Wase e 46

E Tara na Yalewa na Nona iSulu

SA ROGOVAKI yani ki Kapenaumi na nona lesu mai Tikapoli ko Jisu, e lewe vuqa sara era soqoni vata mai e matasawa me ra kidavaki koya. E sega ni vakatitiqataki ni ra sa rogoca na nona vakamaravutaka na cava ka vakabulai rau na tagane curumi timoni. Oqo ena nona sa butuka yani na matasawa, sa ra qai soqoni vakavolivoliti koya mai ena marau kei na nanamaki.

E dua ka via raici Jisu vakalevu ko Jairo, e dua na vakailesilesi ni valenilotu. Sa cuva sobu ki na yava i Jisu ka vakamasuti koya vakalevu sara: “Na luvequ-yalewa lailai sa voleka sara ni mate: mo ni lako mai mo ni tabaki koya e na ligamuni, me vakabulai kina.” Me vaka ni luvena duabau oqo ka se qai yabaki 12 ga, e rui lomani koya vakalevu sara ko Jairo.

Sa mani vakadonuya ko Jisu, ka ra salavata sara kei Jisu e lewe vuqa, me ra lako yani ki na vale i Jairo. E rawa ni da vakasamataka na nodra namaka na tamata me baci dua tale na cakamana. Ia e dua na yalewa ka maliwai ira tu oqori na lewe vuqa e kauwaitaka voli e dua nona leqa levu.

E turidrabalavu na yalewa oqo ena loma ni 12 na yabaki. Sa levu na vuniwai e sa raici ira oti, ka vakayalia vei ira na nona i yau kecega. Ia e sega ni bula kina; ia sa ca vakalevu sara na leqa e sotava tiko.

Sa rawa ni o kila, na kena vakamalumalumutaki koya na mate oqo, vakamaduataki koya ka vakalolovirataki koya talega. E sega ni rawa me laki tukuni me kilai raraba na mate vaka o ya. Ia ena ruku ni Lawa i Mosese na turidra ena sega ni savasava kina e dua na yalewa, ia kevaka e dua na tamata e tara na yalewa o ya se nona i sulu e tauva na dra, sa dodonu me sava ena wai ia ena dukadukali ka yacova na yakavibogi.

Sa rogoca oti na yalewa oqo na cakamana i Jisu ka lako yani oqo me vakasaqarai koya. Ena vuku ni nona dukadukali, sa qai ciqi maliwai ira na lewe vuqa me kua ni kilai, ka kaya e lomana: “Kevaka ka’u na tara ga na nonai sulu, au na vakabulai.” Ena nona tara ga, sa mudu vakasauri na drodro ni dra!

“O cei sa tarai au?” Sa wacava nona kidacalataka na vosa i Jisu! E kila rawa vakacava o koya? A sega ni tokona ko Pita ka kaya yani, ‘Vakavuvuli, sa vakaosoosoi kemuni na lewe vuqa era sa veidrigidrigiti, ia ko ni sa taroga, O cei sa tarai au?’

Ena nona vakaraici koya yani na yalewa, sa qai vakamacalataka ko Jisu: “Sa dua sa tarai au: ni’u sa kila sa lako tani vei au na kaukauwa.” Io, e sega ni veitaratara walega, ka ni nona vakabulai e lako tani kina mai vei Jisu na kaukauwa.

Ni sa raica na yalewa e sa sega ni vunitaki koya rawa, sa qai lako mai ka cuva sobu e mata i Jisu ena sautaninini kei na rere. Sa qai tukuna ena matadra kecega na tamata, na ka dina taucoko me baleta na nona tauvimate kei na nona sa qai vakabulai vakasauri oqo.

E luvuci Jisu na nona vakatusai koya na yalewa, sa qai vakacegui koya: “Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.” Sa vinaka dina me da mai kila ni o Koya sa digitaka na Kalou me na liutaka na vuravura ena dauveinanumi, ka dauloloma, ni rawata ruarua me maroroi ira na tamata ka tu vua na kaukauwa me na vukei ira! Maciu 9:18-22; Marika 5:21-34; Luke 8:40-48; Vunau Ni Soro 15:25-27.

▪ O cei ko Jairo, ia a cava me lako kina vei Jisu?

▪ Na leqa cava e sotava voli e dua na yalewa, ia ena vuku ni cava e dredre kina vei koya me lako vei Jisu me vukei?

▪ E vakabulai vakacava na yalewa, ia e qai vakacegui koya vakacava ko Jisu?