Wase e 40

Na Ka ni Vuli me Baleta na Yalololoma

A RAIRAI tiko voli mai Neini ko Jisu, na vanua a vakaturi koya kina na luvena na yada, se rairai a sikova voli e dua na koro e koto volekata. Sa qai loma i Saimoni e dua vei ira na Farisi me raici koya voleka mada ka dauvakayacora na cakacaka veivakurabuitaki vaka o ya. Sa qai sureti Jisu me vakayakavi vata kei koya.

Nona raica ni rawa ni dua na gauna vinaka oqo me qaravi ira rawa kina era tiko e kea, sa vakadonuya sara na veisureti ko Jisu, me vaka ga na nona vakadonuya na veisureti me laki kana vata kei ira na daukumuni i vakacavacava kei ira na i valavala ca. Ia, ena gauna sa curu kina ena vale i Saimoni, a sega ni bau vakayacori vua na i tovo ni veinanumi e daucaka vei ira era vulagi yani.

Na yava ka vakaivava voli ni taubaletaki na kuvu ni sala e duka sara ka katakata, sa dau kena i valavala vakayalololoma me vui na yavadra na vulagi ena wai batabata. Ia, a sega ni savui na yava i Jisu ena gauna e yaco yani kina. E sega mada ga ni bau reguci me kidavaki, me vaka na nodra i tovo. Ia na i tovo yalololoma me lumuti na drauniuluna ena waiwai e sega ni bau caka vua.

Ni sa caka tiko na i vakayakavi, ka ra dabe na vulagi ena teveli, sa qai curu lo mai loma e dua na yalewa a sega ni sureti. E kilai levu ni yalewa i valavala ca. Rairai a sa rogoca oti na veivakatavulici i Jisu kei na nona sureti ‘ira kece sa oca ka colata na i colacola bibi me ra lako mai vua me ra mai vakacegui.’ Na titobu ni kena yavalati koya na veika a raica ka rogoca, sa qai vakasaqarai Jisu yani.

Sa qai lako mai na daku i Jisu na yalewa ki na teveli ka tekiduru ena yava i Jisu. Ni sa tuturu na wai ni matana ena yava i Jisu, sa qai quaraka ena drauniuluna. E kauta talega mai na waiwai boi vinaka ena kena i mamaroroi, ni sa reguca vakamalua na yava i Jisu, sa qai lumuta ena i lumu. E vakaraica tiko ko Saimoni ena nona sega ni vakadonuya. “Kevaka sa parofita ko koya oqo,” e vakananuma lo voli, “sa kila na yalewa oqo sa tarai koya, kei na nonai valavala talega; ni sa yalewa i valavala ca.”

Ni sa kila na nona nanuma, sa qai kaya ko Jisu: “I Saimoni, sa dua na ka ka’u sa via taroga vei iko.”

“Vakavuvuli, mo kaya ga mai,” e sauma yani.

E tekivuna ko Jisu, “Sa dua na turaga, sa lewe rua na tamata erau sa dinau vua: e dua, sa lima na drau na pene na nona dinau; e dua tale, sa limasagavulu. Ia ni sa sega na nodrau ka me rau sauma kina, sa sereka walega vei rau ruarua. Mo tukuna mada mai se ko cei vei rau ena lomani koya vakalevu?”

Ena vuku ni kena veicalati vua na taro o ya sa qai sauma wale tu ga ko Saimoni, “Au sa vakasama, ko koya sa levu cake na ka sa sereki vua.”

“O sa lewa vakadodonu,” e kaya ko Jisu. Ia sa qai vuki vua na yalewa o koya ka kaya vei Saimoni: “Ko sa raica na yalewa oqo, ne? Au sa curu ki na nomu vale, ka sega na wai ko solia me vui kina na yavaqu: ia sa vuya na yavaqu ko koya e na wai ni matana, a sa quaraka e na drau ni uluna. Ko sa sega ni reguci au: ia ko koya oqo sa sega ni cegu ni reguca na yavaqu ni’u sa tiko eke. Ko sa sega ni lumuta na uluqu e na waiwai: ia ko koya oqo sa lumuta na yavaqu e nai lumu.”

Sa vakaraitaka kina na nona veivutuni na yalewa mai na vu ni lomana ena i valavala ca a dauvakayacora tu e liu. Sa qai tinimaka ko Jisu, ena nona kaya: “O koya oqo ka’u sa kaya kina vei iko, A nonai valavala ca sa vuqa, sa bokoci; a sa loloma vakalevu kina ko koya: ia ko koya sa lailai ga na nona ka sa bokoci, sa loloma vakalailai.”

E sega ni vakatara se vakaulubaletaka ko Jisu na i tovo dukadukali. Na kena dina, e vakaraitaka na ka e yaco oqo na nona yalololoma kei na nona kilai ira vinaka na tamata era caka cala ka ra vakaraitaka na nodra veivutunitaka na veika o ya, sa ra qai lako mai vua na Karisito me ra mai vakacegui. Ena nona vakacegui koya na yalewa, sa qai kaya ko Jisu: “Sa bokoci na nomui valavala ca. . . . Sa vakabulai iko na nomu vakabauta; mo lako e na vakacegu.” Luke 7:36-50; Maciu 11:28-30.

▪ E vakaevei na i valavala ni nona kidavaki Jisu ko Saimoni, na turaga ni vale?

▪ O cei a laki vakasaqarai Jisu, ia ena vuku ni cava?

▪ Na vosa vakatautauvata cava e qai solia ko Jisu, ka qai taurivaka vakacava?