Wase e 27

Na Kacivi i Maciu

E SEGA soti ni dede mai na vakabulai ni tamata paralasi, sa qai lako tani mai Kapenaumi ko Jisu ki na Wasawasa ko Kalili. Era baci lako tale mai vua na lewe vuqa, ka tekivu vakatavulici ira. Ni sa lako yani ko Jisu, sa raici Maciu, na yacana talega ko Livai, sa dabe tiko ena vale ni soli i vakacavacava. “Muri au,” na veisureti i Jisu.

Sa rairai kila oti ko Maciu na i vakavuvuli i Jisu, me vakataki Pita, Adriu, Jemesa kei Joni ena gauna a kacivi iratou kina. Ia e tautauvata kei iratou, ni sega ni bera nona ciqoma na veisureti ko Maciu. Sa duri cake, ka vakanadakuya na nona i tavi vakadaukumuni i vakacavacava, ka muri Jisu.

Sa qai vakarautaka ko Maciu e dua na magiti levu ena nona vale me marautaka beka na nona ciqoma na veikacivi. Era tikovata kei Jisu kei ira na nona tisaipeli o ira talega na i tokani makawa i Maciu. Era daucati vakalevu sara mai vei ira na nodra i lawalawa Jiu o ira oqo ni ra daukumuna na i vakacavacava vei ira na i liuliu sevaki mai Roma. Kuria o ya, na nodra daulavaka vakasivia ena lawaki na i lavo dodonu me soli ena i vakacavacava.

Nodra vakadikevi Jisu ena nona mai tiko vata kei ira na tamata vakaoqori ena magiti levu, sa ra qai tarogi ira na nona tisaipeli na Farisi: “A cava sa kana vata kina nomudoui vakavuvuli kei ira sa kumuna nai vakacavacava kei ira na tamatai valavala ca?” Ni rogoca na taro ko Jisu, sa qai sauma vei ira na Farisi: “Sa sega ni yaga na vu-ni-wai vei ira sa bula vinaka, vei ira ga sa tauvimate: ia dou laki vulica nai balebale ni vosa oqo, Au sa vinakata na yalololoma, ka segai nai soro; ni ka’u sa sega ni lako mai me’u kacivi ira na yalododonu, ko ira ga nai valavala ca.”

Rairai e kacivi ira mai na daukumuni i vakacavacava ko Maciu ki na nona vale me rawa ni ra vakarorogo vei Jisu ka me ra vakabulai talega vakayalo. Na nona veimaliwai kei ira ko Jisu me vukea me rawa ni ra veiwekani savasava kei koya na Kalou. E sega ni beci ira ko Jisu, me vakataki ira na Farisi era via yalododonu. Ena nona yalololoma, sa yaco o koya me vaka na nodra vuniwai vakayalo.

Na cakacaka yalololoma i Jisu vei ira na i valavala ca e sega ni raibaleta na nodra i valavala ca ia, na i vakaraitaki ni loloma vata ga a vakaraitaka vei ira na tamata tauvimate vakayago. Me kena i vakaraitaki, mo nanuma lesu mada ena nona yalololoma, sa tara na vukavuka, ka kaya: “Au sa vinakata: mo savasava mai.” Me da dauloloma tale mada ga ena noda vukei ira era gadreva na veivukei, vakauasivi na noda vukei ira vakayalo. Maciu 8:3; 9:9-13; Marika 2:13-17; Luke 5:27-32.

▪ A tiko voli e vei ko Maciu ena gauna e raici koya kina ko Jisu?

▪ Na cava na cakacaka i Maciu, ia ena vuku ni cava era daucati ira kina na tamata vakaoqo e so na Jiu?

▪ Na cava e kudruvaki me baleti Jisu, ia e qai sauma vakacava o koya?

▪ Na cava e laki veimaliwai kina ko Jisu kei ira na tamata i valavala ca?