Wase e 42

Vunauci Ira na Farisi ko Jisu

E ILE i Jisu ni kevaka e vakasevi ira na timoni o koya ena kaukauwa i Setani, sa qai veisei vakataki koya ko Setani. Sa qai tomana o koya, “Dou vakalewa ni vinaka na kau, ka vinaka talega kina na vuana, se vakalewa ni ca na kau, ka ca talega kina na vuana: ni sa kilai na kau e na vuana.”

E ka vakalialia me tukuni ni vua vinaka ni nona vakasevi ira na timoni ko Jisu e vu mai na nona qaravi Setani tiko. Kevaka e vinaka na vuana, ena sega ni rawa me ca na kau. Ena yasana ka dua, na vuadra ca na Farisi o ya na nodra beitaki Jisu vakalialia ka tusaqati koya ka sega ni yavutaki ena dina e sa i vakadinadina ni ra ca sara ga o ira. E kacivaka vei ira ko Jisu, “Na kawa ni gata! dou na rawata vakaevei, ni dou sa tamata ca, mo dou vosataka na ka vinaka? ni sa vosataka na gusuda na ka sa oso vakalevu kina na lomada.”

Me vaka ni raitayaloyalotaka na i tuvaki ni lomada na noda vosa, na veika eda tukuna e yavutaki mai kina na noda lewai. E kaya ko Jisu: “Ia ka’u sa kaya vei kemudou, A vosa ca vakaaduaga era na cavuta na tamata, era na tarogi kina e na siga ni lewa: ni ko na vakadonui e na vuku ni nomu vosa, ka ko na cudruvi e na vuku ni nomu vosa.”

Veitalia ga na veicakacaka kaukauwa kece i Jisu, era a kerea ga na vunivola kei ira na Farisi: “Vakavuvuli, keitou sa via raica e dua nai vakatakilakila maivei iko.” E dina beka ni ra se bera ni bau raica mada na tamata ka lako mai Jerusalemi oqo na nona cakamana, na i vakadinadina era sa tu e tawavakalasui rawa kina. Sa qai tukuna vei ira na nodra i liuliu na Jiu ko Jisu: “Sa dauvakasaqara nai vakatakilakila nai tabatamata ca kai valavala vakatani: ia ena sega nai vakatakilakila me soli kina, nai vakatakilakila ga i Jona na parofita.”

Ena nona vakamacalataka na ka e vakaibalebaletaka, sa qai tomana ko Jisu: “Ia me vaka ka siga tolu ka bogi tolu ko Jona e na kete ni ika levu; ena siga tolu ka bogi tolu vaka talega kina na Luve ni tamata e na loma ni qele.” Ni sa tilomi koya oti na ika, a qai lako tani mai na ika ko Jona me vaka ga e vakaturi mai na mate, sa tukuna tiko vakailiu ko Jisu ni na mate ka na qai tucake tale me bula ena i katolu ni siga. Ia, na nodra i liuliu na Jiu ena gauna a tucake kina mai na mate ko Jisu, era cata “na i vakatakilakila ga i Jona.”

E kaya kina ko Jisu ni o ira na tamata mai Ninive era a veivutuni ni sa vunau vei ira ko Jona era na vakaturi ena siga ni veilewai ka vakadinadinataka na nodra cala na Jiu era cati Jisu. E kauta talega mai e dua na kena i vakatautauvata me baleti koya na ranadi mai Sipa, e lako mai na yasana vakayawa sara kei vuravura me mai rogoca na vuku i Solomoni ka kurabui ena veika sa raica ka rogoca. E vakamacalataka ko Jisu: “Ka raica, sa dua eke sa uasivi vei Solomoni.”

Sa qai tukuna ko Jisu na vosa vakatautauvata ni dua na tamata sa lako tani mai vua na yalo velavela. Ia na tamata oqo a sega ni vakatawana ena veika vinaka na vanua e lala tu, sa qai curumi koya e vitu tale na yalo velavela. “Ena vaka talega kina vei ira nai tabatamata ca oqo,” e kaya ko Jisu. Na matanitu ko Isireli era a sa vakasavasavataki oti, era sa sotava na kena vakadodonutaki na nodra cala e liu​—e tautauvata na kena lako tani mada vakalailai na yalo velavela. Ia na nona cati ira na parofita ni Kalou na matanitu, na kena e levu duadua na nodra tusaqata na Karisito, sa vakavotuya na kedra i tuvaki ca ka ca vakalevu sara mai na kena i vakatekivu.

Ni vosa tiko ko Jisu, sa qai tadu mai na tinana kei iratou na tacina eratou mai tu e yasadra na lewe vuqa. Sa qai tukuna cake e dua: “Raica, sa tu e tautuba na tinamu kei iratou na tacimu, eratou sa via vosa vei iko.”

“O cei na tinaqu, se ko cei ko iratou na taciqu?” e taroga yani ko Jisu. Sa qai dodoka yani na ligana vei ira na nona tisaipeli, sa qai kaya: “Raica na tinaqu kei ira na taciqu! ko koya yadua ena kitaka na loma i Tamaqu sa tiko mai lomalagi, sai koya oqo na taciqu, kei na ganequ, kei na tinaqu.” E vakaraitaka ena sala oqo ko Jisu ni veitalia na kena talei na i vau ni veiwekani vakayago, ia e talei sara vakalevu na nona veiwekani kei ira na nona tisaipeli. Maciu 12:33-50; Marika 3:31-35; Luke 8:19-21.

▪ Era guce vakacava na Farisi me ra vakavinakataka na “kau” kei na “vuana”?

▪ A cava li “na i vakatakilakila ga i Jona,” ia e qai yaco vakacava me cati e muri?

▪ E yaco vakacava na matanitu ko Isireli ena i matai ni senitiuri me vaka na tamata ka sa lako tani mada mai vua na yalo velavela?

▪ E vakabibitaka vakacava ko Jisu na i vau ni nona veiwekani veivolekati kei ira na nona tisaipeli?