Taro na Dauwiliwili

A rawa vakacava me tukuna o Jisu ni sa vosoti na yalewa e kilai levu nona ivalavala ca?—Luke 7:37, 48.

A kana tiko o Jisu ena nona vale o Saimoni e dua na Farisi, a qai “tekiduru ena yava i Jisu” e dua na yalewa. E vakasuasuataka na yavai Jisu ena wainimatana qai vakamamacataka ena drauniuluna. E reguca tale ga na yavai Jisu qai lumuta ena waiwai boivinaka. E tukuni ena kosipeli ni yalewa qo e “kilai levu ena koro ni yalewa ivalavala ca.” Eda ivalavala ca kece nida sega ni uasivi, ia na iVolatabu e dau vakayagataka na vosa ivalavala ca me vakaibalebaletaki ira e kilai levu nodra ivalavala ca se dau ivakarau ni nodra bula mera valavala ca. Kena irairai ni a dua na saqamua na yalewa qo. A tukuna gona o Jisu vua na yalewa qo: “Sa vosoti na nomu ivalavala ca.” (Luke 7:36-38, 48) Na cava e vakaibalebaletaka o Jisu? A se bera ni cabori na isoro ni veivoli, a rawa gona vakacava na veivosoti qo?

Ni bera ni vosoti na yalewa ya ni oti nona savata qai lumuta na yavai Jisu, a vakayagataka o Jisu e dua na vakatautauvata me vakamacalataka kina vei Saimoni na taukeinivale e dua na usutu bibi. A vakatauvatana o Jisu na ivalavala ca me dua na dinau levu e dredre me saumi, a tukuna vei Saimoni: “Rau dinau tu vua e dua na turaga e le rua; e dua e dinautaka e limanadrau na dinari, e dua e limasagavulu. Ni rau sega ni sauma rawa na nodrau dinau, e vosoti rau ruarua. O cei vei rau qo ena lomani koya vakalevu?” E sauma o Saimoni: “Au vakabauta o koya e levu nona dinau.” E kaya vua o Jisu: “E donu nomu isaunitaro.” (Luke 7:41-43) O keda kece eda dinau vei Jiova meda talairawarawa vua, koya gona nida talaidredre vua da qai valavala ca, eda sega ni sauma rawa vua na Kalou na ka e nona, da qai binia tiko ga noda dinau. O Jiova e tautauvata vinaka kei na dua e dausoli dinau qai yalorawarawa tale ga ni bokoca na dinau. Oya na vuna e uqeti ira kina nona imuri o Jisu mera masuta na Kalou ra qai kerea: “Ni vosota na neimami cala [dinau], ni keimami sa vosoti ira era cala vei keimami.” (Maciu 6:12, ftn.) E vakamacalataka na Luke 11:4 ni dinau e dusia tiko na ivalavala ca.

Na yavu cava a veivosoti kina na Kalou ena gauna e liu? Me vaka ni uasivi nona lewadodonu e yaco kina me itotogi ni ivalavala ca na mate. A sauma o Atama na nona valavala ca ena nona bula. Ena lawa a solia na Kalou vua na matanitu o Isireli, a rawa ni vosoti na nona cala e dua ke cabora e dua na manumanu vei Jiova. A tukuna na yapositolo o Paula: “Voleka ni ka kece ga e vakasavasavataki ena dra me vaka e vakaroti ena Lawa. Ke sega ni vakadavei na dra ena sega na veivosoti.” (Iper. 9:22) Era kila na Jiu ni dua ga na sala e rawa ni veivosoti kina na Kalou. E sega ni kurabuitaki nodra vakacala e levu era tiko ena siga ya na ka e tukuna o Jisu vua na yalewa. O ira mada ga era dabe vata tiko kei Jisu ena teveli era veinanuyaka: “Sa dua na ka o ka qo ni vosota na ivalavala ca!” (Luke 7:49) Koya gona, na yavu cava a vosoti kina nona cala na yalewa ivalavala ca qo?

Ni oti nodrau talaidredre na imatai ni veiwatini, a tukuni na imatai ni parofisai e baleta tiko na naki i Jiova ena nona vakarautaka na “kawa,” ena qaqia na bukubukuniyavana o Setani kei na nona “kawa.” (Vkte. 3:15) A qaqi na bukubukuniyava i Jisu ena nodra vakamatei koya na meca ni Kalou. (Kala. 3:13, 16) Na dra i Jisu e isoro ni veivoli me sereka na kawatamata mai na ivalavala ca kei na mate. E sega ni dua na ka ena tarova na vakayacori ni naki i Jiova. Ni cavuti oti ga na vosa ena Vakatekivu 3:15, a raica na isoro o Jiova me vaka ga e sa cabori oti. Koya gona, sa rawa ni vosoti ira era vakabauta nona yalayala.

Ni bera nodra gauna na lotu vaKarisito, o Jiova e okati ira eso na tamata mera yalododonu. Qori o Inoki, Noa, Eparama, Reapi, kei Jope. Ni tu vei ira na vakabauta, era vakanamata ena gauna e vakayacori kina na yalayala ni Kalou. E vola na tisaipeli o Jemesa: “E vakabauti Jiova o Eparama, e okati kina me yalododonu.” Me baleti Reapi, a tukuna kina o Jemesa: “E vaka kina o Reapi na saqamua, e sega beka ni okati me yalododonu ena nona cakacaka?”—Jeme. 2:21-25.

Eso na valavala ca bibi a vakayacora o Tui Tevita e Isireli makawa, ia a vakabauta dei na Kalou dina qai veivutuni dina ena gauna kece oya. E tukuna tale ga na iVolatabu: “E soli Jisu na Kalou me isoro meda veivinakati kina na kawatamata kei na Kalou nida vakabauta na dra i Karisito. E cakava qo na Kalou me vakaraitaka ni a yalododonu ena nona vosota na ivalavala ca ena gauna sa oti ni se veivosoti tiko, me vakaraitaka tale ga na nona yalododonu ena gauna qo ena nona okata me yalododonu o koya e vakabauti Jisu.” (Roma 3:25, 26) A qai vakarautaki e muri na isoro ni veivoli i Jisu, ia a rawa gona vei Jiova me vosoti Tevita, ena sega ni beci kina nona lewadodonu.

Macala gona ni tautauvata tale ga qo kei na yalewa a lumuta na yavai Jisu. A dukadukali na ivakarau ni nona bula, ia a veivutuni. A kila ni gadrevi me vakabulai mai nona ivalavala ca, qai vakaraitaka na ka e cakava na nona dokai koya e lesia o Jiova me veivakabulai. A se bera ni cabori na isoro, ia ni vakadeitaki ena yaco dina era sa bau vakila rawa kina eso me vakataki koya na yalewa oya na kena yaga. Oya na vuna e tukuna kina o Jisu vua: “Sa vosoti nomu ivalavala ca.”

E macala mai na ivakaraitaki qo, ni kauaitaki ira na valavala ca o Jisu. A dau caka vinaka vei ira. O Jiova tale ga e yalorawarawa ni vosota nodra cala o ira era veivutuni. E vakasakiti qai veivakauqeti dina qo vei keda na sega ni uasivi!

[iYaloyalo ena tabana e 7]

Era okati mera yalododonu