Wase e 33
Vakayacora na Parofisai i Aisea
NI SA kila ko Jisu ni ra saga na Farisi kei ira na i lawalawa i Eroti me ra vakamatei koya, sa qai lako o koya kei iratou na nona tisaipeli ki na Wasawasa ko Kalili. Era soqo mai vua e ke na i lawalawa tamata levu mai na vanua taucoko ko Palesitaina, vaka sara talega kina o ira mai na taudaku ni vanua oqo. Sa vakabulai ira na lewe vuqa o koya, sa qai yaco me ra via toso kece ki liu o ira ka tauvimate bibi sara ena nodra via tarai koya.
Ni ra rui lewe vuqa na tamata, sa qai tukuna vei iratou na nona tisaipeli ko Jisu me dau tiko vakarawarawa vua ena gauna taucoko e dua na waqa. Ni toso vakalailai tani mai vanua, era na sega ni drigiti koya rawa kina na lewe vuqa. Sa rawa ni vakatavulici ira ena nona tiko mai waqa se vodo yani ki na dua tale na vanua ena kena veibaravi me vukei ira na tamata mai kea.
E raica rawa na tisaipeli ko Maciu ni cakacaka i Jisu e mai vakayacora “na vosa sa tukuna ko Aisea na parofita.” Sa qai vola ko Maciu na parofisai e sa mai vakayacora ko Jisu:
“Raica, na noqui talatala, ko koya ka’u a digitaka; na noqu gone ni toko, au sa vinakati koya vakalevu e na vu ni lomaqu: Au na solia vei koya na noqu yalo tabu, ia ena tukuna ko koya na lewa dodonu vei ira na veimatanitu tani: Ena sega ni veileti, se domolevu; ena sega e dua ena rogoca na domona e na saqata-ni-koro: Ena sega ni musuka na gasau sa bibivoro ko koya, se bokoca na wa-ni-cina e kubou walega, ka me tala mada yani na lewa dodonu me gumatua: A ra na vakararavi ki na yacana ko ira na veimatanitu tani.”
Ni sa i Jisu, na i talatala lomani sa vinakata na Kalou. Ia, e vakamakaretaka vinaka ko Jisu na lewa dodonu, ka vakabuawataki tu ena i vakavuvuli lasu vakalotu. Na nodra vakayagataka vakatawadodonu na lawa ni Kalou, e sega mada ga ni ra vukea na tamata tauvimate na Farisi ena Siga ni Vakacecegu! Ena nona vakamakaretaka na lewa dodonu ni Kalou, e vakacegui ira kina na tamata ko Jisu mai na i colacola bibi ni i vakavuvuli tawadodonu, ia ena vuku ni ka oqo, era via vakamatei koya kina na i liuliu ni lotu.
Na cava mada na i balebale ni ‘na sega ni veileti, se domolevu, ena sega e dua me rogoca na domona ena saqata-ni-koro’? Ni sa vakabulai ira na tamata ko Jisu, ‘e dauvakarota matua vei ira me ra kakua sara ni tukuni koya.’ E sega ni vinakata me karakaravisa na kacivaki ni veika e baleti koya e salatu se vakatanitaki na kena i rogorogo ni vakadewataki mai na gusu e dua ki na dua tale.
E kauta talega yani ko Jisu na nona i tukutuku veivakacegui vei ira era vaka na gasau sa bibivoro, e kala sobu mai ka buturaki. Era sa vaka na wa-ni-cina e kubou walega ka sa voleka sara ni boko. E sega ni mai buturaki ira na gasau era bibivoro ko Jisu se bokoca na cina sa voleka sara ni boko. Ia ena vuku ni nona yalomalumalumu kei na loloma, e maqosa nona laveti ira cake na yalomalua. Sa dina, ni sa i Jisu o koya me ra na vakararavi vua na veimatanitu! Maciu 12:15-21; Marika 3:7-12; Aisea 42:1-4.
▪ E yaco vakacava me vakamakaretaka ko Jisu na lewa dodonu, ena sega ni veileti se rogoci na domona ena saqata-ni-koro?
▪ O cei era vakatauvatani me vaka na gasau sa bibivoro kei na wa-ni-cina, ia e vakaevei na i valavala ni nona qaravi ira ko Jisu?