Wase e 28

Vakatarogi ena Vuku ni Lolo

SA VOLEKA ni oti e dua na yabaki na nona a tikova ko Jisu na Lakosivia ena 30 S.K. Ena gauna oqo sa vula vica vata nona bala ki valeniveivesu ko Joni na Dauveipapitaiso. E dina ga ni gadreva voli o koya me ra mai muri Karisito na nona tisaipeli, ia era sega ga ni yaco me ra mai muri koya kece.

E so gona vei ira oqo na tisaipeli i Joni ka vesuki tu era lako mai vei Jisu ka taroga: “A cava sa lolo vakavuqa kina koi keimami kei ira na Farisi, ia na nomu tisaipeli era sa sega ni lolo?” O ira na Farisi era daulolo vakarua e veimacawa ena i vakarau ni nodra ka vakalotu. Ia era muria tale beka ga na tisaipeli i Joni na kena i vakarau e via tautauvata. De rairai era lolo talega ena nodra rarawataka na bala i Joni ki valeniveivesu ka ra vakananuma na cava era sega ni duavata kina na tisaipeli i Jisu me ra vakaraitaka na nodra lomabibi.

Sa qai vakamacalataka ko Jisu ena nona sauma: “Era sa tagi rawa li na weka ni tagane sa qai vakawati, ni sa tiko vata kei ira na tagane sa qai vakawati? ena yaco mai na siga, ena kau tani kina vei ira na tagane sa qai vakawati, ka ra na qai lolo.”

E dodonu me ra nanuma lesu na tisaipeli i Joni ni tukuni Jisu sara ga ko Joni ni Tagane sa qai Vakawati. Ni se tiko voli ko Jisu, e sega ni vakasamataka ko Joni ni kilikili me lolo, eratou sega ni vakasamataka talega vakakina na tisaipeli i Jisu. E muri ena gauna sa mate kina ko Jisu, eratou na qai tagicaka na nona tisaipeli ka lolo. Ia ena gauna sa vakaturi kina mai na mate ka cabe cake ki lomalagi, e sega na vuna me ratou qai lolo ni vakaloloku.

E tukuna tarava e dua na vosa vakatautauvata ko Jisu: “Sa sega na tamata sa cula vata na tiki ni sulu vou kei nai sulu madra, ni sa dresuka nai sulu na tikina sa botani kina, a sa qai kadresu vakalevu kina. Sa sega talega e dua sa vakataloca na waini vou ki na tavaya kuli-ni-manumanu madra: de kacabote na tavaya, ka sa dave yani na waini, ka sa ca na tavaya: ia era sa vakataloca na waini vou ki na tavaya vou.” Ia e lakovata vakaevei na vosa vakatautauvata oqo kei na lolo?

A vukei iratou na tisaipeli i Joni na Dauveipapitaiso ko Jisu me ratou kila tiko ni na sega ni yaco me mai nona i muri e dua kevaka e muria voli na nodra i valavala makawa na Jiu, me vaka na daulolo. E sega ni lako mai me mai botana na i vakarau madra ni sokalou ka sa vakarau me tababokoci. Ena sega ni lewai na lotu va-Karisito me na mai lakolako vata kei na lotu vaka-Jiu ena gauna o ya kei na kena i vakavuvuli vakatamata. E sega, ni na sega ni vaka e dua na i botani vou ena i sulu madra se vaka na waini vou ena kuli ni manumanu madra. Maciu 9:14-17; Marika 2:18-22; Luke 5:33-39; Joni 3:27-29.

▪ O cei era dauvakaivalavalataki ira ena lolo, ia na cava na kena i naki?

▪ Ena vuku ni cava era sega ni lolo kina na tisaipeli i Jisu ni bula vata voli kei ira o koya, ia ena sega ni dede me qai takali tani vakacava na veika e dauvakavuna na lolo?

▪ Na vosa vakatautauvata cava sa qai tukuna ko Jisu, ia na cava na kedrau i balebale?