Vakabula na Vukavuka

E vaka e kama na veigasau na irogorogo ni veika veivakurabuitaki e cakava o Jisu, ni ratou lai vunau kei na va nona tisaipeli ena “valenilotu ena yasayasa taucoko o Kalili.” (Marika 1:39) E yaco sara na irogorogo qori ina dua na korolevu e tiko kina e dua e tauvi vukavuka. E tukuna na vuniwai o Luke ni “vukavuka na yagona taucoko.” (Luke 5:12) Ni kakana na mate rerevaki qo, e rawa sara ga ni bulicaki vakatani eso na tikiniyago.

E vakaloloma dina na vukavuka qori qai dodonu me tiko taudua ga. Ni volekati ira eso tale, ena kacivaka: “Dukadukali, dukadukali!” mera taqomaki kina mai na kena rawa ni dewavi ira na mate. (Vunau ni Soro 13:45, 46) Ia na cava e cakava na vukavuka qo? E torovi Jisu yani, e cuva vua qai vakamamasu: “Turaga, ke oni vinakata, ni vakasavasavataki au mada.”​—Maciu 8:2.

E vakasakiti dina nona vakabauti Jisu na tagane qo! Sa na rairai vakaloloma mada ga ena vuku ni kena mate! Na cava ena vakayacora o Jisu? Na cava mada o na vakayacora ke o tiko e kea? Ena levu ni nona loloma, e dodoka na ligana o Jisu me tarai koya. E kaya vua o Jisu: “Au vinakata! Mo savasava mai.” (Maciu 8:3) Ena rairai dredre mera vakabauta eso na kena yali vakasauri na nona vukavuka na tagane ya.

Vakacava o na taleitaka me nomu tui e dua e yalololoma qai tu vua na kaukaua me vakataki Jisu? Na ka e vakayacora o Jisu vua na vukavuka e vakadeitaka vei keda ni na vakayacori na parofisai vakaivolatabu qo ni sa veiliutaki e vuravura taucoko: “Ena lomani ira na vakaloloma kei na dravudravua. Ena vakabula tale ga na dravudravua.” (Same 72:13) Io, ena qai vakayacora ena gauna qori o Jisu na lomana, me vukei ira kece era rarawa tu.

O se rairai nanuma tiko ni se bera mada ga ni vakabulai na vukavuka, sa vakavu maue rawa tiko ena levu na vanua na cakacaka vakaitalatala i Jisu. Sa qai wacava mera rogoca na ka vakatubuqoroqoro e cakava qo. Ia e sega ni vinakata o Jisu mera vakabauti koya ga na lewenivanua ena vuku ni ka era rogoca. E kila vinaka tu ni na sega ni veivakurabuitaki na kena vakayacori na parofisai e tukuni kina ni na “sega ni rogo na domona e gaunisala.” (Aisea 42:1, 2) E mani vakarota na tagane vukavuka o Jisu: “Kua mada ni lai talanoataka vua e dua, mo lai vakaraitaki iko ga vua na bete, mo qai cabora na isolisoli e vakarota o Mosese, me ivakadinadina vei ira.”​—Maciu 8:4.

Ia ena levu ni nona marau na tagane qo ni sa vakabulai, e sega ni kinoca rawa e lomana na ka e yaco vua. E lai talanoataka wavoki na ka kece e yaco. Na levu ni kena vakavu kauai qori kei na lomatarotaro, sa sega wale ga ni doudou kina o Jisu me lako ina koro. Ia era se tabili ga yani vua na lewenivanua mera lai rogoci koya, ra vakabulai tale ga mai na kedra mate.