Wase e 32

Na Cava li e Vakatarai ena Siga ni Vakacecegu?

E DUA tale na Siga ni Vakacecegu me baci sikova ko Jisu e dua na valenilotu ka volekata na Wasawasa ko Kalili. E tiko voli e kea e dua na tamata sa malai na ligana i matau. Era wanonova matua na vunivola kei ira na Farisi se na baci vakabulai koya tale ko Jisu. Sa ra qai taroga: “Sa tara beka me ia na veivakabulai e na siga ni vakacecegu?”

Era vakabauta na nodra i liuliu vakalotu na Jiu ni dodonu me ia na veivakabulai ena Siga ni Vakacecegu kevaka e leqataki vakaca sara na bula. Me kena i vakaraitaki, era vakatavuvulitaka ni tabu vakalawa ena Siga ni Vakacecegu me vakadodonutaki na sui se vadretitaki e dua na qiawavuki. Era a qai vakatarogi Jisu kina na vunivola kei ira na Farisi ena nodra via beitaki koya.

Ia, e sa kila na nanuma ni lomadra ko Jisu. Ena gauna vata oqori, sa qai macala vua ni ra sa dei tu o ira ena rai e veicalati sara ga ka sega ni vaka i Vola Tabu me baleta na veika e vauca na kena voroki na lawa e vakatabui kina na cakacaka ena Siga ni Vakacecegu. Sa navuca gona ko Jisu na i tuvaki ni nona tusaqati ira ka tukuna vua na tagane sa malai na ligana: “Tu cake, ka wavu tu e na kedra maliwa.”

Sa qai vuki ko Jisu vei ira na vunivola kei na Farisi, ka kaya: “O cei vei kemudou, kevaka e dua na nona sipi sa lutu ki na davuke e na siga ni vakacecegu, e na sega ni laki taura, ka tubera cake mai?” Me vaka ni i vurevure tiko ni i lavo na sipi, ena sega kina ni rawa vei ira me ra biuta tu oqori ena davuke me yacova na siga ka tarava, de rairai tauvimate ka vakavuna nodra lusi. Me kuria e kaya na i Vola Tabu: “Na tamata yalododonu sa maroroya na bula ni nona manumanu.”

Sa qai tomana ko Jisu ena nona kauta cake mai e dua na i vakatautauvata: “Ka vakaevei na kena uasivi cake na tamata e na sipi! O koya gona oqo sa tara kina me caka na ka vinaka e na siga ni vakacecegu.” Era sega ni sauma rawa na i liuliu vakalotu na vakasama vakayalololoma, vukutaki vaka o ya, ka ra mani galu ga.

Sa qai veiraiyaki ko Jisu ena cudru kei na rarawa ni lomana ena vuku ni sese ni lomadra. E kaya sara vua na tagane: “Dodoka mai na ligamu.” Sa dodoka yani na ligana ka vakabulai.

Era sega ni marautaka na Farisi ni sa vakabulai na ligana na tagane, ia era lako totolo yani ka ra bukia na vere vei ira na i lawalawa i Eroti me vakamatei ko Jisu. E kena i rairai ni i lawalawa vakapolitiki oqo era lewena talega na i lawalawa vakalotu na Setoki. Na i lawalawa vakapolitiki oqo kei ira na Farisi era dauveisaqasaqa vakalevu, ia e kaukauwa sara nodrau duavata ni tusaqati Jisu. Maciu 12:9-14; Marika 3:1-6; Luke 6:6-11; Vosa Vakaibalebale 12:10; Lako Yani 20:8-10.

▪ Na cava na i tuvaki ena vakasota kina ko Jisu kei ira na nodra i liuliu vakalotu na Jiu?

▪ Na cava mada era vakabauta na nodra i liuliu ni lotu na Jiu me baleta na veivakabulai ena Siga ni Vakacecegu?

▪ Na i vakatautauvata cava e taurivaka ko Jisu me vakalasuya kina na nodra vakasama?