Wase e 50

Vakavakarau me Sotava na Veivakacacani

NI VAKASALATAKI iratou oti na nona i apositolo ena i walewale ni cakacaka vakavunau, sa qai vakasalataki iratou ko Jisu me baleti ira era veitusaqati. E kaya: “Raica, au sa talai kemudou yani me vaka na sipi e na kedra maliwa na wolifa: . . . Dou qarauni kemudou mai vei ira na tamata, ni ra na soli kemudou yani ki na mataveilewai, a ra na vakanakuitataki kemudou e na nodra veivale ni lotu; ia dou na kau ki matadra na kovana kei na tui e na vukuqu.”

E dina ga ni ratou na qai sotava na veivakacacani rarawa sara, ia a vakadeitaka ko Jisu ena nona yalataka: “Ni ra sa soli kemudou yani, kakua ni lomaocaoca se dou na vosa vakaevei se cava dou na kaya: ni na soli vei kemudou e na tiki-ni-siga ko ya na ka mo dou vosataka: ni dou na sega ni vosa koi kemudou, ia ena vosa ga na yalo ni Tamamudou e na lomamudou.”

E tomana ko Jisu, “Era na dui soli ira yani na veitacini me vakamatei, kei na tamana na luvena: ia era na tu cake na gone vei ira na nodra qase, ka vakavuna na nodra mate.” E kuria vakaoqo: “Dou na cati vei ira na tamata kecega e na vuku ni yacaqu: ia ko koya ena vosota me yacova nai vakataotioti, ena vakabulai.”

Na vunau e liu taumada na kena bibi. Oqori na vuna a vakabibitaka kina ko Jisu ni vinakati me ra qaqarauni matua sara me ra galala me rawa ni ra iataka tikoga kina na cakacaka. E kaya o koya: “Ni ra vakacacani kemudou e na dua na koro, dou dro ki na dua tani: ni’u sa kaya vakaidina vei kemudou, Dou na sega ni vakaotia na veikoro e Isireli, e na lako mada mai na Luve ni Tamata.”

E dina ni a solia na i vakasala, i vakaro kei na veiuqeti oqo ko Jisu vei iratou na nona i apositolo lewe 12, ia a nakiti talega oqo me baleti ira era na qai vakaitavi ena vunau yani e vuravura raraba ni sa oti na nona mate kei na nona vakaturi. E vakaraitaka oqo ena nona kaya ni ra na yaco na nona tisaipeli me ra ‘na cati mai vei ira na tamata kecega,’ e sega mai vei ira duadua ga na Isireli eratou a talai yani kina na i apositolo me ratou laki vunau vei ira. Vakatalega kina, ni ratou a sega ni soli yani na i apositolo vei ira na kovana kei na tui ena cakacaka lekaleka vakavunau a talai iratou yani kina ko Jisu. Kuria o ya ni ra a sega ni soli ira yani na vakabauta o ira na nodra lewe ni matavuvale me ra vakamatei.

O koya gona ena nona kaya ni ratou na sega ni vakaotia na tisaipeli na nodratou vunau wavoki me yacova ni sa na “lako mada mai na Luve ni tamata,” e tukuna vakailiu vei keda ko Jisu ni ra na sega mada ni vakacavara na nona tisaipeli na vunautaki ni Matanitu tauyavutaki ni Kalou me roboti vuravura taucoko ni bera nona lako mai na Tui vakaiukuuku ko Jisu Karisito ena nona i lesilesi vakaturaganivalu i Jiova me veivakarusai ena Amaketoni.

Ena nona tomana ko Jisu na nona veivakasalataki me baleta na vunau, sa qai kaya: “Sa sega na tisaipeli me uasivi vua na nonai vakavuvuli, se na tamata vua na nona turaga.” Me ra qai namaka gona na i muri i Jisu ni ra na sotava vata ga na veivakatotogani ca sara kei na veivakacacani a sotava ena nona vunautaka voli na Matanitu ni Kalou. Ia, sa qai vakadreti ira: “Kakua ni rerevaki ira era sa vakamatea na yago, a ra sega ni rawata me ra vakamatea na yalo [soul]; ia dou rerevaki koya ga sa rawata me vakarusa na yalo [soul] kei na yago talega mai Qiena.”

Sa na kotora ko Jisu na i vakaraitaki ena ka oqo. Ena bolea tawarere na mate o koya, ia me na kakua ga ni soro koso ena nona yalodina tiko Vua e tu vei koya na kaukauwa kece, na Kalou ko Jiova. Io, ko Jiova ga e rawa ni vakarusa na “soul” (kena i balebale e ke, na nona rawa ni bula tiko e dua mai muri me vaka e dua na tamata bula) se ena yasana kadua, e rawa vua me vakatura e dua na tamata me marautaka na bula tawamudu. Sa dua dina na Tama vakalomalagi dauloloma, dauveikauwaitaki ko Jiova!

E tarava na nona vakayaloqaqataki ira na nona tisaipeli ko Jisu ena vosa vakatautauvata ka vakabibitaka na nona loloma ko Jiova vei ira. “E sega li ni volitaki e rua na siparo e na dua na sede? e taroga o koya. “Ia, e na sega ga ni lutu ki na qele e dua vei rau me sega ni kila na Tamamudou? Ia, ko i kemudou, e wiliki yadua sara ga na drau ni ulumudou. O koya gona mo dou kakua ni rere; ni dou sa talei cake sara mai vei ira na siparo e vuqa.”

Na i tukutuku ni Matanitu a lesia vei ira nona tisaipeli ko Jisu me kuruvaki ena tawasea na vuvale, ni so na lewe ni vuvale era na ciqoma ka ra na cata na kena vo. “Dou kakua ni vakasama ni’u sa lako mai me’u kauta mai ki vuravura na veivinakati,” e vakamacalataka o koya. “Au sa sega ni lako mai me’u kauta mai na veivinakati, ai seleiwau ga.” O koya gona, e gadrevi na yaloqaqa me qai ciqoma rawa kina e dua na lewe ni vuvale na dina ni i Vola Tabu. “O koya sa loloma vakalevu vei tamana se tinana ka vakalailai vei au, sa sega ni yaga vei au,” e kaya rawa ko Jisu, “ia ko koya sa loloma vakalevu vua na luvena-tagane se luvena-yalewa ka vakalailai vei au, sa sega ni yaga vei au.”

Ena nona tinia na nona i vakasala, sa qai vakamacalataka ko Jisu ni ko ira era rogoci ira na nona tisaipeli era vakarorogo talega vua. “Ko koya ena solia vua e dua vei ira oqo sa lailai ga e dua walega na bilo wai liliwa me gunuva, ni sa vakatokai me tisaipeli, au sa kaya vakaidina vei kemudou, Ena sega sara ni yali vua na kenai sau.” Maciu 10:16-42.

▪ Na veivakasalataki cava a solia ko Jisu vei ira na nona tisaipeli?

▪ Na veivakayaloqaqataki kei na veivakacegui cava e solia o koya vei ira?

▪ A cava e vakaibalebaletaki talega kina vei ira na lotu va-Karisito ena gauna oqo na i vakasala i Jisu?

▪ Na sala cava e sega ni uasivi kina na tisaipeli i Jisu mai vua na nona i vakavuvuli?