Vuna Eratou Sega ni Lolo Kina na Tisaipeli i Jisu

A bala e valeniveivesu o Joni na Dauveipapitaisotaki ni oti vakalailai ga na Lakosivia ni 30 G.V. a tiko kina o Jisu. E vinakata o Joni mera imuri i Jisu na nona tisaipeli, ia e vica ga era cakava qori ni sa bala e valeniveivesu o Joni.

Sa voleka qo na Lakosivia ni 31 G.V., era gole yani vei Jisu eso na tisaipeli i Joni ra qai taroga: “Na cava keimami lolo kina kei ira na Farisi, ia era sega ni lolo nomuni tisaipeli?” (Maciu 9:14) E ivakarau vakalotu vei ira na Farisi na lolo. A vakayagataka ena dua na gauna o Jisu na ivakatautauvata e masuta kina e dua na Farisi viavia yalododonu: “Kemuni na Kalou, au vakavinavinaka vei kemuni niu sega ni vakataki ira na so . . . Au lolo vakarua ena dua na macawa, au solia na ikatini ni ka kece au rawata.” (Luke 18:11, 12) Era rairai okata tale ga na lolo na tisaipeli i Joni me dua na ivakarau se ra lolo nira rarawataka nona bala e valeniveivesu o Joni. Era vaqaqa kina eso se cava ratou sega ni lolo kina na tisaipeli i Jisu, me ivakaraitaki ni nodratou rarawataka na ka e caka vei Joni.

E vakamacalataka qori o Jisu ni vakayagataka e dua na ivakaraitaki: “Vakacava, era na rarawa na itokani ni taganevou ni se tiko vata ga kei ira? Ia ena yaco mai na gauna ena kau tani vei ira na taganevou, ya na gauna era na qai lolo kina.”​—Maciu 9:15.

E tukuni Jisu sara ga o Joni me taganevou. (Joni 3:28, 29) Ni se tiko o Jisu, eratou na sega ni lolo nona tisaipeli. Ni sa mate o Jisu, eratou na tagi na nona tisaipeli, ratou sega tale ga ni via kana. Ia ni sa vakaturi, sa na oti na tagi kei na lolo.

E tukuna sara o Jisu e rua na vosa vakatautauvata: “E sega ni dua e dau cula na tikinisulu vou ena isulu makawa, ni rau na sega ni veitauri vinaka na isulu makawa kei na tikinisulu vou, ena lai kadresu kina vakalevu. E sega tale ga ni dua e dau tawana na waini vou ena taganiwaini makawa, ke cakava qori, ena kabote na taganiwaini, ena tasova na waini, ena ca tale ga na kena taga. E dau tawa ga na waini vou ena taganiwaini vou, ena vinaka tiko ga kina na waini kei na kena taga.” (Maciu 9:16, 17) Cava e vakabibitaka e keri o Jisu?

E vukei ratou tiko na tisaipeli i Joni na Dauveipapitaisotaki o Jisu me ratou kua ni namaka mera muria nona tisaipeli na ivakarau makawa vakaJiu, me vaka na lolo. E sega ni lako mai me mai botana se yaraka na kena muri na ivakarau makawa ni sokalou sa vakarau kau laivi. E sega ni uqeta tale ga o Jisu na sokalou e muri kina na ivakarau vakaJiu ena gauna ya, kei na kena ivakavuvuli vakatamata. Ke cakava qori, sa vaka ga e cula na tikinisulu vou ena isulu makawa se tawana na waini vou ena taganiwaini makawa.