Turaga, oni kila niu lomani kemuni vakalevu.” E kaya o Jisu: “Vakani ira noqu lami.” E taro tale o Jisu: ‘O lomani au Pita?’ E sauma o Pita: ‘Turaga, oni kila vinaka niu lomani kemuni.’ E kaya o Jisu: “Vakatawani ira na noqu sipi lalai.” E taro o Jisu ena ikatolu ni gauna. E rarawa sara ga o Pita, e kaya: ‘Turaga, oni kila na ka kece. Oni kila vinaka niu lomani kemuni.’ E kaya vua o Jisu: “Vakani ira na noqu sipi lalai.” E tukuna tale: “Muri au tiko ga.”