Wase e 85

Vakasaqarai Ira Era sa Yali

E GU na yalo i Jisu me qarai ira ka kunei ira era na yaco me ra mai qarava na Kalou ena yalomalumalumu. Sa qai vakasaqaqara yani ka tukuna vei ira na tamata kecega na veika ni Matanitu, ka vauci talega kina o ira era kilai levu ena vuku ni nodra i valavala ca. Sa ra qai toro voleka mai na tamata oqo me ra rogoci koya.

Ena nodra vakaraica oqo na Farisi kei ira na vunivola era sa vakalewai koya, ni laki veimaliwai voli kei ira na tamata beci. Sa ra qai vosa kudrukudru: “Ko koya oqo sa veilasamaki vata kei ira na tamata ca, ka kana vata kei ira.” E rui ka lolovira dina vei ira o ya! Ena nodra rai na Farisi kei na vunivola era vaka na soso ena ruku ni yavadra o ira na tamata tauvanua. Na kena dina ni ra taurivaka na i cavucavuti vaka-Iperiu ‛am ha·’aʹrets, “na tauvanua” me i vakaraitaki ni nodra beci ira.

Ena yasana ka dua, ko Jisu e kauwaitaki ira yadua na tamata ena i valavala vakaturaga, ena yalovinaka, ka dauveinanumi. Sa qai yaco e lewe vuqa vei ira na yalomalumalumu oqo, okati kina na tamata era kilai levu ni ra i valavala ca, me gu na lomadra me ra vakarogoci koya. Ia e vakacava na nodra vakalewai Jisu na Farisi ena nona nanumi ira na tamata beci?

E sauma ko Jisu na nodra i le ena nona taurivaka e dua na vosa vakatautauvata. E vosa sara ga o koya mai na i tovo ni nodra rai na Farisi, me vaka era yalododonu ka ra taqomaki tiko ena lomanibai ni Kalou, ia o ira na tauvanua lolovira oqo na ‛am ha·’aʹrets era lakosese tu ena dua na i tutu me vaka era sa yali. Vakarogoca mada ena nona taroga:

“Kevaka e dua vei kemuni e dua na drau na nona sipi, ka qai yali e dua vei ira; e na sega li ni laivi ira tu na lewe ciwasagavulukaciwa e na vanua veico, ka la’ki vakasaqara na le dua ka yali me yacova sara ni sa kunea? Ia ni sa kunea, sa biuta ki na usouso ni domona ka colata lesu e na mamarau. Ni sa yaco ki na nona vale, sa qai kacivi ira vata yani na nona i tokani kei ira ka tiko voleka ka kaya vei ira, Me da mai reki vata mada, ni’u sa kunea tale na noqu sipi ka a yali.”

Sa qai tukuna ko Jisu na i balebale ni nona i talanoa, ka vakamacalataka: “Au sa kaya vei kemuni, e na vaka kina na levu ni reki mai lomalagi e na vukuna e dua bau ga na tamata i valavala ca sa veivutuni, ka sega soti e na vukudra na lewe ciwasagavulukaciwa na tamata yalo dodonu ka sega ni yaga me ra veivutuni.”

O ira na Farisi era nanuma ni ra yalododonu ka sega ni gadrevi me ra veivutuni. Ni so vei ira era vakalewai Jisu ena vica na yabaki yani ki liu, ena nona kana vata voli kei ira na daukumuni i vakacavacava, kei ira na i valavala ca, a tukuna vei ira o koya: “Ni’u sa sega ni lako mai me’u kacivi ira na yalododonu, ko ira ga na i valavala ca.” Era sega ni vakavuna na reki mai lomalagi na Farisi viavia yalododonu e na nodra sega ni raica rawa na kena gadrevi vei ira me ra veivutuni. Ia era rawata o ira na tamata i valavala ca era veivutuni dina.

Me vakabibitaka na dina ni kena vakavureki sara vakalevu nodra vakalesui mai na i valavala ca sa yali, e tukuna kina ko Jisu e dua tale na vosa vakatautauvata. E kaya: “Kevaka e dua na yalewa e tini na nona tiki ni siliva ka qai vakayalia e dua, e na sega li ni tutuvaka na cina ka taviraka na vale, ka vakasaqara matua sara me yacova sara ni sa kunea? Ia ni sa kunea sa kacivi ira vata mai na nona i tokani kei ira ka tiko voleka, ka kaya, Me da mai reki vata mada, ni’u sa kunea tale na tiki ni siliva ka’u a vakayalia.”

E tautauvata na nona vakaibalebaletaka ko Jisu. Ni tomana ka vaka: “Au sa kaya vei kemuni ni sa tubu vaka kina na reki e na matadra na agilosi ni Kalou e na vuku ni dua bau ga na tamata i valavala ca sa veivutuni.”

Sa vakatubuqoroqoro dina na nodra veikauwaitaki yalololoma na agilosi ni Kalou ena nodra vakalesui mai na tamata i valavala ca era sa yali! E vakauasivi oqo vei ira na ‛am ha·’aʹrets beci ka cati tu e liu, baleta ni sa dolavi vei ira me ra okati me ra lewe ni Matanitu vakalomalagi ni Kalou. Era na rawata kina e dua na i tutu mai lomalagi e cecere cake mai vei ira sara ga na agilosi! Ia era sega ni bau vuvu se nanuma ni ra beci kina na agilosi, era marautaka ga ena dela ni yalomalumalumu ni o ira na tamata i valavala ca oqo, era a sotava ka tutaka rawa na veituvaki ena nodra bula ka vakaiyaragitaki ira kina me ra tui ka bete yalololoma ka dauveinanumi mai lomalagi. Luke 15:1-10; Maciu 9:13; 1 Koronica 6:2, 3; Vakatakila 20:6.

▪ Ena vuku ni cava e laki veimaliwai voli kina ko Jisu kei ira sa kilai levu tu ni ra i valavala ca, ia era vakalewai koya vakacava kina na Farisi?

▪ Era raici ira vakacava na tauvanua na Farisi?

▪ Na vosa vakatautauvata cava soti e taurivaka ko Jisu, ia na cava e rawa ni da vulica mai kina?

▪ Na cava e rui vakatubuqoroqoro kina nodra yalorekireki na agilosi?