Wase e 24

Na Vu ni Nona Lako Mai Vuravura ko Jisu

EOGAOGA sara ko Jisu kei iratou na lewe va na nona tisaipeli ena nodratou tiko voli e Kapenaumi, ni ra kauta mai na kai Kapenaumi na nodra tauvimate me ra vakabulai ena yakavibogi. Sa sega tale na gauna me baleti iratou.

Ia oqo na mataka caca ni siga ka tarava. Ni se bogi na vanua, sa duri cake ko Jisu ka lako duadua yani ki tautuba. Sa lako yani o koya ki na dua na yasana lala me rawa ni masu vei Tamana. Ia e lekaleka sara na nona gauna vakataki koya, ni sa kila ko Pita kei iratou na kena vo ni sa yali, eratou sa lako yani ka vakasaqarai koya.

Ni ratou sa kunei Jisu, sa qai kaya ko Pita: “Sa vakasaqarai kemuni na tamata kecega.” Era vinakata na kai Kapenaumi me tiko vata ga kei ira ko Jisu. E ka levu na nodra marautaka na veika sa vakayacora oti vei ira o koya! A lako li mai vuravura ko Jisu me mai cakava duadua ga na cakamana ni veivakabulai vaka o ya? Na cava e kaya o koya ena ka oqo?

Me vaka e volai tu ena dua na i vola ni i Vola Tabu, e sauma kina ko Jisu na nodratou vosa na nona tisaipeli: “Tou lako ki na veikoro sa voleka, me’u vunau talega kina: sa ka ga oqo ka’u sa lako mai kina.” E dina ga ni ra a vakamasuti Jisu na tamata me tiko vata kei ira, sa tukuna vei ira o koya: “Sa dodonu me’u lako me’u tukuna nai tukutuku-vinaka ni matanitu ni Kalou e na veikoro tani talega.”

Io, a lako mai vuravura ko Jisu me mai vunautaka na Matanitu ni Kalou ka na vakadinadinataka na yaca i Tamana ka walia vakadua na veimataqali leqa kecega ni tamata. Ia, me i vakadinadina ni a talai koya mai na Kalou, sa cakava kina ko Jisu na cakamana ni veivakabulai. E vakatalega kina ko Mosese ena vica na senitiuri yani ki liu, e a vakayacora na cakamana me vakadeitaka na nona i lesilesi me vaka na dauveiqaravi ni Kalou.

Ni sa biuti Kapenaumi oqo ko Jisu me vunau yani ki na veikoro tale e so, eratou salavata kei koya na lewe va na tisaipeli. O iratou na lewe va oqo ko Pita kei Adriu na tacina, ko Joni kei Jemesa na tacina. O rawa ni nanuma tiko ni dua na macawa yani ki liu eratou a sureti me i sevu ena nodratou dauveilakoyaki vata voli kei Jisu.

E lako vinaka sara na nodratou i lakolako ni cakacaka vakavunau mai Kalili ko Jisu kei iratou na lewe va nona tisaipeli! Sa rogovaki yani na dina ni i rogorogo ni nona cakacaka ki Siria taucoko. Sa lewe vuqa era muri Jisu kei iratou na nona tisaipeli mai Kalili, Jutia, kei na tai kadua ni Uciwai na Joritani. Marika 1:35-39; Luke 4:42, 43; Maciu 4:23-25; Lako Yani 4:1-9, 30, 31.

▪ Na cava e yaco ena mataka ni oti na siga e ogaoga vakalevu sara kina ko Jisu mai Kapenaumi?

▪ Na cava a talai mai kina ko Jisu ki vuravura, ia na cava na i naki ni nona vakayacora na cakamana?

▪ O cei eratou salavata kei Jisu ena nona cakacaka vakavunau mai Kalili, ia e vakacava na nodra ciqoma na nona cakacaka na tamata?