Wase e 25

Yalololoma Vua e dua na Vukavuka

NI RATOU sikova yani na veikorokoro mai Kalili ko Jisu kei na lewe va na nona tisaipeli, sa tete vakavolivolita na rogo ni nona cakacaka veivakurabuitaki ena yasayasa o ya. Sa rogo yani na nona cakacaka ki na dua na koro e tiko voli kina e dua na tamata e tauvi vukavuka. E vakamacalataki koya na vuniwai ko Luke ni “roboti koya na vukavuka.” Na kakana ni mate rerevaki oqo, e yaco vakamalua me bulicaki vakatani kina e so na veitiki ni yago. Na tamata vukavuka oqo e sa tu ena dua na i tuvaki vakaloloma sara.

Ena nona yaco yani ki na koro ko Jisu, sa qai lako mai vua na tamata vukavuka. Ena i vakaro ni Lawa ni Kalou, me na kacivaka voli o koya ka tauvi vukavuka, “Au sega ni savasava! au sega ni savasava!” me taqomaki ira na tani me kakua ni ra toro volekati koya ni rerevaki ka rawa ni veidewavi. Sa cuva vakatoboicu na vukavuka ka vakamasuti Jisu: “Turaga, kevaka ko ni sa vinakata, ko ni sa vakasavasavataki au rawa.”

Sa ka levu dina na nona vakabauti Jisu na tagane oqo! Ia, sa rairai vakaloloma dina ni tauva na mate oqo! Na cava ena vakayacora ko Jisu? A cava mada o na vakayacora? E luvuci koya na nona yalololoma, sa qai dodoka yani na ligana ko Jisu ka tara na tagane, ka kaya: “Au sa vinakata: mo savasava mai.” Sa takali vakasauri mai vua na vukavuka.

O gadreva li me nomu tui e dua ka dauyalololoma me vakataki koya oqo? Na i valavala ni ka e vakayacora oqo ko Jisu vua na vukavuka e vakadeitaka vei keda, ena veiliutaki ni Nona Matanitu, ena vakayacori kina na parofisai ena i Vola Tabu: “Ena lomana ko koya na tamata malumalumu ka dravudravua, Ka vakabula na yalodra na dravudravua.” Io, ena qai vakayacora ena gauna oqori ko Jisu na gagadre ni lomana me vukei ira kecega na tamata era sa vakararawataki.

Ni bera mada ga nona vakabulai na vukavuka, sa bau vakavuna na ue levu vei ira na tamata na cakacaka vakaitalatala i Jisu. Me i vakayaco ni parofisai i Aisea, sa qai vakaroti koya na tagane sa vakabulai oqori ko Jisu: “Mo kakua ni laki tukuna vua e dua.” Sa qai vakasalataki koya: “Mo laki vakaraitaki iko vua na bete, ka vakacabora na ka sa vakarota ko Mosese me nomui vakasavasavataki, mei vakadinadina vei ira.”

Ia e rui marau vakalevu na tamata ka sega ni kinoca rawa e lomana na cakamana sa qai yaco. Sa qai lako yani o koya ka tekivu vakatetea na kena i tukutuku e veivanua kecega, ka rairai vakavurea me taleitaki vakalevu ka ra via kila na tamata, sa dredre kina vei Jisu me curu votu ki na dua na koro. Sa qai tiko voli ga ko Jisu ena veiyasana lala era sega ni tiko kina na tamata, ka ra lako mai na veiyasana kecega me ra mai rogoci koya me ra vakabulai talega mai na nodra tauvimate. Luke 5:12-16; Marika 1:40-45; Maciu 8:2-4; Vunau Ni Soro 13:45; 14:10-13; Same 72:13; Aisea 42:1, 2.

▪ E vakacava na kena daukakana na vukavuka, ia na cava me daukacivaka voli na vukavuka?

▪ E vakacava na i valavala ni nona vakamasuti Jisu na vukavuka, ia na cava e rawa ni da vulica ena nona sauma ko Jisu?

▪ E yaco vakacava nona sega ni muria na vosa i Jisu na tagane oqo a vakabulai, ia na cava e mani yaco kina?