Wase e 16

Lomakatakata ena Sokalou vei Jiova

OIRATOU na taci Jisu vakacabecabe​—⁠na luvetagane i Meri tale e so​—⁠ko Jemesa, Josefa, Saimoni, kei Jutasa. Ni bera nodratou salavata kei Jisu o iratou kece oqo kei ira na tisaipeli ki Kapenaumi, e dua na koro ka koto volekata na Wasawasa ko Kalili, rairai eratou laki cegu ena nodratou vale mai Nasareci me rawa ni ratou vakarautaka na veika eratou via kauta.

Ia a cava me lako kina ki Kapenaumi ko Jisu ka sega ni vakayacora nona cakacaka vakaitalatala mai Kena, mai Nasareci, se dua tani tale na vanua ena veidelana mai Kalili? E dua na vuna ni ko Kapenaumi e koro kilai cake, e koro levu talega. E vuqa talega vei ira na tisaipeli vou i Jisu era vakaitikotiko mai Kapenaumi se volekata, era sega ni biuta kina nodra veivale ena gauna e vakatavulici ira kina o koya.

Nona tiko talega e Kapenaumi ko Jisu, a vakayacora e ke na cakacaka veivakurabuitaki, me vaka a qai vakadinadinataka ni oti tale e vica na vula ka tarava. Ia e sega ni dede sa ia tale na i lakolako i Jisu kei ira na nona i lawalawa. Sa vula i tubutubu oqo, era sa lako yani ki Jerusalemi me ra laki tikova na Lakosivia ni 30 S.K. Nodra tiko voli mai kea, era raica vei Jisu na nona tisaipeli e dua na i vakarau ni yalo era se sega mada ni bau raica e liu vua.

E gadrevi ena Lawa ni Kalou me ra cabora na i soro manumanu yavai va na Isireli. Me vakarawarawataki vei ira, ena vuku ni ka oqo era dauvolitaka na manumanu yavai va kei na manumanu vuka na dauveivoli ena loma i Jerusalemi. Ia era laki volitaka ena loma sara ga ni valenisoro, ka ra vakaisini ira na tamata ni ra saulevutaka.

E curumi Jisu na yalokatakata, sa qai cakava e dua na kuita wa qaliqali ka cemuri ira na dauvolivolitaki. Sa qai sovaraka yani na nodra i lavo era veisau i lavo ka vukica na nodra teveli. “Kauta tani na veika oqo!” e qolouvaka yani vei ira era volitaki ruve tiko. “Kakua ni cakava na vale nei Tamaqu me vale ni veivoli!”

Ni ra raica na tisaipeli i Jisu na veika oqo, era nanuma lesu sara na parofisai me baleta na Luve ni Kalou: “Sa kani au na loloma katakata ki na nomu vale.” Ia era sa qai taroga na Jiu: “A cava nai vakatakilakila ko sa vakatakila vei keitou, ni ko sa kitaka na veika oqo?” Sa qai sauma ko Jisu: “Dou talaraka na vale oqo, ka’u na qai tara vakaoti e na bogi e tolu.”

Era nanuma na Jiu ni vosataka tiko ko Jisu na valenisoro dina, era qai taroga: “A vale ni soro oqo sa vasagavulu ka mani ono na yabaki ni sa tara tiko; ia ko na tara vakaoti li e na bogi e tolu?” Ia na yagona na valenisoro e vosataka tiko ko Jisu. Era qai nanuma lesu tale na nona tisaipeli na veika oqo ni oti tale e tolu na yabaki, ni sa vakaturi oti mai na mate o koya. Joni 2:12-22; Maciu 13:55; Luke 4:23.

▪ Ni oti na vakamau mai Kena, na veivanua cava e veilakoyaki voli kina ko Jisu?

▪ Na cava e yalokatakata, ia na cava e qai vakayacora?

▪ Na cava era qai nanuma lesu na tisaipeli i Jisu ni ra sa raica na veika sa cakava?

▪ Na cava e kaya ko Jisu me baleta na “valenisoro oqo,” ia na cava na i balebale ni nona vosa?