Wase e 39

O Ira na Yalodokadoka kei na Yalomalumalumu

NI VAKAMACALATAKA oti ko Jisu na i tovo uasivi i Joni na Dauveipapitaiso, sa qai golevi ira na tamata yalodokadoka ka ra yamekemeke era tiko vakavolivoliti koya. “Nai tabatamata oqo,” e tukuna o koya, “Sa tautauvata kei ira na gone sa tiko e na rara ni veivoli, ka kaci yani vei ira era sa tiko vata kei ira, ka kaya, Keitou a uvu bitu vei kemudou, ka dou a sega ni meke; keitou a tagi vei kemudou, ka dou a sega ni tagiyaso.”

Na cava mada na i balebale ni vosa i Jisu? E vakamacalataka o koya: “Sa lako mai ko Joni ka sega ni daukana se daugunu, a ra sa kaya, Sa tiko vua e dua na tevoro. Sa lako mai na Luve ni tamata, a sa kana ka gunu, a ra sa kaya, Raica, a tamata daukana ka daugunu waini, a nodrai tau era kumuna nai vakacavacava, kei ira na tamatai valavala ca.”

E rui ka dredre me vakacegui na lomadra na tamata. E sega ni tu e dua na ka me na vakalomavinakataki ira. E bula ko Joni ena dua na i vakarau ni bula e dredre sara ena vakuai koya mai na veika me vaka e dua na Nasaraiti, ena nona muria na i vakaro ni agilosi me “kana ka na sega ni gunu waini se na yaqona.” Ia era qai kaya na tamata ni tiko vua na timoni. Ena yasana ka dua, e bula voli ko Jisu me vakataki ira ga na vo ni tamata, e sega ni vakatatabutaki koya ena dua na ka, sa qai beitaki ni tamata bula vakalialia.

Sa bau dredre dina me ra vakalomavinakataki na tamata! Era tautauvata kei ira na nodra i caba na gone me ra qito vata, e so vei ira era sega ni via meke ni ra sa uvuca na bitu ni i vakatagi na gone tale e so se ra tagi ena nodra tagiyaso na nodra i tokani. Ia, e kaya ko Jisu: “Sa dauvakadinadinataki na vuku e na we ni nona cakacaka.” Io, na kena i vakadinadina​—na cakacaka​—sa vakamakaretaka vinaka ni lasu na veika e rau beitaki kina ko Joni kei Jisu.

Sa qai vunauca ko Jisu na koro lelevu e tolu a cakava kina e vuqa nona cakamana, ko Koresini, Peciseita kei Kapenaumi. E kaya ko Jisu ni kevaka a vakayacora o koya na veicakacaka oqori mai na veikorokoro mai Taia kei Saitoni, ke ra veivutuni makawa ena i sulu taga kei na dravusa. Ena nona vunauci Kapenaumi, na nona vanua me vakaciciva voli mai kina na nona cakacaka vakaitalatala, sa qai tukuna ko Jisu: “Ena ca vakalailai ko Sotoma e na siga ni lewa, ko iko, ko na ca vakalevu.”

E tarava na nona sa qai vakacaucautaki Tamana vakalomalagi ko Jisu ena matadra na lewe vuqa. E yavalati o koya me vakayacora vakakina ena vuku ni nona vunitaka na Kalou na talei ni ka dina vakayalo mai vei ira na vuku kei na yalomatua ia sa vakatakila ga vei ira na tamata yalomalumalumu, vei ira era vaka na gone dramidrami.

Sa qai tinia ko Jisu e veitarai na nona veisureti: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqui vua, ka mamada na noqui colacola.”

E solia vakacava na veivakacegui ko Jisu? E vakayacora ena nona vakarautaka na veisereki mai na veivakabobulataki ena i tovo vakavanua era vakabobulataki ira kina na tamata na i liuliu vakalotu, okati kina me kena i vakaraitaki mada, na i vakaro ni kena vakatatabutaki matua sara na Siga ni Vakacecegu. E vakaraitaka talega o koya na sala ni vakacegu vei ira era vakila tu na tara bi ni nodra lewa kaukauwa na veiliutaki vakapolitiki kei ira era vakila na kena tarai ira vakabibi na nodra i valavala ca ni vakaleqai ira voli kina na nodra lewaeloma. Sa qai vakaraitaka vei ira era vakararawataki voli oqo na sala ena rawa ni bokoci kina na nodra i valavala ca kei na sala e rawa ni ra rekitaka kina na talei ni nodra veiwekani kei koya na Kalou.

Na i vua vinaka e dulaka tu mai ko Jisu sa i koya na taucoko ni yalayala ki vua na Kalou, se na mai qaravi koya na Tamada vakalomalagi dauyalololoma, dauveinanumi. Ia na i colacola mamada e solia ko Jisu vei ira era lako mai vua sa i koya na kena muri na i vakatagedegede ni bula ni Kalou, o ya na Nona i vakaro e volai ena i Vola Tabu. Ia e sega ni veivakaocai na kena muri na veika oqo. Maciu 11:16-30; Luke 1:15; 7:31-35; 1 Joni 5:3.

▪ Era vakatauvatani vakaevei me ra vaka na gone na i tabatamata i Jisu, era yalodokadoka ka yamekemeke?

▪ Na cava e yavalati Jisu me vakacaucautaki koya kina na Tamana vakalomalagi?

▪ Na sala cava era colata voli kina na i colacola bibi na tamata, ia na veivakacegui cava e solia ko Jisu?