Vakabulai ni Tara na iSulu i Jisu

Era rogoca na Jiu ena vualiku ni baravi ni Wasa o Kalili ni sa lesu mai na Tikapoli o Jisu. De dua era rogoca ni a vakaruruya na cagi qai vakamaravutaka na wasawasa o Jisu, eso tale era rairai rogoca nona vakabula na tagane curumi timoni. Ni soko lesu yani o Jisu ena yasayasa e Kapenaumi, era sa waraki koya tu e dua “na ilala levu.” (Marika 5:21) Era mamarau ni sobu mai waqa o Jisu, era sa nanamaki tale tu ga.

Dua na ka nona via raici Jisu o Jairo, e rairai ivakatawa ni valenilotu e Kapenaumi. E cuva e yava i Jisu qai vakamasuti koya: “Sa tauvimate bibi na luvequ yalewa lailai. Yalovinaka, ni mai tarai koya mada me oti nona tauvimate, me bula vinaka sara.” (Marika 5:23) Se qai yabaki 12 na luvena duabauga o Jairo, e lomana tale ga vakalevu. Na cava ena cakava o Jisu ena vakamamasu i Jairo me vukei luvena?​—Luke 8:42.

Dua tale na ka vakaciriloloma e yaco ena ilakolako i Jisu ina vale i Jairo. Era nanamaki na tomani Jisu tiko ra qai veinanuyaka ke ra na raica e dua tale na cakamana. Ia e dua na yalewa e maliwai ira voli na ilala levu, e kauaitaka ga na mate levu e tauvi koya tu.

E Jiu na yalewa qori, qai lako tu ga vua na dra me 12 na yabaki. Sa lai raica e levu na vuniwai, e vakayagataka kece na nona iyau ena veiqaravi vakavuniwai era vakatututaka. Ia e sega ni vakaotia na kena mate. “Sa qai ca ga” na kena ituvaki.​—Marika 5:26.

Na kena mate na marama qori ena rawa ni vakavuna nona malumalumu, madua, se beci koya. E sega ni dau talanoataki na mate va ya. E tukuni tale ga ena Lawa a soli vei Mosese ni dukadukali na yalewa e lako tu ga vua na dra. O koya e tara na yalewa qori se na nona isulu e dodonu me sili, ena dukadukali tiko me yacova na yakavi.​—Vunau ni Soro 15:25-27.

E vaqarai Jisu mai na yalewa qo ni sa rogoca “na veika e cakava.” E sega ni vinakata me kilai ni sa maliwai ira tu na ilala levu ena vuku ni kena mate dukadukali, e kaya lo tiko ga: “Keu tara wale ga na nona isulu e sau, au na bula.” Ni tara ga na tutu ni isulu i Jisu, e vakila sara na marama qori ni sa mudu na drodro ni dra! “Sa vakabulai mai na mate bibi ya.”​—Marika 5:27-29.

E taroga o Jisu: “O cei e tarai au?” Cava mada ena vakasamataka o yalewa ni rogoca qori? E kaya o Pita: “Dua na ka na oso ni tamata, eso era drigiti kemuni.” Cava ga e taroga kina o Jisu: “O cei e tarai au?” E kaya o Jisu: “Dua e tarai au, au vakila ni lako tani vei au na kaukaua.” (Luke 8:45, 46) Io, sa vakayagataki na kaukaua i Jisu ena veivakabulai ya.

E rere, sautaninini qai tekiduru e mata i Jisu o yalewa ni sa kidavi na ka e cakava. E vakamacalataka e matanalevu na kena mate kei na nona sa vakabulai. E vakacegui koya o Jisu ni kaya: “Luvequ, sa vakabulai iko na nomu vakabauta. Lako ena vakacegu, mo bula mai na kemu mate bibi.”​—Marika 5:34.

Qori e vakaraitaka ni dau veikauaitaki qai yalololoma o koya e digia na Kalou me liutaka na vuravura. E dau veikauaitaki, e tu tale ga vua na kaukaua me veivuke.